E Le Mafai ona Tupu ia te Au

O’u uso pele ole perisitua a le Atua, o le tiutetauave o le lauga atu ia te outou i lenei po, e lofituina. Sa ou tatalo mo ni musumusuga ma se taitaiga, ma e ou te faamoemoe o le a outou malamalama.

O se tasi o talatuu tele o le olaga, o le taimi e mafaufau ai tagata e leai se isi e toilalo ai. Ua toatele naua ua mafaufau o i latou e u’amea, e lava lo latou malosi e tatalia ai tofotofoga. Ua latou faaseseina i latou lava i mafaufauga, “E le mafai ona tupu ia te au.” Ou te fia nonoina mai se mafaufauga mai ia Bertrand Russell e faapea, “Ua pei lava i tatou uma o le pipi, e faamoemoe na ona ala a’e lava i le taeao o le Aso Faafetai ma ‘ai loa lava le ‘aiga o le aoauli e pei ona masani ai. E mafai ona faaletonu mea i soo se taimi.”¹ Uso e, “e” mafai ona tupu i soo se tasi o i tatou i soo se taimi. O le tele lava o a tatou mea e fai i le olaga, e uunaia e ‘au, ua na o sina vaega tatou te vaai i ai.

Sa masani ona faamatala e Peresitene Charles W. Penrose le tala i se alii ofisa o le vaa tele o le Titanic, sa faapea, sa leai se popole o le auvaa i “Se Atua, tagata po o le tiapolo,” aua na matua mausali le fauina o le Titanic ma ua faigofie ona tatalia se fetauiga ma isi vaa, po o se fesootaiga ma se isi lava malosiaga, e aofia ai oga’aisa tafetafea.² O le mea moni, o le Titanic, e tusa ma le umi o ni malae lakapi se tolu, e 12 fogafale le maualuga, ma ua fausia i u’amea aupito sili ona lelei. I lena po matautia o le aso 14 o Aperila, 1912, sa lapataia ai isi vaa e uiga i le ‘aisa o i luma. Ae na faaauau pea le saosaoa o le Titanic, ma alu atu ai i le atoa i le Vasa Atelani malulu. E oo ifo i le taimi na vaaia ai e le tiute le oga ‘aisa o loo tafetafea, ae ua tuai. Sa le mafai ona toe vave liliu ese mai ai le Titanic, ma sa tipia e le oga ‘aisa le itu taumatau o le vaa, ma pupu solo ai. E lua itula ma le 40 minute mulimuli ane, ae magoto ifo le Titanic fou i le alititai o le vasa. E silia ma le 1,500 tagata na malelemo ai.

E masani lava na o le tasi vaevalu o se oga’aisa tafeafea e manu i luga o le sami. O le aisa i le totonugalemu o le malulu, e matua maopoopo lelei, ma o le fitu vaevalu o le oga’aisa e i lalo o le sami. E faapei ona fetaia’i le Titanic ma oga’aisa tafetafea, e faapena foi i tatou. E mafai ona tatou vaaia na o se vaega o le tulaga matautia o loo i luma.

E tumu le talafaasolopito i faataitaiga o tagata sa talenia ma latou mafaia, ae o sina taimi itiiti e vaivai ai, latou te lafoai ai o latou olaga faamanuiaina. O le Tupu o Tavita o se faataitaiga matautia lea. I lona taulealea, sa aulelei, toa, ma tumu i le faatuatua. Sa ia fasiotia le sauai taufaafefe o Koliata. Na avea o ia ma tupu. Sa ia maua mea uma e ono manao i ai se tagata. Ae, ina ua ia vaai ia Patisepa, sa ia manao i ai, e ui lava o le ava a se tasi tagata. Na poloaiina e Tavita ina ia auina atu le tane a Patisepa, o Uria le sa Heti, ia tuu i le tina’au o le taua aupito sili ona vevela, ina ia fasiotia ai. Sa oti Uria i le taua ona faaipoipo ai lea o Tavita ma Patisepa. O se taunuuga la o lenei faiga faatiapolo, sa aveesea le tofi faaleagaga o Tavita.³ O mea lelei uma lava na faataunuuina e Tavita, o le tele lava sa faaleaogaina ona ua ia faamatuu atu ia lava, i se sese matuia faaletagata.

