Te hoê niniiraa rahi no te mau haamaitairaa

I Ketelani, i reira te taatoaraa o te toe‘a o te mau taviri no te autahu‘araa i horo‘ahia‘i, te na ô ra te Fatu : « E o te haamataraa teie o te haamaitairaa o te niniihia‘tu i ni‘a i te mau upoo o ta‘u mau taata ».¹ Te mauruuru nei au i teie mahana no te niniiraa rahi o te mau haamaitairaa tei tae mai i ni‘a ia tatou tata‘i tahi na roto i te autahu‘araa o te Atua. Na roto i te mana o te autahu‘araa i poietehia‘i teie ao e te mau mea atoa e vai ra, e tae noa‘tu ia tatou tata‘i tahi. Ua raraa-maitai-hia te autahu‘araa e o tatou i teie nei e o tatou i mutaa ihora.² Ei mau tamaroa e ei mau tamahine na te Atua, ua farii tatou tata‘ihoê i te mau hopoi‘a, e te mau ti‘araa hoê roa, e na roto i te mau haamaitairaa o te autahu‘araa, ua horo‘ahia mai ia tatou paatoa te hoa-apiti-raa aifaito, te mau horo‘araa e te mau haamaitairaa.

I te tau haapoheraa raau i ma‘iri a‘enei, ua bapetizohia ta maua mootua tamahine paari roa‘e, e ua haamauhia ei melo no te Ekalesia. I muri a‘e i to‘na fariiraa i te Varua Maitai, ua haamaita‘ihia to‘na tuahine apî roa‘e, e ua horo‘ahia te hoê i‘oa. Te ava‘e i muri iho, ua topahia te i‘oa o te tahi iho mootua tamahine apî e ua haamaitaihia‘tu. Mai te reira taime, ua feruri pinepine au i ni‘a i te mau maitai taa ê ta teie mau tamahine riirii e fana‘o nei no te mea e, ua faaho‘ihia mai te autahu‘araa a te Atua.

Te ti‘aturi nei au e tupu i te rahi ta maua mau mootua tamahine e te mau mootua tamaroa ma te ite e, aita ratou e riro nei, e aita roa‘tu ho‘i i riro na, ei mau tamarii mata‘ita‘i noa no te autahu‘araa. Te mau haamaitairaa o te autahu‘araa « e vai nei no te mau tane e no te mau vahine paatoa »,³ ua raraa-maitai-hia ïa e ati roa‘e to ratou oraraa. Ua haamaitaihia ratou tata‘i tahi i te mau oro‘a mo‘a, e ua nehenehe ia ratou tata‘i tahi ia fana‘o i te mau haamaitairaa o te mau horo‘araa pae varua na roto i te autahu‘araa.

Te mau melo haapa‘o atoa o te Ekalesia a te Fatu, ua haamaitai-aifaito-hia ïa na roto i te mau oro‘a o te autahu‘araa. Te oro‘a matamua⁴ i roto i te oraraa o te hoê tamarii e tupu ïa mai tei matauhia i te taime e mau aiu ratou, e a horo‘ahia ai te hoê i‘oa e te hoê haamaitairaa. Ia rae‘ahia te mau tamarii te matahiti ite i te haapa‘oraa, e bapetizohia ratou. Aita e faataa‘ehia te bapetizoraa no te mau tamaroa e no te mau tamahine. E ravehia hoê â huru oro‘a bapetizoraa no te hoê tamahine e no te hoê tamaroa o te bapetizohia i roto hoê â vahi bapetizoraa. I te taime e haamauhia te mau tamarii e a farii ai i te Varua Maitai, hoê â mana te horo‘ahia ia ratou tata‘i tahi. E farii ratou i te tautururaa a taua mana mo‘a ra na roto i to ratou haapa‘o e eiaha râ na roto i te tahi noa‘tu rave‘a.

