O Alalaupapa e Tolu

I le tele o tausaga ua mavae, sa ou faitau ai i se tusi e igoa o le The Way to the Western Sea, [O Le Ala i le Vasa i Sisifo], na tusia e David S. Lavender. O loo tusia ai se tala matagofie o le malaga maoae a Meriueta Lui ma Viliamu Kalaka, a o la faatautaia le la faigamalaga tautaua i le konetineta o Amerika i Matu e saili ai se auala i le laueleele e malaga atu ai i le Vasa Pasefika.

O la laua sopo o se malaga fita faagau tua, o tofe maualalalo na tatau ona sopoia ma savaliga mamao, ma sa tauaveina a la vaa ua matua tutumu i uta, e saili se vaitafe e folau ai.

A o ou faitau i mea na la oo i ai, e masani ona ou manatunatu, “Maimau pe ana i ai lava ni alalaupapa faaonaponei e faafesootai ai tofe po o vai tatafe. O iina na oo mai ai i lou mafaufau alalaupapa maoae o o tatou vaitaimi, ia ua faafaigofie ai ona faataunuu lenei galuega: o le Alalaupapa o le Faitotoa Auro lauiloa i San Francisco; o le alalaupapa malosi o le Uafu o Sini i Ausetalia; ma le tele o isi i atunuu.

O le mea moni lava, o i tatou uma o tagata malaga—o tagata sailiili o le olaga nei. E le’i i ai muamua so tatou poto masani. E ao ona tatou laasia mato tifato ma vasa sousou i la tatou faigamalaga i lenei lalolagi.

O lo tatou Alii ma le Faaola, o Iesu Keriso, o le tusiata silisili o fale ma se tufuga fau alalaupapa mo oe, mo au, ma mo tagata uma. Ua uma ona fausia e Ia o alalaupapa e ao ina tatou sopoia pe afai tatou te mananao e taunuu i lo tatou aiga faalelagi.

Sa saunia e Iesu le Alalaupapa o le Usiusitai. O Ia o se faaaoao e le masuia o le usiusitai patino aua sa Ia tausia poloaiga a Lona Tama.

O le alalaupapa lona lua ua saunia e le Matai mo i tatou ia laasia, o le Alalaupapa o Auaunaga. Tatou te vaavaai atu i le Faaola e fai ma o tatou faataitaiga o le auauna atu. E ui ina sa afio mai o Ia i le lalolagi o le Alo o le Atua, ae sa Ia auauna atu ma le lotomaualalo ia i latou sa siomia ai o Ia. Sa Ia faamanuia i e mamai; sa Ia faasavavali i e pipili, faapupula i e tauaso, ma ua faalogo foi tutuli. Sa Ia toe faatuina mai e ua oti.

O le mea mulimuli, ua saunia e le Alii mo i tatou le Alalaupapa o le Tatalo. Sa ia poloai mai, “Ia tatalo pea, o le a ou liligi atu lou Agaga i ou luga, ma o le a sili lou faamanuiaga” (MFF 19:38).

O Iesu, le Tufuga Fau Alalaupapa, sa ia faafesootaia le tofe tele ua tatou taua o le oti. “Aua faapei ona oti uma ia Atamu, e faapea foi ona faaolaina uma ia Keriso” (1 Korinito 15:22). Sa Ia faia mo i tatou le mea e le mafai ona tatou faia mo i tatou lava; o le mea lea, ua mafai ai e le tagata soifua ona laasia ia alalaupapa sa Ia fauina—i le ola e faavavau.