Na iTuvaki ni Lotu

Kemuni na taciqu kei na ganequ, sa dua na ka totoka ni rawa me keitou vosa yani vei kemuni ki na veiyasa ivuravura. Keitou vosa tiko yani oqo vei kemuni ena Vale ni Koniferedi ena koro levu o Salt Lake. Keitou vosa tiko yani ena noda vosa vakaitaukei. Ia e lewe levu sara vei kemuni e soqoni tiko ena veivale ni Lotu ena levu sara na vanua, ka o ni rogoci keitou tiko ena 56 na veimataqali vosa.

Eda sa mai sota tale ena dua na koniferedi levu ni Lotu e vuravura me vaka na ka sa lewa na Turaga.

Ni da vakayacora tiko ena vuravura veilecayaki oqo. Sa ia tiko na veivaluvaluti kei na veileti. Sa levu na tiko yavavala. Era lewenivanua ena vuqa sara na veimatanitu na lewe ni matavuvale ni Lotu. Eda raica ni da tiko ena yasa ruarua ni dua na mata veivosaki levu. Au na qai vosa ena vuku ni ka oqo ena mataka ni mataka.

Ia ni sa tu oqo e matada na veimataqali leqa, au marau meu vakaraitaka ni cakacaka ni Lotu e sa toso tu ga. Sa toso cake tiko ga ena veiyasai vuravura. E sa toso tikoga na cakacaka ni kaulotu ka sega na ka me vakataotaka. Era sa toso tikoga mai ki na Lotu na curuvou, ka sa tosocake tikoga na keda iwiliwili. Me salavata kei na nodra sa curu tiko mai oqo ki na lotu me ra sa mai lomani ka vakaveikilaitaki sara vakavinaka. Keitou vakauqeti kemuni kece sara na lewe ni Lotu mo ni vukei ira na curuvou, ka tokoni ira me rawa ni ra mai vakaitaukeitaki. Vakalougatataki ira ena nomu vakaitokanitaki ira.Vakauqeti ira ena vakabauta. Raica me kakua ni dua vei ira me guilecavi. Na tagane, yalewa, kei na gone yadua ka sa bula dodonu me papitaiso sa na dodonu vinaka me mai karoni ka lomani ka me rawa ni tubu ena Lotu kei na kena veiitavi e dau qaravi.

Na iwiliwili ni tiko ena lotu ni sakaramede e sa toso cake sara. E tiko na ka me caka me rawa ni tosocake kina kau sa vakauqeti kemuni mo ni sa cakava sara tikoga ena veigauna kece. Oqo mada ga, au sega ni kila e dua tale na isoqosoqo Lotu me tautauvata na kedra iwiliwili vakapasede o ira era dau tiko ena veisoqoni kece sara.

Au sa vakavinavinaka sara vakalevu ena nodra dei tiko na itabagone ena Lotu. E ka toka ni rarawa ni so e sega ni dau vukei mai na parokaramu ni Lotu. Ia sa vaka na caka mana ni da raica na kaukauwa e tiko vei ira na itabagone ena maliwa ni veitemaki dukadukali ka sa wavoliti ira tu. Na rairai ca kei na dukadukali ni iyaloyalo vakasisila, na veitemaki ni vakayagataki ni waigaga ni veivakamatenitaki, na veisureti kamikamica me sa kau laivi kece na iyalayala ka tarova tiko na yalani ni veika e vakadonui ena veimaliwai ni tagane kei na yalewa, oqo e so na ka ni veitemaki dredre sara ka da sa sotava tiko ena veigauna kece. Sega ni wili kina na veivakayarayarataki ni vuravura era bula tiko kina, era dei voli ga ena vakabauta ka yavutaki mai vei tamadra kei na nodra lomana na kosipeli, ena sega beka ni veiganiti na veika vinaka meu na tukuna baleti kemuni na noda itabagone gugumatua.

Na vakabauta ni saumi ikatini kei na isolisoli ni lolo e sa tosocake sara, dina ga ni sa dredre mai na bula eda sa sotava tiko ena gauna oqo. E sa rawa tikoga ni da tosoya na noda tara valenilotu kei na valetabu, kei na ituvatuva ni qaravi vuli, vaka kina na veiitavi tale e so me qaravi ka na vakatau mai na ilavo ni Lotu ka rawa mai na ikatini. Au yalataka vei kemuni ni keitou na sega ni vakatara me dinau na Lotu. Keitou na cakacakataka na parokaramu me salavata kei na ikatini e dau soli mai ka vakayagataka na ilavo vakamareqeti oqo me baleta na inaki e sa virikotora mai na Turaga.

Au vakaraitaka mada na ka era sa vakavola tiko vakalevu na dauvolaitukutuku ena noda vanua. Oqo na neitou lewa me sa voli na veivale ka tu kina na veivanua ni volivolitaki ka tiko ena ceva ni Temple Square.

Keitou vakila ni sa neitou itavi bibi sara me keitou taqomaka na veivanua ka koto volekata na valetabu e Salt Lake. E taukena na Lotu e dua na iwase ni vanua levu ka tiko kina na vanua ni volivoli. Eratou sa vakaraitaka na itaukei ni vale na nodratou gagadre me ratou sa na volitaka. Na vale ena gadreva e dua na veivakavoui ka na sau levu sara. Keitou vakila ni na ganita me na caka e dua na ka me na vaqaqacotaka tiko na vanua ni veiqaravi oqo. Ia au via vakadeitaka raraba ki na Lotu ni na sega ni vakayagataki na ikatini me voli kina na veivale oqo. Ena sega talega ni vakayagataki me vakatorocaketaka me vanua ni veivoli.