Ei mau melo no te Ekalesia, ua aifaito tatou i mua i te Fatu a rave ai tatou i te oro‘a mo‘a. Na roto i to tatou faaroo ia Iesus-Mesia e te mana no To‘na taraehara i faati‘ahia no taua oro‘a ra, e nehenehe tatou paatoa e tatarahapa e ia riro ei feia maitai a‘e.

Ua aifaito tatou tata‘i tahi i roto i te parau no te fariiraa i te hoê haamaitairaa autahu‘araa ia ma‘ihia tatou e aore râ, ia hinaaro [tatou] i te patururaa hau atu no ô mai i te Fatu ra i roto i to tatou oraraa. Te hoê taure‘are‘a vahine o te hinaaro nei i te hoê haamaitairaa patereareha, ua aifaito noa to‘na ti‘araa ia ite i to‘na reni huaai e to‘na mau aravihi [e taleni] mai te ti‘araa o te hoê taure‘are‘a tane hoê â faito matahiti. Te mau haamaitairaa o te tae mai i roto ia raua tata‘i tahi na roto ia Aberahema, e mea puai roa ïa e te faufaa.

Te haapii nei tatou i te mau taure‘are‘a tane e te mau taure‘are‘a vahine ia faaineine no te haere atu i te hiero ia nehenehe ratou ia « farii i te mau haamaitairaa o [te] mau hui metua ia nehenehe [ratou] ia farii i te mau haamaitairaa teitei roa‘e o te autahu‘araa ».⁵ I te taime i farii ai hoê o ta‘u mau tamahine fetii [nièces] i to‘na oro‘a hiero tau ava‘e a‘enei, ua pii hua oia ma te oaoa : « Ua tae au ! I to‘u oraraa taatoa ua haapiihia vau no ni‘a i te faaineineraa no te hiero, e ua tae au ! »

Te mau tane e te mau vahine atoa e hinaaro nei i te tavini i te Fatu e tei ti‘a ia farii i te hoê parau faati‘a no te hiero, e rave ïa ratou i te hoê â mau fafauraa. E horo‘a i te taata tata‘i tahi « te mana no ni‘a mai ra ».⁶

Te Elder e te tuahine atoa tei farii i te hoê piiraa misioni, e faataahia ïa ratou no te rave i te ohipa a te Fatu, e e horo‘ahia ia ratou tata‘i tahi te mana no te poro i te evanelia a te Mesia.

Te hoê tane e te hoê vahine o te tomo i roto i te hoa-apiti-raa hope roa no te fafauraa faaipoiporaa hiero, e farii aifaito ïa raua i roto i te mau haamaitairaa o taua fafauraa ra mai te peu e haapa‘o raua.⁷ Ua parau na te Fatu e, e haamanahia ta raua fafauraa i muri a‘e i teie nei oraraa, e ia raua toopiti, ua fafauhia te mana faatere e te faateiteiraa.⁸

Te na ô ra te peresideni Ezra Taft Benson : « Ia haapa‘o ta tatou mau tamarii i te Fatu e ia haere i te hiero no te farii i to ratou mau haamaitairaa, e ia tomo i roto i te fafauraa no te faaipoiporaa, te tomo ra ïa ratou i roto i te hoê â faanahoraa no te autahu‘araa ta te Atua i haamau e o Adamu i te haamataraa ihoa ra ».⁹

Ua ite au i te mana faatere o te mau haamaitairaa autahu‘araa i te taime i hahaere ai au i te hoê utuafare te pohe atura te metua tane. Ma te haati ia‘na, tei reira ta‘na vahine e te mau tamahine nehenehe roa. I ni‘a i te papa‘i o taua piha ra, te vai ra hoê hoho‘a o te utuafare e aore râ te hiero. Ua faaite papû maira te metua vahine i to ratou mau haamaitairaa i te na oraa e : « Ua haapuaihia e ua paruruhia matou e ta matou mau fafauraa. E faaoroma‘i to matou utuafare e amuri noa‘tu. Te tia‘i nei te Fatu ia matou, e aita matou e vai otahi nei ». Te haamaitai- aifaito-hia nei te mau melo haapa‘o atoa na roto i te niniiraa rahi o te mau haamaitairaa ta ratou e farii nei na roto i te mau oro‘a autahu‘araa.

