Aio, te Kabanea ni Korakora Mai Buakon Boong?
I tangiria n taetae nakoimi iaon te raraoma n aron bwaai aika ana riki n te aonaaba ao tabeua kakaewenako aika ti kaitara ma ngaai. N Tebetembwa 11, 2001, ti a tia n rangi ni maaku ao ma n tabeaianga n aron bwaai aika riki n te aonaaba ao n aron kabonganaan te taeka ae kakamaaku. I ataia bwa a mwaiti mai iroumi ae e na iai te nano kokoraki bwa tera nanon aei ni kaineti ma tokin te aonaaba ao maiu n te aonaaba n taai aikai. A mwaiti aika titiraki, “Aio bon te tai ibukin manga okin te Tia Kamaiu ao taetae ni burabeti ni kabane ibukin okina?”
E bon koaua, e aki maan imwin 9/11, e titirakinai te mitinare ma nanona ni koaua ao te onimaki ni koaua, “Unimwaane Holland, bon kabanea ni boong aikai?”I nooria man ubuna bwa e bon nanonna raoi ao te maaku are oti ni matana. I taku, “Eng, Unimwaane, ti mena ngkai ni boong aika kabanea ni bong, ma akea te bwai ae boou ibukin aei. Te berita ibukin manga okin te Tia Kamaiu e moanaki man te moan kaotioti iroun te Burabeti Iotebwa Timiti n 1820. Ti kona ni kakoaua bwa ti a mena ngkai ni kabanea ni bong—ao a mwaiti riki ririki ni kabanea ni bong.” I tau bai ni iraorao ma ngaia ao I kanakoa nakon kawaina, E wiingare, ni kaota te aki nano uoua n atakin bwaai aika riki, ma ni kaota riki onimakinana ibon irouna ngke e kitanai.
I tangiria ni waekoa n taekinna bwa I bon ataa nanon ana titiraki te ataeinimwaane aei. Tera ae nanonna raoi teuaei bon “N na kona ni kabanea au mwakuri ni mitinare? E na bongana karekean te reirei? I kona ni kantaninga te mare? Iai te kaantaninga ibukin taai aika a na roko? Iai te kukurei ibukiu n taai aika a na roko?” Ao N na taekinna nakoimi te bwai are I taekinna nakoina, “Eng, bon te koaua—nakon titiraki ni kabane akanne.”
Ao ibukin rokon tain te tokanikai, are na kakoauaki irouia te botanaomata te Kauaoki ao maeiein te aonaaba aika a na riki, I aki ataia bwa e na riki ningai. Akea temanna ae e ataia. E taku te Tia Kamaiu bwa aki ataia naba anera i karawa. (tara Mataio 24:36).
Ti riai n taratarai kanikinaa, ti riai ni kabanea ara kona ni maiu ni kakaonimaki nakon ara kabanea ni konaa, ao ti riai n tibwaua te euangkerio nakoia aomata nako bwa e aonga n reke kakabwaia ao katantan nakoira ni kabane. Ma ti riai n aki katoka aron maiura ti ibukina bwa te kauaoki ao bwaai aika a na riki imwaain rokona a bon uakaan. Ti aki kona ni katoka maiuakinan te maiu aei. E koaua, ti riai ni kakororaoa maiuakinan te maiu aio nakon are ti a tia ni maiuakinna. E ngae ngke a tia n taekinaki bwaai aikai ni kabane, aio bon koron bukin te tai.
Karekea te Onimaki, Tiaki te Maaku
Iai uoua bwaai aika I kan taekin nakoimi ngkana iai ami tabeaianga ibukin taai aika ana roko. N na taekin mai nanou ma te nano n tangira.
Teuana, ti riai n aki kariaia te maaku ao taman te maaku (bon Tatan) bwa e na anai nanora man ara onimaki ao te kakaonimaki ni maiura. Aomata nako n taai aika kakaokoro a tia n nakonako n te onimaki n taai nako ma aki ataan koauana raoi. Bon aio te babaire. Tii te kakaonimaki. Te Atua bon te tia babaire. E ata aram ao E ataa kainanom.
Onimaki iroun Iesu Kristo—anne te moan tua n te euangkerio. Ti riai ni waaki nako. Te Atua E kantaningaiko bwa e na tau mwaitin am onimaki, kekeiakimwaaka, ao onimakinna bwa E na kateimatoa am waaki, kateimatoa maium, kateimatoa te kukurei. E kantaningaiko bwa ko na aki ti tarai taai aika ana roko; E kantaningaiko bwa ko na mwaneia ao ni bairea kanoan taai aika na roko—ko na tangiria, ni kukurei i nanona, ao kimwareirei n rekena.