Na ilavo me baleta na ka oqo e a vakau mai ka na rawa tiko mai na veibisinisi ka taukena tu na Lotu. Na uma ilavo oqo, vata kei na ilavo e rawa tiko mai na ilavo maroroi ena vakailavotaka na parokaramu oqo.

Au marau meu vakaraitaka ni sa rawa me da na tosoya tiko na kedra tara na valenilotu. E da tara tiko e rauta ni 400 na valenilotu ena dua na yabaki me na sotava na tubu cake tiko ni iwiliwili ni lewe ni Lotu. Oqo e dua na ka yaga ka totoka ka keitou sa vakavinavinaka sara ga kina vakalevu. Eda sa tosoya tale tikoga na tara valetabu ena veiyasai vuravura, ka marautaka na tukuna ni sa toso cake tale tikoga na iwiliwili ni veika e qaravi kina. Na itavi bibi oqo, baleti ira na bula kei ira sa mate, e dua na yavudei ni kosipeli i Jisu Karisito.

Keitou marautaka me keitou tukuna ni sa tubu cake tiko na vakavakarau vakamatavuvale. Na parokaramu oqo, ka sa vakavulici tiko mai na sivia na 60 na yabaki e vakarabailevutaka sara ga na noda taqomaki na Yalododonu Edaidai. Na veimatavuvale kece e tiko na dui nodra itavi me ra na rawata kina na veika me baleti ira. Keitou sa vakadreti kemuni tale yani mo ni lako laivi mai na bula ena dinau, me ra vakavukutaka na nodra vakayagataki ilavo, me dau maroroi vakatikitiki e dua na iwase ni ilavo me baleta na leqa vakasauri. Keitou vakasalataki kemuni yani na noda mo ni qaqarauni ena veisasaga ni “vutuniyau vakasauri” kei na so tale na sasaga ka rawa ni rawai ira era dau rawai wale tu ga vakarawarawa.

Au sa dau vakadrukai ena levu ni qaravi itavi sega ni saumi era dau solia na noda. Au sa vakadeitaka ni qaravi itavi sega ni saumi sa ikoya na sala e gadreva na Turaga me qaravi kina na Nona cakacaka. Na cicivaki ni tabanalevu kei na iteki vakakina na kuoramu, kei na qaravi ni veimataisoqosoqo, era toso kece tiko ena nodra veiliutaki na dauqaravi itavi sega ni saumi. Na parokaramu ni veivakalotutaki e sa vakararavi sara tu ga ki na qaravi itavi sega ni saumi.

Me kena ikuri, era tiko qo vei keda e dua na iwiliwili levu ni daukaulotu era sa qase cake sara ka ra qaravi itavi tiko ena loma ni Lotu. E sivia na 18,000 era solia kece na nodra gauna se dua na iwase levu ni nodra gauna ena qaravi ni itavi oqo. Keitou sa vakavinavinakataka na nodra dina ni qaravi itavi.

Na koniferedi oqo e sa vakananumi kina na ikarua ni yabaki ni Perpetual Education Fund (iLavo Vure ni Vuli). Au marautaka meu tukuna ni parokaramu oqo e sa toso vinaka sara tu ga ena gauna qo. E rauta ni 8,000 na cauravou kei na goneyalewa era sa vuli cakacaka tiko me ra vakatorocaketaka na nodra na rawa ka vakacakacaka. Na ivakatautauvata ni rua na yabaki ni nodra vuli, era sa tosoya cake na kaukauwa ni nodra rawa ka vakacakacaka ki na 400%. Sa veivakurabuitaki dina.

Ia meu na tomana tale mada. Sa na rauta mada ga meu tukuna, ni Lotu e sa koto ena dua na vanua vinaka sara. Au vakabauta ni kena cicivaki e sa qaravi sara tikoga vakavuku. O ira na noda era sa tubucake ena vakabauta, ena nodra lomana na Turaga ka talairawarawa ki na Nona ivakavuvuli.

Oqo e sa gauna dredre. Na veika vakailavo sa vorakitaki. Sa levu na veicoqacoqa e vuravura. Ia o Koya sa cecere e nanuma tiko na Nona yalayala ni na vakalougatataki ira era vakabauta ka bula savasava e matana.

Na kosipeli i Jisu Karisito sa ikoya na sala ni vakacegu. Kevaka eda sa vakamuria ena noda bula eda na qai vakalougatataki ka vutuniyau kina. Sa dua na ka totoka ni da vakaitavitaki ena cakacaka cecere oqo. Me da marautaka na isolisoli e soli mai vei keda. Me da sa veiqaravi ena marau.

Me nomuni na veivakalougatataki mai lagi, o kemuni na noqu itokani. Me tubu e yalomuni na vakabauta. Me kune ena nomuni vale na veilomani kei na vakacegu. Me tawa na nomuni teveli ena kakana kei na isulu me vauca na tolomuni. Me vakaceguya na yalomuni na loloma mai lagi ena gauna ni bula dredre. Oqo e sa noqu masu ena mataka nikua ni da sa mai dolava na koniferedi levu oqo, ena yaca tabu i Jisu Karisito, emeni.