No te mea ua faaho‘i-faahou-hia mai te autahu‘araa, e farii aifaito te taatoaraa o te mau tamarii a te Atua i te mau haamaitairaa no te mau horo‘araa pae varua. Te horo‘a mai nei te Fatu i te mau horo‘araa pae varua no to tatou iho maitai¹⁰ e no te tauturu te tahi e te tahi.¹¹

Te parau nei o Moroni e, « e rave rahi te huru o te horo‘araa mai i taua mau mea maitatai ra, hoê râ Atua o te ohipa i te mau mea atoa i roto i te mau mea atoa ; e ua horo‘ahia ïa te reira na ta te Varua o te Atua faaiteraa mai i te taata atoa, ia maitai ratou.

« Inaha ho‘i, ua horo‘ahia mai e te Varua o te Atua i ta te tahi ra, ia haapii oia i te parau paari ra ;

« E i horo‘ahia mai e taua Varua ra ta te tahi ra, ia haapii oia i te parau ite ra ;

« E ta te tahi, o te faaroo rahi ïa, na taua Varua ra ; e ta te tahi ra, o te mana ïa ia faaora i te feia ma‘i, na taua Varua ra ».¹²

A tamata ai au ia haapii mai i te reo Paniola e a haamana‘o ai i te reo Potiti (ta‘u i ite i to‘u tamariiraa), ua pure au e ua ite au i te tautururaa a te Fatu a paraparau ai au i roto i taua mau reo ra. Ua faaroo vau i te feia faatere o te Ekalesia e te mau misionare i te faaiteraa i te mau iteraa papû puai roa i roto i te mau reo êê ta ratou i haapii rii noa mai nei. Ua ite au i te mau taata tei horo‘ahia te horo‘araa pae varua no te hoê varua ti‘aturiraa. Ia faaroo ana‘e ratou i te evanelia, e ta‘i te parau mau i roto i to ratou aau. Ua ite au e, ua horo‘ahia ia vetahi te horo‘a no te paari e aore râ, te faaohiparaa i te ite i roto i te parau-ti‘a. Ta te tahi ra, te ite no te faatupuraa i te mau semeio, ta te tahi ra te horo‘a ïa no te faaoraraa e ta vetahi ra te horo‘a ïa no te ite-papû-raa.¹⁸

I te taime e tamahine iti au, ua pohe-pinepine-hia vau i te ma‘i rarahi. Ua hinaaro tamau noa to‘u metua tane e ma te ti‘amâ ia faaohipa i te mana o te autahu‘araa ta‘na e mau ra no te haamaitai ia‘u. Tera râ, ua ite atoa vau e, ua amui mai te horo‘araa taa ê o to‘u mama i to‘u faaoraraa. E taleni mau to‘na i roto i to‘na aravihi no te faatereraa i to‘u mau hinaaro e ua tauturu ia‘u ia ora mai. To‘na faaroo rahi, e arata‘i te Fatu ia‘na ia pahono no ni‘a i te rapaauraa ma‘i, ua riro ïa ei tamahanahana no‘u. Aue au i te haamaitaihia ia farii i na metua toopiti tei faaohipa ma te here i ta raua mau horo‘araa pae varua.

