Avea ma Alii o e Ua i ai le Agaga o le Atua

Ou te fia talanoa atu i le afiafi nei ia te outou alii talavou maoae o e o loo umia le Perisitua Arona paia. E maeu se faamanuiaga faapitoa o le umiaina o le Perisitua a le Atua lea e faaaoga ina ia faateleina ai o tatou mana, malosiaga, ma le iloatinoina o mea. Ina ia faataitaia ia faamanuiaga e maua mai lenei avanoa, ou te fia talanoa ai e uiga i ni alii se toalua o le Atua o e na tauaveina le igoa Iosefa.

E tulaga ese se tulaga na oo i ai lo’u tama ina ua aulia e ia tausaga o se ositaulaga. Sa leai ni aoga maualuluga i le mea sa ia nofo ai. Sa manao o ia e aoga ma sa maua le faatagana mai lona tama e aluese ai ma le faatoaga ae saili atu sana aoga i se isi mea ae a o ona ia tausia o ia lava. Ina ua taunuu i le Aai o Sate Leki, sa ia faalogo ai i se galuega i le fale o Peresitene Iosefa F. Samita. Sa faafaigaluegaina loa o ia e tausia ni povi se lua a le Perofeta. I a matou afiafi faaleaiga matou te mananao ai ia Tama e na te faamatalaina ni tala i lona olaga talavou a o nofo ai i le fale o le Perofeta. Matou te faalogologo i lipoti e pei o nei:

Na faatonuina e le Faletua o Samita lo’u tama i ona tiute e ala lea i le faamatala atu i ai faapea o povi “e tamalii foi, ma e tatau ona e tausia faalelei i la’ua. Ia faamama ma ia aoaoina lelei i la’ua ina ia oo i soo se taimi lava ou te fuafua ai e aumai i laua i totonu o le potu malolo, ae o loo mama lelei e o mai i totonu.” Sa fai mai Tama na malamalama lelei o ia i le tatauina o le susu, ae na te le iloa ona faamama ia povi.

A o le’i tatauina ia susu i taeao ma afiafi uma e ao ona matuai faataeele ma faamamago lelei i le vai mafanafana, fasimoli ma solo ua uma ona saunia mo lea faamoemoe. Sa fafagaina i la’ua i le vaomago sili ona lelei ma e tatauina foi ia le susu i le taimi lava e tasi e faalua i le aso.

E le gata i ona tiute mo povi “tamalii” a le aiga o Samita, ae sa talosagaina foi lo’u tama e na te faia i nisi o taimi ni galuega i totonu o le fale. Na ia faamatalaina mai ia i matou: “I se tasi taeao malulu lava sa ou fufuluina ai ia faasitepu e agai atu i le fale sa faamautu ai le Peresitene o le Ekalesia. Na toetoe lava a pa’u ai ia Peresitene Samita. Na mafua mai ona ua ou tuua le vai e liu aisa ae le faamagoina. Ona ou la’uina ai lea o le vaivevela e faaliusuavai ai le aisa ma ave solo e solomago ai maa. Na toeitiiti lava mama ia faasitepu, ae savavali ane loa a’u uo i le vasega e agai atu i le aoga ae le’i mae’a le galuega. O se aafiaga na faamaualaloina ai.”

O le faamatalaina o nei tala, ou te le manao ai e tuua outou ma se lagona faapea o lo’u tama o se tuagane masaga o Cinderella. Sa aveina e le aiga o Samita lenei tamaitiiti mativa mai le faatoaga mai Idaho i lo latou aiga a o ia faamae’aina le aoga maualuga ma alu atu ai i le Iunivesite o Iuta. Sa latou faaaofiaina o ia i a latou gaoioiga faaleaiga, sa latou aai faatasi ma ia, faapea ma tatalo faaleaiga. Na fetufaai mai e lo’u tama i lona lava aiga lana molimau faapea o le Perofeta o Iosefa F. Samita, o se tagata moni lava o le Atua: “Pe a matou tootutuli faatasi ma le perofeta, i le tatalo faaleaiga, ma faalogo atu i lana aioiga faatauanau mo faamanuiaga a le Alii i luga o lona aiga ma a latou lafu ma fagaga ma iloa ai o nei lava povi faaluma tagata o le mataupu lea o ana faamanuiaga, sa faamautu mai ai ia te a’u le moni o lea tulaga… . O le toatele o alii maoae ua ou iloa latou te le’i amio a’i e tusa ai ma a latou gaoioiga ma fesootaiga i aso taitasi. E le faapea la ia le Perofeta o Iosefa F. Samita. O gaoioiga masani i aso taitasi e faaopoopo atu ai i lona ofoofogia. Ia te a’u lava ia o ia o se perofeta e tusa lava po o le fafano o ona lima po o le tatalaina o nonoa o ona seevae.”