Te Atua E tataninga ma te ingainga n nano ni kaekai am tataro ao ni kakoroi nanon miim, n aron are kakaraoia. Ma E aki kona ngkana ko aki tataro, ao E aki kona ngkana akea miim. Ni kauarerekea, E aki kona ngkana ko aki kakoaua.
Uoua Koroboki Aika Tabu Ibukin Te Karaunano
Aikai uoua koroboki aika tabu, a uaia ni kaineti nakoia naake a maiu n taai aika kakamaku.
Te moan bon man te mwakoro 101 n Doctrine and Covenants. E roko te kaotioti aei ngke a ikotaki aomata aika itiaki i Missouri ao a rinanon te bwainikirinaki ae korakora. I taku bwa bon te kabanea ni korakora, aio te tai ae te kabanea ni kanganga ao mani kakamaaku—I kona ni kangai “e on n te kakamaaku” —are e a tibwa ataia te Ekaretia.
E taetae te Uea nakoia Ana aomata n te tai ae rangi ni kakamaaku aei:
E na rau nanom ibukin Tion, ibukina bwa aomata ni kabane a mena inanon Baiu; tai kakamwakuri ao ataia bwa Ngai te Atua.
E na aki mwaing Tion man nena, e ngae ngke a maenako natina.
Naake a tiku ao a itiaki nanoia, a na manga okira rikiaia ni bwaibwai, ngaiia ma natiia, ma te anene ni kimwareirei ae akea tokina ni karikirakei ana tabo Tion are akea kaaia—
Ana bane n riki bwaai aikai bwa a na kakoroaki nanon aia taeka burabeti (tara D&C:16–19).
Mangaia ae e na riai n rau nanom ibukin Tion. Ao uringnga bwa kamatataan raoi nanon Tion are ti a bon kaman tia n anganaki: naake a itiaki nanoia (tara D&C 97:21). Ngkana ko kawakina nanom bwa e na itiaki, ngke ao natim ao tibum kam anenei anene ni kimwareirei ae akea tokiia ngkana kam karikirakea Tion—ao ko na aki kona ni kamwaingaki man am tabo.
Te kibu riki teuana ae I kan taekinna ae bon Ana taeka te Tia Kamaiu, nakoia Ana reirei ngke E nang kaaitara ma taurakina ao a kaaitaraaki n te maaku, te mangaongao, ao te bwainikirinaki. N ana kabanea n reirei nakoia ngke E maiu, E taku: “I atongi baikai nakoimi, bwa kam na karekea te rau mai Rou. Ami bwai i aon te aba te rawawata: ma kam na kabebetei nanomi, I atia ni kataea ana kai te aba.” (Ioane 16:33).
Ma ngaia are, n te aonaaba ae karawawata, ti na uringa ara onimaki. Ti na kauringi berita ake tabeua ao taetae ni burabeti ake ti a tia n anganaki, ake a karaunano ni kabane, ao ti na maiuakina te maiu aei ni kabwaninna raoi, ma te nanomatoa ao te ninikoria riki nakon taai aika tia n nako.
E a tia n tokanikai Kristo man te aonaaba ao e karaoa te kawai ibukira.E taku nakoira n ara bong aikai bwa ti riai ni katauraoira. Ara bwai te abanuea, ao e na aki tokanikai ara kairiribai iaora (tara D&C 38:9).
Taetae ni Burabeti Ake Teniua
Are e na kairira nakon te kauoua ni iango are I tangiria n taekinna ibukin boong aika ti maiu iai. Ti maiu n te aonaaba aei inanon boong aika kakawaki ae kona n anganaki te aomata, ao ti riai ni kamanena raoi.