Sa ou faalogo i se tagata o fai i ona atalii, “E mafai ona ou aveina le taavale e latalata i le si’ui nai lo outou, aua e tele atu lo’u poto masani nai lo outou.” Sa ia manatu o ia na te pulea, ae na le manatu o ia i le matautia moni o lea tulaga. “O le faalavelave o le faaaoga o le poto masani e fai ma taiala, e masani ona fai muamua suega faaiu ona faatoa sosoo ai lea ma le lesona!”⁴ E manatu nisi tagata o lo latou matutua ma le poto masani, e sili atu ai ona latou mafaia ona tatalia tofotofoga. E sese lea mea.

Ou te manatua le faamatalaina e Peresitene J. Reuben Clark Jr. o le taimi na alu ai se evaga a se tasi o lana fanau. Sa ia fai atu ia i la’ua e foi mai i le fale i se taimi patino. “Ona o le faalii i le vave fai mai o lena faamanatu faisoo, sa tali atu ai le teineitiiti, ‘Papa, o le a le mea ua tupu, e te le faatuatuaina au?’

“Atonu ai na faateia foi i lana tali. Na ia fai atu, ‘E leai [lo’u afafine], ou te le faatuatuaina oe. Ou te le faatuatuaina foi au lava ia.’”⁵

Ina ia “le mafai ona tutupu nisi o mea matautia ia i tatou,” ou te fautua atu ina ia tatou aoao mai le apoapoaiga a Peresitene Spencer W. Kimball: “Ia atina’e le pulea o oe lava ia, ina ia saga faateleina, ia e le tau faia ai se faaiuga ma toe tau filifili foi po o le a le mea e te faia pe a oulua feagai ma lea lava tofotofoga e tasi i lea taimi ma lea taimi. E ao lava ona tasi lau faaiuga e fai mo nisi o mea. O se faamanuiaga tele le saoloto mai i le saga tiga pea i se tofotofoga. O le faia o lea mea e alu ai le taimi, ma e matua lamatia ai lava foi.”⁶

Atonu e fetuutuunai e se tasi ma mafaufau, “Na o se tasi lava sina inumaga o fualaau oona o le a le ou le afaina ai.” Atonu e foliga e le afaina, ae faamolemole ia e iloa le malolosi tele o fualaau oona. O le tala lenei a se tasi sa faaaogaina: “E leai se isi na te pulea fualaau oona. Latou te pulea oe. O le taimi muamua, e masani lava e te le lagonaina se mea. Ae o le taimi lena ua pulea ai oe e fualaau.”⁷

“Na o se tasi lava se sikareti—na o lo’u fia iloa lava pe faapefea.” Ae ia e faaeteete i le tulaga matautia lena e tolotolo mai ai. O le nikotini e ese le aati.⁸ Pe na o le fa lava ni nai sikareti e ono mafai ai ona avatu se tasi … i le ala e avea ai ma tagata ulaula e le aunoa.⁹

“Na o se tasi lava se apa pia.” Tatou te le ma iloa le vave o lo tatou faavalea i meainu malolosi, ae e masani lava ona sosoo le meainu e tasi ma le isi. E sili atu ona lelei, le aua lava nei e taliaina lena meainu muamua. Ona e iloa ai lea, o le a le toe taitaiina lava oe i nisi.

“Na o se tasi lava se pepa o le loto ou te faatauina.” E sili atu ona faatogafiti lea nai lo isi ma’ivalea. Atonu e te manatu e le o se ma’ivalea le taalo faitupe, aua e le o se mea o tuu i totonu o le tino, ae e pei ona tusia e se tasi talu ai nei, “O i latou e auai i taaloga faitupe, e sili atu i le na o tupe ua lamatia ai. Ua lamatia ai foi ma o latou ola ma aiga.”¹⁰

“Na o sina autilo tasi lava i se tuatusi o mea inosia i le Initoneti, po o sina tepa vave i se ata o gaugau i se mekasini faatosina lagona malolosi.” E foliga mai e matua le afaina lava lena mea, ae e sili atu ona faigata ona aveese mai o tatou mafaufau mea tatou te vaai i ai, nai lo mea tatou te tuuina i totonu o o tatou tino. O le toatele o tagata ua faia soo faiga faasolitulafono, ua latou tautino maia, na latou amata faia ia solitulafono i le matamata i ata e faaosofia ai lagona malolosi.

Atonu e faapea mai nisi, e lelei lava faafiafiaga e le talafeagai i nisi taimi. Peitai, e tele taimi tatou te lolo atu ai i uiga malolosi, o sootaga le tonu o feusuaiga, o upu masoa, ta’u fua o le suafa o le Atua, ma isi mea faatiapolo.