O le lesona na aoaoina, na aoao mai ai ia te i matou se agaga talisapaia tele ma le alofa mo le perofeta a le Atua.

O le faamatalaga a lo’u tama e uiga ia Peresitene Iosefa F. Samita e faamanatu mai ai ia te a’u ia le faamatalaga a Farao e uiga ia Iosefa o Aikupito: “Pe tatou te maua ea se tusa ma lenei tagata, o le ua i ai le Agaga o le Atua? (Kenese 41:38).

O tala a lo’u tama na faamatala mai ai ia i matou e uiga i a Peresitene Samita, o lona aiga, ma ana povi, ae na latou faaali mai ai foi se mea e tusa ai ma le suiga o taimi talu mai ia popofou o le senituri 20. Ou te manatu e le’i mafaufauina e lo’u tama o komepiuta i o tatou aso lea e i luga o se tamai kesi e saoasaoa ma tele lona manatuaina o ni faamatalaga e tuu i ai. Ou te manatu e le’i mafaufauina foi e ia ia ni mea leaga e mafai e Satani ona faia i nei foi lava tekinolosi ofoofogia. O ana auala faatiapolo, ua mafai ai e Satani ona faasalalauina atu le tele o siama pepesi. O nei siama o le a tele se afaina ai o o tatou agaga pe afai tatou te le maua ni auala malolosi e tetee atu ai. O le pogai lea ua mafua ai ona ou mafaufau i le polokalama lea e tetee atu ai i siama uma—le meaalofa o le Agaga Paia.

E tusa ai ma le meaalofa o le Agaga Paia, na saunoa ai ia Peresitene Iosefa F. Samita: “‘O le meaalofa o le Agaga Paia,’” o le faamanuiaga faapitoa ua faamauina i luga o e talitonu salamo ma papatisoina ia Iesu Keriso, ma o se ‘molimau mautu.’ O le agaga o le Atua e mafai ona olioli ai, o se aafiaga le tumau e mafai ai e le malamalama faale Atua ma le mana ona oo mai i tagata mo faamoemoega faapitoa ma sauniga. Ae o le meaalofa o le Agaga Paia, lea na mauaina e aposetolo i le aso o le Penetekoso, ma e tuuina atu i le faamauga, o se molimau tumau ma le faaeaga maualuga lea. [in James R. Clark, comp., Messages of the First Presidency of The Church of Jesus Christ of Latter-day Saints vols. [1965–75], 5:4).

E taua tele le lagolago atu o outou aiga ia te outou i le aoaoina o le talalelei a lo tatou Alii ma le Faaola. Ona, tatau lea ia i tatou uma ona faalagolago atu i le meaalofa o le Agaga Paia ina ia taitaiina i tatou i le iloaina lea o le sa’o mai le sese. O iina lea e fesoasoani ai le faataitaiga ia Iosefa o Aikupito i le aoaoina o i tatou taitoatasi. O ia o se tagata sa matuai faalagolago atoatoa i le Agaga o le Alii lea na oo lava i se tagata sa faatauasoina e le ifo i tupua, e igoa ia Farao, sa iloaina ona uiga ma lona malosi e le masani ai.

Se’i o tatou taumafai i le afiafi nei e vaai po o a savali ofoofogia e mafai ona tatou maua mai se suesuega o taitai maoae mai tusitusiga paia. Na aoaoina i tatou e Iosefa Filitia Samita i totonu o lana tusi o Answers to Gospel Questions:

O loo lava ni faamaoniga e faapea na valaauina ma faauuina ia tamaiti i aso anamua. I taimi a o le’i oo i le lolo, a o uumi tausaga sa ola ai tagata, o nisi sa valaauina e galulue a o laiti lava. O Enoka sa luasefululima tausaga ina ua faauuina o ia e Atamu; … ma sa mauaina e Noa le perisitua i le sefulu o ona tausaga [tagai MFF 107: 48, 52]. O le matua o Iosefa, le atalii o Isaraelu, ina ua ia mauaina le perisitua e le o faamaumauina; ae atonu sa ia mauaina a o talavou lava o ia. Na faatauina atu o ia e ona uso ina ua faatoa sefulufitu ona tausaga, ma sa tatau ona ia mauaina muamua le perisitua ae le’i oo i lena taimi, aua sa ia faaaogaina i le nuu o Aikupito [tagai Kenese 37:2; 40:8–19; 41:14–36]” (comp. Joseph Fielding Smith Jr., 5 vols. [1957–66], 2:9).

