Mulimuli Mai Ia te A’u

O i la’ua o ni faifaiva a o le’i faalogoina e i la’ua le valaau. A o lafo o la upega i le sami o Kalilaia, sa taofi e Peteru ma Aneterea o la upega ina ua latalata atu ia Iesu le Nasareta, ma silasila atu i o la’ua mata, ma fetalai atu i ni upu faigofie, “Mulimuli mai ia te A’u.” Na tusia e Mataio faapea, “sa tuua loa e nei faifaiva o la upega ae mulimuli atu ia te ia.”

Ona faalatalata atu lea o le Atalii o le Tagata i isi foi faifaiva e toalua o e sa i luga o se vaa faatasi ma lo la tama, o loo fonofono masae o o latou upega. Na valaau atu Iesu ia i la’ua, “Ma sa tuua loa e [Iakopo ma Ioane] le vaa ma lo la’ua tama, ae mulimuli atu i le [Alii].”¹

Pe ua e manatunatu ea pe sa faape’i le ola ai i vaitaimi o le Faaola? Ana faapea sa e i ai iina, faamata e te faalogo ma gaua’i atu i Lana valaau e “Mulimuli mai ia te a’u”?

Atonu, o se fesili tonu lava e tatau ona i ai, “Afai e valaau mai le Faaola ia te oe i le aso, pe e te naunau ea e tuua au upega ma mulimuli atu ia te Ia?” Ou te mautinoa e toatele o le a faapena ona fai.

Ae o nisi, atonu e le o se faaiuga faigofie lea. O nisi ua latou iloaina o upega, ona o lo latou lava natura, e faigata ai i nisi o taimi ona tuua.

E eseese foliga ma le lapopoa o upega. O upega na tuua e Peteru, Aneterea, Iakopo, ma Ioane o ni upega e lavelave—o meafaigaluega sa fesoasoani ia i latou e saili ai mea e ola ai.

Tatou te manatu i nisi o taimi faapea o nei alii e toafa o ni faifaiva e faaletaulia ma e le’i tele ni mea na latou ositaulagaina ina ua latou tuua o latou upega ina ia mulimuli atu i le Faaola. Ae i se tulaga e ese ai, e pei ona ta’ua e Elder James E. Talmage, i totonu o le tusi o le Jesus the Christ, na faamanino mai ai faapea, o Peteru, Aneterea, Iakopo, ma Ioane o se paaga soofaatasi faapisinisi sa matuai ola lava. Sa “i ai ni o latou vaa ma sa faafaigaluega ai foi nisi tagata.” E tusa ai ma le tala a Elder Talmage, o Simona Peteru, “Sa tele le tamaoaiga faaletino na ia maua; ma ina ua ia tautala i le tuua o mea uma ae mulimuli ia Iesu, e le’i faatauagavale le Alii i le tele … o le tamaoaiga faaletino o Peteru na ia ositaulagaina.”²

Mulimuli ane, o le upega o le ‘oa na saisaitia ai se alii talavou mauoa, o le na fai mai ua ia usitaia poloaiga uma talu mai lona laitiiti. Ina ua ia fesili i le Faaola po o le a se isi mea e tatau ona ia faia ina ia maua ai le ola e faavavau, sa tali atu le Matai, “Afai e te manao ina ia atoatoa ona lelei o lau amio, ia e alu ma e faatau atu au mea, i le e avatu ai i e matitiva; ona ia te oe lea o le faulaigaoloa i le lagi, i le e sau ma mulimuli mai ia te au.” Ua faalogo le taulealea i lea upu, “Ona alu ese ai lea o ia ma le tiga: aua e tele lava ana mea.”³

O upega e tele lava ina faauigaina o ni fuafuaga ia mo le pu’eina o se mea. I se isi manatu i ai, ae sili atu ona taua, e mafai ona tatou faauigaina se upega o soo se mea lea e toso ese maia pe taofia ai i tatou mai le mulimuli atu i le valaau a Iesu Keriso, le Alo o le Atua soifua.

