Susan Winder Tanner
Peresideni Rahi o te Feia Apî Tamahine

I tavini na oia i roto i te paroita e te tĭtĭ i roto i te Paraimere, te Feia Apî Tamahine, e te Sotaiete Tauturu, e ua ite o Susan W. Tanner i te tu’atiraa i rotopu i teie mau faanahonahoraa.

« E haapii te mau tamarii tamahine i te himene ‹E Tamarii Au na te Atua.› I muri mai i te reira e riro mai ratou ‹E tamahine matou na to matou Metua Here i te Ao ra, tei here ia matou, e ua here matou Iaʼna.› I muri mai i reira e ô ratou i roto i te ‹ore roa te aroha e mou›, e ite matou e ua puohuhia matou i te here », o taʼna ïa parau. « Ia manaʻo vau te vaira te hoêraa i roto i na faanahonahoraa nei, te hiʻoraa rahi e te rave’a a tupu ai matou. »

Ei peresideni rahi no te Feia Apî Tamahine, ua hinaaro te tuahine Tanner ia parau e na roto i te tautururaa i te feia apî tamahine e maramarama ai ratou i to ratou tiʻaraa i roto i te faanahonahoraa a te Metua Here i te Ao ra.

Fanauhia i te 10 no Tenuare 1953 i Granger, Utaha, i na metua o Richard W. e o Barbara Winder, ua paari mai te tuahine Tanner i roto i te hoê faaamuraa puaatoro. Ua roaa taʼna parau tu’ite i te Fare Haapiiraa Teitei no Brigham Young, i reia toʼna farereiraa ia John S. Tanner. Ua faaipoipohia raua i roto i te Hiero no Salt Lake City i te 3 no setepa 1974. Ua riro mai te tuahine Tanner ei faataʻi piano e ei haapii i te ohipa utuafare. Te faaea nei o Tanner ma i Provo, Utaha, e e pae tamarii to raua e toru mootua.

A parahi ai toʼna utuafare i Beresilia, i reira hoʻi taʼna tane i te haapiiraa i te Haapiiraa Turuhia e te Hau Marite, ua tavini atu te tuahine Tanner i roto i te faanahonahoraa a te Feia Apî Tamahine. Ua haapii ta raua na tamahine paari i te parau a te Feia Apî Tamahine na roto i te reo Potiti. « Ua hinaaro atoa vau i te haapii na muri ia ratou. » « A haamata ai au i te tamau aau i te parau, ua ô roa tera parau i roto iaʻu. E tamahine au na te Metua Here i te Ao ra, e ua here Oia iaʻu. E no te mea ua ite au i te reira, ua here roa vau Iaʼna e ua hinaaro vau ia faaite na roto i taʻu mau ohipa e ua here au Iaʼna.

« Te reira te parau poroʻi a te Feia Apî Tamahine, toʻu noa hinaaro oia hoʻi ia ite te feia apî tamahine o te Ekalesia e nehenehe te reira e riro ei niu no to ratou mau iteraa papu, e ta ratou mau ohipa, e to ratou mau oraraa. »