Aio te koroboki ae mamaten nanou mairoun te Burabeti Iotebwa Timiti (1805–44): “Katean Tion ngaia are e a kakukureia nanoia ana aomata te Atua n taai aika kaokoro, te boto n iango are a tia n taraia burabeti, ibonga ao uea ma te kukurei ae kamimi; a tia n rangi ni kantaningaia ma te ingainga n nano ma te kimwareirei nakon te tai are ti maiu iai, ao n ungan nanoia n aia katautau ae kakukurei ae mai karawa, a tia n anenei mani korobokii ao n taetae ni burabeti ibukin aei ae ara bong; … ngaira ana aomata te Atua ae E a tia n [rineira] bwa tina kakoroa nanon te mimitong nakon Boong Aika Kaitira.”1
Ongora nakon te rongorongo ae ti tebo ma ane ieta mai iroun Beretitenti Wilford Woodruff (1807–98): “E mena te Atua irouia aomata aikai. Ti na karekei kaotioti ni kabane ake ti kainanoi, ngkana ti karaoi ara beku man kawakin ana tua te Atua… . Ngkai I … maiu ao I tangiria ni karaoa au beku. I tangiriia Aomata Aika Itiaki bwa a na karaoi aia beku… . A korakora ao a mwaaka tabeia. Matan te Atua ao burabeti aika mimitong a tararuaira. Aio te bong ae korakora are e a kaman tataekinaki man te tai are moanaki iai te aonaaba. Ti ikotaki ni kabane … man mwaakan ao ana tua te Atua. Ti karaoa ana mwakuri te Atua… . Ti na kakoroa nanon ara mition.”2
Kabaneana, kariaia bwa N na tibwaua ana rongorongo Beretitenti Gordon B. Hinckley, ara burabeti ni boong aikai, ae kairiira rinanon taai aika kangaanga n taai aikai: “Ngaira kaain te roro aei boni mwiin te mwakuri are e a tia n nako imwaira. E aki tau bwa ko na ti kinaaki bwa kaain te Ekaretia aei ngkoe. Iai tabera aika a kaman katukaki ibukira. Ti na kaitarai ma ni mwakuriia.
“Ti riai ni maiu bwa taan iriira te Kristo ni koaua, ma te tangira nakoia aomata ni kabane, ni kaboa mwiin te buakaka n te raoiroi, n reirei ana kawai te Uea man kaotan te banna ni katooto, ao ni kakoroi nanon mwakuri ni ibuobuoki are E a tia ni kaoti nakoira.
“Ti riai ni kororaoi ni maiura ibukin mimitongin kakabwaia n te oota ao te atatai ao te koaua ae akea tokina are e a tia n reke nakoira rinanon taian kurakai n taai ake ngkoa. Ma i buakoia aika a tia n nakonako n te aonaaba, ti a tia ni uotaki mai i nanon te tai ae onoti ao ma ni kamimi. Bwaina te nano ni kakaitau, ao ai moara riki te kakaonimaki.”3
I nanon taai aika kakaokoro, a tia ara burabeti n aki ti tarai taai ni kakamaku ngke a maiu ao tiaki naba iaon itera aika bubuaka ni boong aika kaitira, are ti maeka iai, ma a tangiria ni kan taetae ibukin tibwanga ao kakabwaia ao, ae e kakawaki riki, tabera n taui taian tibwanga ake ti anganaki, n te kabanea ni korakora mai buakon boong. I tangira ana taeka te Burabeti Iotebwa Timiti are e taekinna bwa burabeti, ibonga, ao uea n taai ake rimoa “a tia n rangi ni kantaningaia ma te ingainga n nano ma te kimwareirei nakon te tai are ti maiu iai; ao … n anenei ao ni koroia ao n taetae ni burabeti ibukin ara bong.” Tera ae a rangi ni kimwareirei ibukina? I kona ni kakoaua nakoim bwa aki rangi ni katua iangoan taian kakamaku ao kanganga. Aikai ana taeka Beretitenti Woodruff: “Matan te Atua ao burabeti aika mimitong a tararuaira. Aio te bong ae korakora are e a kaman taekinaki man te tai are e moanaki iai te aonaaba.” Kariaia bwa N na manga kaoki ana taeka Beretitenti Hinckley: “Rinanon taian kurakai n taai ake ngkoa, ma, i buakoia aika a tia n nakonako n te aonaaba, ti a tia ni uotaki mai i nanon te tai ae onoti ao ma ni kamimi. Bwaina te nano ni kakaitau, ao ai moara riki te kakaonimaki.”