I le sue atu i le tusi o Kenese i le Feagaiga Tuai, tatou te maua ai le tala ia Iosefa. O Iosefa o se tagata o se aiga e 11 le auuso—o le 10 o i latou e matutua uma ia te ia. Na foliga mai sa sili atu ona alofagia o ia e lona tama nai lo isi. Sa ia faia se ofutalaloa felanulanuai o Iosefa, ma taofi o ia i le fale, ma poloaiina o ia e alu atu i lea taimi ma lea taimi e vaai i ona uso o e sa leoleo i le lafu i le fanua. Sa fai foi miti a Iosefa, lea na foliga mai ai na tu ai o ia i se tulaga e pule ai i isi ona uso.

I se tasi aso ina ua alu atu ia Iosefa e vaai ona uso, a o latou vaaia ia lafu, sa latou fuafua ai loa ua latou le toe lava ona onosai ia mea a Iosefa ma mananao loa e aveese o ia. Na maua se avanoa e faatau atu ai Iosefa e fai ma pologa i tagata sa Isamaeli o e sa faimalaga atu agai i Aikupito.

E le’i pine, ae oo atu Iosefa i se nuu ese, e ese foi a latou tu ma aga, e ese foi o latou talitonuga faalelotu, ae o le mea e sili ona leaga, o le faatauina atu lea e fai ma pologa. Sa matuai lelei le amio a Iosefa, o lea na faatauina ai loa o ia e “Potifara, o le auauna sili a Farao, o le pule i le au faafeao” (Kenese 37:36).

“Sa i ai le Alii ia Iosefa, [ma o le agaga sa ia tauaveina sa fesoasoani ia te ia a o avea o ia] … ma se tagata manuia; sa i le fale o lona alii o le Aikupito.

“Ua iloa e lona alii ua ia te ia le Alii, o mea uma foi sa na faia ua faamanuia e le Alii i lona lima.

“Sa alofagia Iosefa e ia, ua ia auauna ia te ia: … ua tofia o ia e [Potifara] e pule i lona aiga, o mea uma foi sa ia te ia ua tuu atu i lona lima.

“E afua mai i ona aso na ia tofia o ia e pule i lona aiga ma ana mea uma, na faamanuia ai e le Alii le aiga o le Aikupito ona o Iosefa; na manuia i le Alii ana mea uma i le fale atoa ma le fanua.

“Ua ia tuu ana mea uma i le lima o Iosefa, ua na le iloa sana mea na o le mea e ‘ai sa ‘ai ai o ia. Sa aulelei le tino o Iosefa ma ona mata e lalelei ia” (Kenese 39:2–6).

I se tasi aso, a o galue ai ia Iosefa i totonu o le fale, sa oo ai o ia i se tulaga faigata. Na manao le ava a Potifara e momoe ma Iosefa. Na iloa vave lava e Iosefa o loo i ai o ia i se nofoaga sese. O loo tusia i tusitusiga paia:

“E leai se sili ia te au i le fale nei, ua na le taofi sina mea ia te au, ua na o oe, aua o oe o lona faletua: pe faapefea ona ou faia lenei mea leaga tele ma ou agasala ai i le Atua? …

“Ona tago atu lea o ia i lona ofu, o loo faapea, Ta te momoe; ona tuu lea e ia o lona ofu i lona lima, ma ua sola i fafo” (Kenese 39:9, 12).

Tatou te aoaoina se lesona aoga mai ia Iosefa. Ina ua fetaiai o ia ma se faaosoosoga, na vave lava ona alu ese o ia, mai foliga o le tiapolo. O i tatou uma lava e i ai mea e tutupu i o tatou olaga lea tatou te oo atu ai i ni tulaga e luitauina ai.

Pe a tatou feagai ma mea faatiapolo ma taufaaleaga, e tusa lava pe o ni ituaiga musika sese, polokalama o le televise, po o le Initoneti, lea e tuuina atu ai i tatou i se siosiomaga sese, e maeu se faamalosiau o le a i ai pe a manatuaina le tala ia Iosefa: “Ma ua sola [o ia] i fafo” (Kenese 39:12).

Na ia aluese mai le faaosoosoga.

E ui lava i le faia o faaiuga sa’o e le’i saoloto ai Iosefa mai luitau sa ia feagai ai i le olaga. Ina ua foi mai Potifara i le fale, sa tomumu atu lona faletua i lana tane e faapea sa ula Iosefa ia te ia. Sa matuai le fiafia lava ia Potifara, o lea na ia “tuu atu ai ia te ia, i le falepuipui, o le mea na ua fusifusia ai e ua fusifusia e le tupu: sa i ai o ia i le falepuipui.

Ma sa [toe i ai], le Alii faatasi ma Iosefa, ua ia alofa ia te ia, ua na faatupuina le alofa o le alii o le falepuipui ia te ia.