Te parau ra te peresideni Wilford Woodruff e, « E maitai taa ê no te tane e no te vahine atoa i roto i teie basileia ia oaoa i te varua no te tohuraa, oia ho‘i te Varua o te Atua ; e no te taata haapa‘o, e faaite te reira i taua mau mea ra ei mau mea hinaaro-mau-hia no to ratou nahonahoraa e te tamahanahanaraa e no te arata‘i ia ratou i roto i ta ratou mau ohipa ».¹⁴

E faati‘a te mau haamaitairaa o te autahu‘araa i te taata atoa tei faataahia ia tavini i roto i te huru toro‘a atoa i roto i te Ekalesia a te Fatu no te farii mai i te « mana, te hopoi‘a, e te mau haamaitairaa tei taamuhia e to ratou ra toro‘a ».¹⁵

E tai‘o rahi to te mau horo‘araa pae varua e te rau, e e tae mai ia tatou a imi ai tatou i te reira e a faaohipa ai i te reira ma te tano maitai. E oaoa tatou i te reira no te mana o te Varua Maitai e vai nei i roto e ati a‘e e tei raraahia i roto i to tatou oraraa.¹⁶

Na roto i te mau haamaitairaa o te autahu‘araa, te faaite nei te Fatu ia tatou e, e ore oia e « haapa‘o i te huru o te taata ».¹⁷ I roto i to‘u mau tere, e fana‘o na vau mai tei matauhia ia hahaere i te mau melo i roto i to ratou mau utuafare. Te tahi pae o taua mau utuafare ra, e mau nohoraa riirii roa. I te taime matamua, e parau na vau ia‘u iho : « No te aha vau i haamaitaihia ai i te hoê fare e mori uira e te mau mea atoa, e teie utuafare ra aita roa‘tu e pape i piha‘i iho i to ratou fare ? Ua iti a‘e anei te here o te Fatu ia ratou i Ta‘na e here nei ia‘u ? »

I te hoê râ mahana, ua parahi au i roto i te hiero i piha‘i iho i te hoê tuahine o te ora nei i roto i te hoê fare na‘ina‘i. Ua faaea vau e piti hora i piha‘i iho ia‘na. Ua hi‘o pinepine atu vau i roto i to‘na na mata nehenehe e ua ite a‘era vau i te here o te Fatu i roto i te reira. A faaoti ai ta maua ohipa i roto i te hiero, ua farii au i te hoê iteraa puai roa. I roto i te mau haamaitairaa mure ore atoa, i roto i te mau maitai taa ê e te mau rave‘a fana‘o atoa, ua aifaito maua. Ua « bapetizohia vau i roto i te tatarahapa »¹⁸ na reira atoa ona. Ua farii au i te mau horo‘araa pae varua, e ona atoa.Ua farii au i te rave‘a fana‘o ia tatarahapa, e ua na reira atoa ona. Ua farii au i te Varua Maitai, e ua farii atoa ona. Ua farii au i te mau oro‘a o te hiero, e ua farii atoa ona. Ahiri maua toopiti i faaru‘e mai i teie nei ao i taua taime ra, e tae aifaito atu maua toopiti i mua i te Fatu i roto i ta maua mau haamaitairaa e te mau aravihi.

Ua riro te mau haamaitairaa autahu‘araa ei faaaifaito faufaa. Ua tu taua mau haamaitairaa ra no te mau tane e no te mau vahine, no te mau tamaroa e no te mau tamahine ; hoê â te reira no te feia i faaipoipohia e no te feia otahi, te ona e te veve, no te taata maramarama e no te taata ite ore i te tai‘o e te papa‘i [ma‘ua], no te taata tuiroo e no te taata poiri.

Te mauruuru nei au i te mea e, na roto i te afaro e te here oti‘a ore o te Atua, ua horo‘ahia i te mau tane e i te mau vahine atoa te hoa-apiti-raa aifaito, te mau horo‘araa, te mau haamaitairaa, e te mau aravihi na roto i te mau oro‘a autahu‘araa e te mau horo‘araa pae varua. Aua‘e te autahu‘araa, tei raraahia i roto e ati a‘e e na roto i to tatou oraraa, te mana atoa, te fafauraa atoa ta tatou e hinaaro no te rave i ta tatou ohipa o te oraraa nei, e ho‘i atu ai i to tatou utuafare i te ra‘i ra, ua niniihia mai ïa i ni‘a i to tatou mau upoo, i roto i te i‘oa o Iesu Mesia ra, amene.