Ua umi ona ou tautala atu i mea tou te le mananao e tutupu mai ia te outou. Sei o tatou manatu nei i ni mea lelei tou te mananao e tutupu ia te outou. Afai tou te naunau e totogi le tau o le manumalo, e mafai ona tutupu mea lelei ia te outou, e oo foi ina sili atu nai lo miti faamama’i ma mea na faamoemoeina! E masani ona tatou le iloa tulaga e mafai ona tatou oo i ai ma faataunuuga i lenei olaga ma le faavavau aua, e faapei ona fai mai le Aposetolo o Paulo, “Ua tatou vaavaai faanenefu i le faaata.”¹¹ Peitai, e mafai ona faamalamalamaina la tatou vaaiga faaleagaga, ma matua manino ai e ala i le uunaiga a le Agaga Paia. Sa folafola mai e le Faaola o le Fesoasoani, o le Agaga Paia lea, o le a “aoaoina outou i mea uma lava,” ma “faamanatua ia te outou mea uma,”¹² ma “taitai ia te outou i upumoni uma.¹³

E ao ona tatou manatua, o a tatou meaalofa faanatura uma ma tomai e i ai ona tuaoi, ae a faateleina i le musumusuga a le Agaga Paia, ona saga faateleina ai lea o mea tatou te mafaia. Tou te manaomia le fesoasoani mai se mana e i luga atu o lo outou malosi, e faia ai ni mea e sili atu ona aoga. O outou na alii talavou, e mafai ona maua avanoa ma maua faamanuiaga, e sili atu nai lo mea tou te moemiti ma faamoemoe i ai. Atonu tou te le umia ni tulaga lauiloa po o se tamaoaiga tele i le lumanai, ae e mafai ona avea o se mea e sili atu ona tumau ma faamanuiaina. Ia manatua, o mea tatou te faia i le olaga, e oo atu ona siuleo i le faavavau.

O nisi o outou alii talavou, atonu e le i maua se molimau malosi o le amataga paia o lenei Ekalesia, pei ona maua e o outou matua. Atonu tou te moomoo, maimau pe ana ua outou talitonu atili na vaai tino Iosefa Samita i le Atua ma Lona alo, o Iesu Keriso, ma pe na faaliliu moni foi le Tusi a Mamona mai papatusi auro. Atonu o i ai lava ni nai toega o le le talitonu i le tulafono o le sefuluai, le tulafono o le legavia, po o le Upu o le Poto. E le o se mea fou lea i nisi o tupulaga talavou o lo outou vaitausaga. Atonu e le i tofotofoina atoatoa lo outou faatuatua. Atonu tou te le i oo i se taimi tou te puipuia ai o outou talitonuga po o ituaiga olaga e ola ai. Ou te tautino atu e mafai ona tutupu mea tetele ia te outou. E mafai ona outou mauaina se molimau e le maluelue, o le Ekalesia lenei a Iesu Keriso, ma na toefuataiina mai le talalelei i le fogaeleele i lona atoatoa, e ala mai ia Iosefa Samita. Ae e le mafai ona oo mai lena molimau, sei vagana ua tofotofoina lo outou faatuatua.¹⁴

I le tele o tausaga ua mavae, na tofia ai e ni Pulega Aoao se toalua, se taulealea talavou tele e avea ma peresitene fou o se siteki. O le tali atu a le peresitene fou o le siteki, na ia fai atu ai o le a ia tuuina atu lona loto atoa i lona valaauga, ma o le a ia le fai atu lava i se isi tagata o lana siteki ina ia sili atu lona faamaoni nai lo ia. Ona ia tuuina atu lea o lana molimau, ua ia talitonu ma lona loto atoa i le talalelei, ma ua ia fuafua e ola ai.

I se taimi mulimuli ane i le taumafataga o le aoauli, sa fesili atu ai le Au Pulega Aoao i le peresitene fou o le siteki pe sa ia matua iloaina e moni lenei talalelei. Sa ia tali ane e leai. Sa saunoa atu le aposetolo sinia i le isi uso a aposetolo, “Na te iloa lelei lava e faapei foi ona e silafia. Na pau le mea na te le o iloaina, ua ia iloa. E le o toe mamao ona ia iloa lea… . E leai se mea e te popole ai.”