[E le’i leva] ae tuu atu e le alii o le fale puipui i le pule a Iosefa o e na fusifusia uma sa i le fale puipui; o mea uma na latou faia i lea mea, o ia lava na faia (Kenese 39:20–22).

Ae sa faatasi le Alii ma Iosefa, ma sa toe tuuina atu se isi avanoa a o i ai o ia i le falepuipui. O nisi o auauna e toalua a Farao sa lafoina atu i le falepuipui. Sa tofu i la’ua ma se miti lea sa mafaia e Iosefa ona faamatalaina. O le tasi o i laua o le a oti ai i totonu o le falepuipui; ae o le isi o le a toe foi atu pe a mavae aso e tolu i le tofiga o le avea ma fai mea e ‘ai mo le Farao. Na faataunuuina uma ia miti. O le tagata fai mea e ‘ai, o le na toe foi atu i lona tofiga maualuga mo le Farao, na matuai galo lava ia Iosefa, seia oo ina ua mavae tausaga e lua.

Ona fai lea o le miti a Farao. Sa leai se tasi na mafai ona faamatalaina lana miti. Na iu ina manatua e le tagata e faia ia mea e ‘ai ia Iosefa. Na ia faamatalaina atu i le tupu le mafaia e Iosefa ona faamatalaina ia miti. “Ona feau atu lea e Farao ua aami ia Iosefa, ua faavavevave foi ona latou aumai ia te ia ai le lua: ua na tafi i lana ‘ava, ma sui ona ofu, ona alu atu ai lea ia Farao” (Kenese 41:14).

Sa mafai e Iosefa ona faamatala ia le miti a Farao. Sa matuai ofo ia le Farao ma o lea na ia avea ai loa Iosefa ma se tasi o ana auauna. Sa toe faatasi foi le Alii ma Iosefa. E le’i pine ae faaeaina ia Iosefa i se tofiga e sosoo atu i le Farao i le nuu uma o Aikupito. Sa i ai se mea na tulaga ese ai ia Iosefa mai isi auauna uma. Na faamatalaina e Farao le mafuaaga na ese ai ia Iosefa mai isi auauna uma ina ua ia faapea mai: “Pe tatou te maua ea se tusa ma lenei tagata, o le ua i ai le Agaga o le Atua?” (Kenese 41:38).

O le a outou maitauina i tulaga taitasi uma lea na oo i ai ia Iosefa, sa faapea ona faatasi le Alii ma ia. E faigofie lava ona iloaina le agaga faapitoa sa i totonu ia te ia ona o le auala sa ia ola ai ma faalogo ma usiusitai i le siufofoga o le Alii e taitaiina ai o ia.

O lena lava iloaina o le a mautinoa le faatasi ma i tatou taitoatasi a o taitaiina ma faatonutonuina i tatou e Lona Agaga Paia. Faalogo i le leo itiiti ma le malu pe a outou feagai ma se taimi o faaiuga. O le a mautinoa lava o se leo malosi o le lapataiga e ta’u atu ia te oe ina ia tape ia musika sese, ina ia sola ese mai polokalama faataumaoi o le televise, po o le tape o se itulau o le initoneti lea e na o mafaufauga leaga lava e oo mai ai i lou mafaufau. O le a faailoa atu e le Agaga Paia ia te outou pe a outou i ai i se tulaga po o se nofoaga e faatafunaina ai.

Ou te folafola atu ia te outou, afai o le a outou faalogo atu i le leo o le lapataiga a le Agaga Paia, ma mulimuli i Lana taitaiga, o le a faamanuiaina outou i asiasiga a agelu, lea o le a faaopoopoina mai ai le atamai, malamalama, mana, ma le mamalu i lou olaga. Ia manatua ua noatia le Alii i le feagaiga paia e faamanuia o tatou olaga e tusa ai ma lo tatou faamaoni. E na o Ia e mafai ona liuaina i tatou e avea ma tagata o loo i ai le agaga o le Atua, lea e taua o le Agaga Paia.

O se matuai faamanuiaga lava le umiaina o le perisitua paia a le Alii ma maua lena mana ma le malosi i totonu ia i tatou. Tau ina ia musuia ma taitaiina i tatou e le Alii a o tatou suesue i tala o perofeta maoae o e na soifua ai i le lalolagi. Ia tatou aoina mai o latou olaga ia mea na o le a faalatalata atu ai i tatou i lo tatou Foafoa ma fesoasoani ai ia i tatou ina ia olioli i faamanuiaga ma taunuuga e maua mai le talalelei a lo tatou Alii ma le Faaola. Tau ina ia musuia i tatou e mulimuli i Lona ala, o la’u tatalo faamaualalo lea i le suafa o Iesu Keriso, amene.