O le faaaogaina o upega i le tulaga lea e mafai ona faatusa i a tatou galuega, o mea tatou te fiafia i ai, o o tatou faanaunauga, ma le vaega e silisili atu, o o tatou faaosoosoga ma agasala. Pe a faapuupuu, o se upega o soo se mea lea e mafai ona toso ese mai ai i tatou mai le mafutaga ma lo tatou Tama Faalelagi po o Lana Ekalesia ua toefuataiina.

Se’i o’u tuuina atu se faataitaiga o aso nei. O se komepiuta e mafai ona avea ma se meafaigaluega aoga tele ma talafeagai. Ae, afai tatou te faatagaina le komepiuta e faaalu ai lo tatou taimi i ni gaoioiga le talafeagai ma le faatafuna, o le a avea loa ma se upega lavelave.

O le toatele o i tatou e fiafia tele e matamata i tauvaga afeleti, ae afai e mafai ona tatou manatuaina ia faamatalaga uma e uiga i tagata afeleti e sili ona tatou fiafia i ai ae galo ia i tatou i le taimi foi lava lea ia aso fanau po o aso faamanatu, o le le amanaiaina o o tatou aiga, pe tatou te teenaina foi le avanoa e tuuina atu ai ni auaunaga faaKeriso, ona mafai foi lea ona avea ia afeleti ma se upega lavelave.

Talu mai taimi o Atamu, sa ‘ai lava meaai a le tagata ma le afu o ona mata. Ae afai e alu uma lo tatou malosi i le galuega ma oo atu ai i le tulaga ua le amanaiaina ai ia tulaga faaleagaga o le olaga, o le a mafai foi ona avea le galuega ma se upega lavelave.

O nisi ua maileia i le upega o le tetele o aitalafu. O le upega o le tupe tului ua matuai saisaitia ai lava i latou lea e moomia ai ona latou faatauina atu o latou taimi ma malosi ina ia ausia ai manaoga o e na latou aitalafu mai ai. Latou te tuuina atu lo latou saolotoga, ma avea ma pologa o lo latou soona faaalu ma le le magafagafa.

E le mafai ona lisiina atu le tele o upega ia e mafai ona maileia ai i tatou ma taofia ai i tatou mai le mulimuli i le Faaola. Ae afai tatou te faamaoni i lo tatou naunau e mulimuli ia te Ia, e tatau ona tatou tuuese loa ia upega lavelave o le lalolagi ma mulimuli atu ia te Ia.

Ou te leiloa se isi vaitaimi i le talafaasolopito o le lalolagi ua matuai faatumulia ai i le tele o upega lavelave eseese. Ua matua faigofie ona faatumulia o tatou olaga i fuafuaga, fonotaga, ma galuega. E faigofie ona laveia i le tele o upega ia e i ai nisi taimi e oo lava i sina fautuaga ina ia tuusaoloto mai ai, e foliga mai e taufaamata’u ma e taufaafefe foi ia i tatou.

O nisi taimi tatou te lagona ai o lo tatou pisi tele, o le silisili foi lena o lo tatou taua—e ui lava o lo tatou “pisi tele” e iloa ai lo tatou agavaa. Uso e ma tuafafine, e mafai ona alu uma taimi o lo tatou olaga atoa e pisi solo ai e le malolo, i le faiga o lea mea ma lea mea, ae o le mea moni lava e leai a se uiga i le i’uga.

O le tele o mea tatou te faia atonu e le taua tele. Ia tatou taulai atu le malosi o o tatou mafaufau, o o tatou loto, ma o tatou agaga i mea e faavavau le taua—ma e aoga.

A o tatou faalogoina le patia pata o le olaga i o tatou tafatafa, tatou te faalogoina ai foi le taualaga e “o mai iinei” ma le “o atu iina.” I le totonugalemu o le malomaloa ma leo faatosina o loo tauva mo o tatou taimi ma lo tatou fiafia, o loo faapea ona tutu mai ai se tagata na o ia i apitagalu o le Sami o Kalilaia ma valaau mai ma le filemu ia i tatou: “Mulimuli mai ia te a’u.”

E faigofie lava ona le paleni o tatou olaga. Ou te manatuaina ni tausaga sa matuai luitauina ai a’u. Sa faasolo ina ua toafitu le fanau i lo ma aiga. Sa avea a’u ma se fesoasoani i se au epikopo ona sosoo ai lea ma le tuuina mai o le valaauga paia e avea ai ma epikopo o le matou uarota. Sa ou taumafai e faafoe le matou pisinisi lea sa manaomia ai ni itula uumi i aso taitasi. Ou te faamalo i lo’u toalua lelei o le sa ou mafaia ai pea ona auauna atu i le Alii.

