Mulimuli Ane Na Manao Lo’u Tina e Iloa

A o mimilo atu le solo o taavale o le maliu i le auala vaiti e agai atu i le fanuamaliu, na fegasoloai i lou mafaufau ia mea e manatua. I lou faanoanoa i le maliu faafuasei o lou tama, na ou sulu ai i le talalelei ma tusitusiga paia mo se faamafanafanaga. Na oo mai i lou mafaufau le Failauga 3:1: “O le mea ma lona tausaga i mea uma.”

A o ou laitiiti sa le masani ona o lo matou aiga i se lotu, ae sa faaalia e ou matua o laua faatuatua i le auala faaKeriso sa la fesoasoani ai ia i latou na manaomia le fesoasoani faapea ma le ala sa la faaalia ai ia i matou o le fanau, sa alofaina i matou. Sa avea ou matua ma se vaega o vaitau uma o lou olaga, sei vagana ai le tasi, ma o lena vaitau na aumaia ai le faanoanoa tele ia i laua, ona sa lei malamalama ma sa le faalogo i la’u molimau i le mea na ou maua.

Ina ua 17 ou tausaga, sa faailoa mai ia te au le Ekalesia e nisi o au uo lelei. Na taliina e le talalelei toefuataiina au fesili sa i ai mo le tele o tausaga, ae sa le fia taua e ou matua. Ina ua ou auai i le Ekalesia i le 18 o ou tausaga, sa auai lo’u tinamatua i lo’u papatisoga. E le o ia o se tagata o le Au Paia o Aso e Gata Ai, ae na foliga mai sa malamalama o ia i o’u manaoga faaleagaga, ma sa ia faamalosiau mai ia te au, o le a i ai se aso e talia ai e ou matua lau filifiliga.

E lei umi ona ou papatiso ae ou faaipoipo loa ma ma o ese ai loa ma lo’u toalua. O ni nai tausaga mulimuli ane, sa ou faamatala atu ai i se tusi i ou matua le tala fou e uiga i lou faamauga i le malumalu, ma tau atu i ai lou faatuatuaga fou ma le fiafia. Ae sa le mafai ona ou tosina maia i laua i le talalelei. O lenei ua leai lo’u tama, ae ua tuua ai na o lo’u tina ma lo’u uso laitiiti.

Na faalavelaveina ou mafaufauga ina ua tutu taavale. Sa vave ona ou matauina i lo matou itu tauagavale se maafaamanatu na punitia i laau. Na foliga mai sa tauanau mai i matou e se faaupuga na tusia i luga o le maa, ae sa matou o atu lava i le sauniga i le tuugamau e aunoa ma le suesueina.

Ina ua uma le sauniga, sa matou faailoa atu le agaga faafetai i uo ma aiga ma matou faatofa loa. Ona matou savavali atu lea ma lo’u toalua, ma lo’u tina i le maafaamanatu. Sa tusi ai i luga se mau o le a suia ai lo’u aiga e faavavau: “Aua faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39).

Mo le taimi muamua lava, i le 14 tausaga talu ona ou papatiso ma faamauina, na fesili mai ai lo’u tina. Ona o le talalelei toefuataiina, na mafai ai ona ou tuuina atu tali. Sa papatisoina i laua ma lo’u uso ma faamauina i se taimi e lei mamao ane ai. E sili laitiiti ma se tausaga mulimuli ane, na maea ai ona faia galuega o lo’u tama i le malumalu.

Ua silia i le 30 tausaga ua tuanai talu mai lena aso i le fanuamaliu. I le taimi lena, ua uma ona faamau faatasi tagata o le matou aiga lautele i le malumalu. Sa avea lou tina ma peresitene o le Aualofa ma sa ia tuuina atu ni tausaga o auaunaga faamaoni. Sa faaipoipo lo’u uso, maua se fanau, ma tautua i le tele o tausaga o se taitai i le Lora, peresitene i Tamaitai Talavou, ma faigaluega i le LDS Family Services [Tautua a le AAG mo Aiga].

O le mea ma lona tausaga i mea uma—e aofia ai se taimi o le fiafia ma se taimi o le faanoanoa. Ou te faafetai mo le iloa, e taliina mai talosaga i le taimi a le Atua lava ia, ma o tusitusiga paia e aumaia ai upu o le ola a o tatou suesue, mafaufau loloto, ma faasoa atu i isi.