I aki ataia bwa e kanga am namakin ni bwaai ni kabane aikanne, ma n te tai ae waekoa iango aika aki riai ibukin te tai ae ti maiu iai e na mauna nako mai irou, ao I nanorinano, e kukurei tamneiu, man kaungaaki n reken te tai ae ti a tia n anganaki. Te Atua e tararua Ana aonaaba, Ana Ekaretia, Ana taan kairiiri, ao e bon tararuaiko naba. Ti na bane ni kakoaua bwa “itiaki nanora” ao ti bon kakaonimaki. Ai kakabwaiara tera ngkoe. Ai tekeraoira natim ao tibum.
Iangoa te ibuobuoki are ti a tia n anganaki bwa ti na uota otan te euangkerio nakon te aonaaba ae rotongitongi. Iai ara mitinare ae kaania 53,000 mwaitiia—a mwaiti riki ni kabotauaki ma taai ake ngkoa. Ao e okioki te nambwa anne ni katoa uoua te ririki irouia naake ana nako n onoi mwiia naake a nang okiri mweengaia! Ma ti tangira riki ae mwaiti.
E raka iaon 2,000 te ririki ke e nako riki ngke ti teuana te tembora n aaba ngkoa ake mai mainiku ao uoua ke tenua tembora n rongorongon ngkoa Ana Boki Moomon, ma e rikirake mwaitin te tembora are ko a moanna n aki kona ni wareki!
Ikotia ma kamimiin te kaombiuta, are e buokira ni kawakin rongorongoia ara bakatibu ao ni karaoi otenanti ni kamaiu ibukiia ara mate. Ikotia ma baao ni mwamwananga n taai aikai, ake a konaa iai Mataniwi ni Kabuta ni katotobia te aonaaba ao n tataekina aia kakoaua ibukin te Uea nakoia Aomata Aika Itiaki n aaba ni kabane. Taekinna naba ma taabo ake ti aki kona n roko iai ao ngkai ti a kona ni “kanakoa,” n aron are taekinaki ni booki aika tabu, ma kanakobwana n te tiataraite (tara D&C 84: 62).
Ikotia ma bwaai ni kabane ibukin te reirei, te tiaienti (science), rabakau aika boou, itoman, bao ni mwamwananga, bwain aoraki, amwarake aika bongana, ao kaotioti aika otabwaninira, ao ti a moanna n ataia bwa tera are e nanonna te anera Moronaai ngke e aki toki ni kaokioka ana taeka nakon te teinimwaane are te burabeti Iotebwa Timiti, are e taekinaki n te O Tetemanti iroun te burabeti Ioera, bwa n te kabanea ni bong ao te Atua e na nurakinaTamneina I aoia “aomata ni kabane” ao ana kakabwaiaki aomata ni kabane n rokon te oota are e reiakinaki iai iteran nako Manga Kaokan ana euangkerio Iesu Kristo (Joel 2:28; e katuruturuaki; tara naba Joseph Smith—History 1:41).
Ti iangoi kakabwaia ni kabane aikai aika ti karekei n ara bong, ao ti katoka ara iango man taekinna nakon Tamara are i Karawa, “Ai korakorara ngkoe.”4
Te Bootaki ni Mare
N na reita te bwai teuana nakon te bwai ae nooraki ibukin boong. Ibukina bwa ara bong bon te kabanea ni korakora i buakon boong ni kabane, ibukina bwa bwaai ni kabane a roko n tokia ao ni kakoroaki bukiia n ara tai, ngaia are, iai naba, teuana te mwiokoaki ae ti anganaki ngaira i nanon te Ekaretia ngkai are e kaokoro ma aron anganakia kaain te Ekaretia n taai ake ngkoe. Iai mwiokoara bwa tina katauraoa Ana Ekaretia ana Tiibu te Tei te Atua ni butimwaea ana Tiibu te Tei te Atua—n rabwata, n te tokanikai ae mimitong, ao n nakoana n te marenium bwa aia Uea uea ao aia Kiing kiing.
Iai mwiokoan te Ekaretia ao ngaira n tatabemanira nako ngkai ti kaaina te Ekaretia aei bwa ti na kakororaoia bwa e aonga n roko Kristo nakoira, ko na kakororaoiko ni kaitibo ma Ngaia, ao ni kariaia bwa E na butimwaiira, ao ni mwaneira. Te maiu are ti anganna n te tai ae tabu aei e riai ni kororaoi Ibukina!
Ti a tia ni miwokoaki inanon booki aika tabu bwa ngaira taan katauraoa te tia iein te aine (te Ekaretia) ibukin te tia Iein te mwaane (te Tia Kamaiu) ao man kororaoi ni karekea te kakao nakon te baka n amwarake n tain te mare (tara Mataio 22:2–14; 25:1–12; D&C 88:92, 96).