Sa tele mea e faia nai lo le taimi sa mauaina. Nai lo le ositaulagaina o mea e sili ona taua, sa ou fuafua ai ou te alapo lava, vaai le pisinisi, ona faaalu lea o le taimi o loo manaomia e avea ai ma se tama ma se tane lelei, ma se tagata faamaoni o le Ekalesia. Sa le’i faigofie. Sa i ai taeao e pe ai le uati tatagi lea ou te pulapula matatasi a’e ma faataupupula atu i ai, ma faatalitali pe a tuai ona uma ona tatagi.

Ae ui i lea, sa alofa ma fesoasoani mai le Alii ia te a’u ia maua le malosi ma le taimi e faia ai mea uma ua ou tautino atu e fai. E ui lava sa faigata, ae ou te le’i faanoanoa lava i le faia o le faaiuga ina ia gauai atu i le valaau a le Faaola ma mulimuli atu ia te Ia.

Mafaufau i le aitalafu o loo tatou nofo aitalafu ai ia te Ia. O Iesu o le toetu ma le ola: o le faatuatua ia te [Ia], e ui lava ina oti, ae ola lava ia.”⁴ E i ai i latou o loo tele le tamaoaiga, ae peitai ua latou tuuina atu mea uma ina ia faaopoopoina ai ni nai tausaga, masina, po o ni aso i o latou olaga faaletino. O a mea e tatau ona latou naunau e tuuina atu mo le ola e faavavau?

E i ai i latou o loo tuuina atu mea uma ina ia latou maua ai le filemu. “Ia outou o mai ia te a’u, o outou uma o e tigaina ma mafatia i avega,” na aoao mai ai le Faaola, “o a’u foi e malolo ai outou.”⁵ Ae ua le na o le filemu lea na folafola mai e le Faaola ia i latou o e tausia Ana poloaiga ma tumau e oo i le iuga, ae o le ola e faavavau, “o le meaalofa sili lea i lo meaalofa uma a le Atua.”⁶

Talu ai ona o le Faaola , o le a tatou ola ai e faavavau. O le tino ola pea o lona uiga tatou te le toe oti. Ae, o le ola e faavavau o lona uiga o le ola e faavavau i nofoaga faaeaina i le mafutaga faatasi ma i latou o e pele ia i tatou, lea e siomia i le alofa e le mavae, o le olioli silisili, ma le mamalu.

E leai ni tupe e mafai ona faatauina lea tulaga faaeaina. O le ola e faavavau o se meaalofa mai le Tama Faalelagi na ofoina fua mai ia i latou uma o e faalogo ma usitai i le valaau a le Tagata o Kalilaia.

Ae o le mea e faanoanoa ai, e toatele naua ua noanoatia i o latou upega ma ua le gauai atu ai i le valaau. Na faamalamalama mai e le Faaola e faapea, “A ua outou le talitonu mai lava outou, aua e le ni a’u mamoe outou… . O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te a’u.”⁷

E faapefea ona tatou mulimuli i le Faaola? E ala i le faatinoina o le faatuatua. E ala i le talitonu ia te Ia. E ala i le talitonu o loo fetalai mai pea se Atua alofa i tagata i le lalolagi i aso nei.

Tatou te mulimuli i le Faaola e ala i le salamoina o a tatou agasala—e ala i le oo i le faanoanoa ona o a tatou agasala ma lafoaiina ai.

Tatou te mulimuli i le Faaola e ala lea i le ulu ifo i le vai o le papatisoga ma mauaina se faamagaloga o a tatou agasala, e ala i le mauaina o le meaalofa a le Agaga Paia ma faatagaina lena aafiaga e musuia, aoao, taiala, ma faamafanafanaina i tatou.

Tatou te mulimuli i le Faaola e ala lea i le ulu ifo i le vai o le papatisoga ma mauaina se faamagaloga o agasala, e ala i le mauaina o le meaalofa o le Agaga Paia ma faatagaina lena aafiaga e faatonu, taitai, ma faamafanafanaina i tatou.