I se taimi mulimuli ane, sa tautino atu ai e le peresitene fou o le siteki, ina ua mavae se aafiaga faaleagaga, “Sa maligi ou loimata o le loto faafetai i le Alii mo le molimau mausali, atoatoa, ma le mautinoa, na oo mai i lo’u olaga e uiga i le paia o lenei galuega.”¹⁵

E toatele i tatou e le o iloa atoatoa, mea ua tatou iloa moni. E ui lava ua aoaoina i tatou e le talalelei, ae atonu e le o atoatoa ona tatou iloa mea na tuuina e le Alii “i totonu o i tatou” ma tusia ai “i o tatou loto.”¹⁶ O outou o alii talavou o le feagaiga, o suli outou mo nei folafolaga sili. Ua ia te outou le avanoa e avea ai ma ni e e sili atu nai lo “e fai fafie ma e utuvai.”¹⁷

Ou te le fai atu ua ou malamalama a’ia’i i mataupu faavae uma o le talalelei, ae ua ou iloa ma le mautinoa le paia ma le pule o lenei Ekalesia. Na faasolosolo malie ona oo mai ia te au i lea fuaiupu ma lea fuaiupu, o lea mataupu ma lea mataupu. Ua ou iloa nei, ua ou iloa, e faapei lava foi ona mafai ona e iloaina ua e iloa. E mafai ona tutupu ia te outou.

O le malamalama e maua mai le faatuatua. E tatau ona tatou iloa i lenei vaitaimi, le moni o mea sa i ai i papatusi auro, e aunoa ma le vaai i ai. E le o i ai nei ina ia tatou vaai i ai ma fetagofi i ai, e faapei ona faia i Molimau e Toatolu, ma Molimau e Toavalu. O nisi o i latou sa vaai tino i ai ma fetagofi i na papatusi auro, e le i tumau lo latou faamaoni i le ekalesia. O le vaai i se agelu, o se aafiaga tele lea, ae e sili atu le i ai o se malamalama i le paia o le Faaola e ala i le faatuatua ma le molimau a le Agaga.¹⁸

E mafai foi ona e iloa o mea sa e iloaina a o avea ai ma atalii lototoa o le Atua i le muai olaga. E mafai ona tupu ia te oe. Ae e le mafai ona otometi lona tupu mai. E tatau ona faaaoga lou faatuatua. Na pau le ala e maua ai le malamalama faaleagaga ma faamumusaesae ai, o le lotomaualalo, loto tatalo, ma taumafai ma le filiga e tausia poloaiga uma.

I le amataga o sauniga o le faaiuga o Taaloga o le Olimipeka o le Taumalulu e 2002 na sei mavae atu nei, i le Aai o Sate Leki, na saunia ai e le Aufaipese a le Tapeneko ma le Faaili Tele a Iuta se pese maoae mamalu na tusia e John Williams, aemaise lava na avea ma autu faamusika aloaia o Taaloga. Sa faaigoaina o le “Valaau mo Siamupini.” O le po nei, ou te fia faia se valaau mo siamupini. O upu faamomoi loto o lenei fatuga o le: citius (saosaoa atu), altius (maualuga atu), ma le fortius (malosi atu), ia na avea ma mau aloaia o le Olimipeka talu mai le 1924.

Uso e o le perisitua, ua tatou ola nei i se taimi ofoofogia. E le i ai se taimi o le talafaasolopito o le Ekalesia, na tele atu ai ni molimau o le moni o lenei galuega paia. E i ai e o ita mai ma faitioina i tatou, e pei ona i ai e le aunoa. Ae e le i i ai se taimi ua maualuga atu ai le a’e a le Ekalesia, ma saosaoa atu, pe malosi atu foi, e faataunuuina lana misiona. O le taimi lenei e ao ai ia te i tatou uma ona aapa atu i luga ma agai i luma. O le galuega foi a le Atua, e tatau ona tatou saosaoa atu, ia galulue ia sili atu ona faanatinati; ia maualuga atu, ia taumafai mo sini maualuluga faaleagaga, ma le faalagolago i le malosi o le Atua. E mafai ona tutupu ia te outou.

O le ala mautinoa tou te maua ai le olioli ma faamanuiaga o le olaga, o le mulimuli lea i lo tatou peofeta, o Peresitene Gordon B. Hinckley. Ua tele naua mea lelei ua tatou maua mai o tatou perofeta i aso ua mavae, peitai, o le siufofoga o Peresitene Hinckley lea e tatau ona tatou faalogo i ai i le taimi nei, e ao ona tatou mulimuli i ana apoapoaiga ina ia mafai ai ona tutupu mea silisili ia i tatou. Ou te molimau atu ai i nei mea, i le suafa o Iesu Keriso, amene.