Ngaia are, katinanikuan te maaku ibukin taai aika ana roko, I kaonaki ma te nano ae korakora ni mwakuri ni katauraoa maiu (nakon au kona ni buokia ni katauraoi maiuia kaain te Ekaretia) ibukin te tai are e a kaman taetae ni burabetinaki, te tai are ti na kaota iai te Ekaretia Nakoina bwa antai ana Ekaretia aio.
I aki ataia bwa e na roko ningai te bong aei. I aki ataia bwa antai ae na nooria. Ma aio I bon ataia: ngkana e roko Kristo, ao a riai kaain te Ekaretia n taraaki ao ni karaoi mwakuri n aron tarakiia ao mwakuriia kaain Ana Ekaretia ngkana ti na butimweaki Irouna. Ti riai ni karaoa Ana mwakuri, ao ti riai ni maiuakin Ana reirei. E riai ni waekoa ao ni bebete aron kinakira bwa Ana reirei ngaira ni koaua
E koaua bwa aio bukina ngkai e taetae Beretitenti Hinckley ni kangai: “E aki tau [ibukira, ngke ao ngai, ngkai, n ara tai] bwa ko na ti kinaaki bwa kaain te Ekaretia aio… . Ti riai ni maiu bwa taan iriira ni koaua … Kristo.” Aikai boong ni kaitira, ao ngke ao ngai ti na kabanea ara kona n riki bwa aomata aika itiaki nakon ara kabanea ni kona.
Maiu ma te Aki Nanokokoraki
Iai te kukurei nakon taai aika ana roko ibukim ao am kariki ni boong aika kaitira? Bon ngaia raoi anne! Ana iai taai ni kanganga ngkana a koro bukin bwaai aika ana riki ni bong aika kaitira n aron kauring ao taetae ni burabeti? Eng bon iai. A kona naake a kateitei iaon te bwa ae Kristo n tei ni kaitarai taian ang, te karau ae te aiti , te ukeuke n anti ae korakora? Ko ataia a kona. Iai iroum te berita anne man booki aika a onimakinaki. Iai iroum n Ana taeka! Te “bwa are ko kateitei iaona … bon aan te kateitei ni koaua, aan te kateitei are ngkana a kateitei iai mwane [ao aine] ao aki kona ni bwaka” (Ereman 5:12).
I katuka au tangira ao au koaua nakoimi bwa te Atua e aki ti maiu, ma E bon tangirira. E tangiriko. E karaoi bwaai ni kabane ibukin kabwaiara ao katanara. A mwaiti bwaai aika buakaka ao te kananokawaaki n te aonaaba, ma akea nen te buakaka ao te kabuanibwai Irouna. Bon Tamara—te tama ae kororaoi—ao E na buokiira ni karekea te tabo ni katantan man te angibuaka.
I aki tii kakoaua bwa Iesu bon te Kristo, ao Ana Riki Temanna te Atua ae Tabu, ma e maiu, bwa E tangiriira, bwa man korakoran ao kakaawakin Ana karea ni kamaiu, ao ngaira ti na maiu naba n aki toki.
Aio bon ana Ekaretia ao abanuean te Atua i aon te aonaaba. E a tia ni manga kaokaki te koaua. Maiu ma te aki nanokokoraki, kantaninga ae raoiroi, te onimaki, ao kakaonimaki. Kakorakorako nakon taiani kakaewenako n te maiu aei ma tai maaku ke ni bwarannano iai. Namakina te kimwareirei irouia Aomata Aika Itiaki ni boong aika kaitira—tai taonaki n te raraoma ke te bwarannano ae na uruaniko.
E tuangiira te Uea bwa ti na Uringnga n ara iango ni kabane n aki nano uoua ke ni maaku (tara D&C 6:34, 36).
Ti a tia n aki oota raoi ibukin kakabwaia aika korakora are e a tia te Tama ni … katauraoi ibukira… . Ti na kukurei… . Ara bwai te abanuea, ao kaubwai ake akea tokia bon ara bwai (tara D&C 78:17–18).
I katikui au kakabwaia, ma au tangira, ao aia koaua abotoro ibukin bwaninin koauan bwaai aikai.
Man ana marooro te Church Educational System are karaoaki n Tebetembwa 12, 2004.