E faapefea ona tatou mulimuli i le Faaola? E ala i le usiusitai ia te Ia. Ua tuuina mai e Ia ma lo tatou Tama Faalelagi ia poloaiga—e le faasala pe faatigaina ai i tatou—ae ina ia fesoasoani ia i tatou ina ia tatou maua se olioli e faavavau, e le gata i lenei olaga ae mo le faavavau o le a oo mai, o lalolagi ia e leai ni iuga.

Pe a faatusatusa i ai, afai tatou te taofiofi mamau pea i a tatou agasala, faapea o tatou tuinanauga, ma o nisi taimi ua tatou manatu ai o o tatou tiute ia; e teena ai le mafutaga a le Agaga Paia; ma tuuese ai afioga a perofeta, ona noanoatia ai lea o i tatou i o tatou lava upega ma taofia ai i tatou mai le mulimuli atu i le Faaola. O le a tatou iloaina ai le le mafai ona tatou tuueseina o na noataga ae mulimuli atu i le Keriso soifua.

Ae, o loo valaau mai le Leoleo Mamoe ia i tatou uma i lenei aso. Pe o le a tatou iloaina ea le siufofoga o le Alo o le Atua? Pe o le a tatou mulimuli ea ia te Ia?

Pe mafai ona ou tuuina atu sina upu lapatai? E i ai i latou o e o loo lagona e faapea afai tatou te mulimuli i le Faaola, o o tatou olaga o le a saoloto mai le popole, tiga, ma le fefe. E le o lena! O le Faaola lava Ia na faamatalaina o se tagata o faanoanoaga.8 O na uluai soo o e na mulimuli atu i le Keriso sa latou feagai ma sauaga ma faigata e tele. E le’i aloese mai ai foi ia Iosefa Samita. E oo lava foi i uluai Au Paia, o le tispenisione mulimuli. Ma e leai foi ma se eseesega i aso nei.

Sa ou maua se avanoa taua lava e talanoa ai ma se tamaitai o le sa faalogo i le valaau a le Faaola ina ua 18 ona tausaga. O lona tama, o le sa avea ma se taitai mautofi i se isi ekalesia, sa matuai ita lava ia te ia ma faasa ona papatisoina o ia. Na faailoa atu e lona tama ia te ia e faapea afai e avea o ia ma se tagata O le Ekalesia a Iesu Keriso o le Au Paia o Aso e Gata Ai, o le a tuliesea o ia mai le aiga.

E ui lava o le osigataulaga e maoae, ae sa faalogo lava ma usitai lenei tamaitai talavou i le valaau a le Faaola ma ulu ifo ai i le vai o le papatisoga.

Ae peitai, sa le’i taliaina e lona tama lana faaiuga, ma sa taumafai e faamalosi o ia e lafoai i lona talitonuga fou. Sa matuai faitioina o ia e ona matua i lana faaiuga e avea ma se tagata o le Ekalesia ma sa poloaiina malosi o ia ina ia teena ma lafoai lona talitonuga fou faalelotu.

E ui lava i le ita, o le tiga, ma le faalumaina, ae sa tumau pea lona faatuatua ma le malosi. Sa ia onosaia ia upu ma lagona tiga sa ia oo i ai ma lona iloaina ua ia faalogo ma usiusitai i le valaau a le Faaola ma o le a ia mulimuli ia te Ia e tusa lava po o le a le taunuuga.

Na iu lava ina ua maua e lenei tamaitai talavou se mapusaga, o se nofoaga e mapu i ai i se aiga lotu e mamao ese mai le taufaamata’u ma le agaleaga o lona tama.

Sa ia feiloai atu i se alii talavou faamaoni ma sa faaipoipoina i laua e toalua i totonu o le malumalu, ma mauaina ai faamanuiaga silisili e maua i se faaipoipoga faalemalumalusa.

O le taimi nei o loo tutu faatasi ai o ia ma le anoanoai o i latou o e na ositaulagaina mea e tele ina ia mulimuli ai i le valaau a le Faaola.

Ioe, ou te le o fautua atu faapea o le a faigofie le ala. Ae ou te tuuina atu ia te outou la’u molimau e faapea o i latou, o e e tuua o latou upega i le faatuatua ma mulimuli atu i le Faaola o le a latou mauaina le olioli e sili atu nai lo le mea e gata mai ai lo latou malamalama.

A o o’u feiloai atu i tagata lelei o lenei Ekalesia—o e talavou ma e matutua—e uunaiina lava a’u ma faatumulia i le loto faafetai mo le faamaoni o i latou o e na faalogo atu i le valaau a le Faaola ma mulimuli atu ia te Ia.

Mo se faataitaiga, o se tagata galue i uamea sa mulimuli atu i le Faaola i aso uma, mo se vaitaimi e silia ma le onosefulu tausaga, na te aveina a’e i fafo ana tusitusiga paia ma faitau i le taimi o malologa a o taufaifai atu i ai ana uo faigaluega. O le tina ua oti lana tane e 70 tausaga le matua ma sa fealuai i le nofoa faataavalevale, ma e soo se tasi lava e asiasi atu i ai, e na te faafiafiaina o latou agaga ma e le mafai ona galo ia te ia ona ta’u atu ia te i latou lona faamanuiaina tele i le mulimuli ai i le Faaola. O le tamaitiiti o le na te saili i le tatalo ina ia talanoa ai ma le Matai o le atulaulau, ua mulimuli i le Faaola. O le tagata mauoloa o le na te foai atu ma le matamau i le Ekalesia ma ona uso a tagata, ua mulimuli i le Faaola.

E faapei ona tu Iesu le Keriso i apitagalu o le Sami o Kalilaia i le 2,000 tausaga talu ai, o loo faapena foi ona tu o Ia i le taimi nei ma tuuina mai lava le valaau lea e tasi na ia tuuina atu i na faifaiva faamaoni, ia i latou uma o e o le a faalogo i Lona siufofoga: “Mulimuli Mai ia te A’u!”

O loo i ai o tatou upega e ao ona vaavaaia ma upega e ao ona fonofono. Ae a valaau mai loa le Matai o le sami, lalolagi, ma le lagi ia i tatou, “Mulimuli mai ia te a’u,” e tatau loa ona tatou tuuese upega lavelave o le lalolagi ae mulimuli atu i Ona tulaga aao.

O’u uso e ma tuafafine, ou te folafola atu ma le leo o le olioli ua toefuataiina mai le talalelei! Na tatalaina le lagi i le Perofeta o Iosefa Samita ma na ia vaai ma fagatua ai ma le Atua, le Tama, ma Lona Alo, o Iesu Keriso. O le taitaiga mai le lagi ma aoaoga mai tagata paia, na toefuataiina mai ai upumoni i tagata!

O loo soifua i o tatou aso se perofeta ofoofogia o le o loo faaopoopo atu i aso uma lana molimau i nei upu moni paia. O loo tulai ia Peresitene Gordon B. Hinckley i lona tofi paia e avea ma fofoga taumomoli o le Atua faavavau. O loo i ona tafatafa ona fesoasoani mamalu faapea le Korama a Aposetolo e Toasefululua o Korama a Fitugafulu, ma le faitau miliona o le au paia i le lalolagi atoa e fesoasoani atu ia te ia, e tofu ma lona leo e faaopoopo atu i le folafolaina o lenei tala fiafia mamalu ma le olioli: o le talalelei e faavavau ua toefuataiina mai i tagata!

O Iesu o le Keriso “o le ala, o le upu moni, ma le ola: e le alu atu lava se [tasi] i le Tama, pe a le ui mai atu ia te [Ia].”⁹ I le avea ai ma se molimau faapitoa ia te Ia, ou te molimau atu ia te outou i lenei aso o le a oo mai le taimi e vaavaai atu ai alii, tamaitai, ma fanau uma i fofoga alofa o le Faaola. O lena aso, o le a tatou iloa ai ma le mautinoa le aoga o la tatou faaiuga ina ia tatou mulimuli loa ia te Ia.

Ia mafai e i tatou uma taitoatasi ona faalogo i le valaau a le Faaola ma tuu loa a tatou upega lavelave ae mulimuli atu ma le olioli ia te Ia, o la’u tatalo lea ma le faamaoni i le suafa o Iesu Keriso, amene.