ʻIkai ʻi ha ʻAho pē ʻe Taha
“Ke nau fakataha kotoa mai, ke ʻalu hake ki he temipalé” (Mōsaia 1:18).
Naʻe kamata ʻa e ʻaho Tokonakí ʻo tatau mo ha toe ʻaho kehe pē. Naʻe hopo hake ʻa e laʻaá ʻi he ʻotu moʻunga hoko atu ki he ʻapi ʻo Kōliní, pea naʻe huhulu atu ia ki he matapā sioʻata ʻo hono loki mohé. Ka ne ko ha ʻaho kehe ange, kuó ne ʻosi feinga ia ke pūlou hono kafú mo nofo pē ʻi mohenga. Ka naʻe mamao ʻa Kōlini mo faofao peá ne tuʻu mei mohenga he naʻe ʻi ai e meʻa naʻe teu ke fai, pea naʻe fie maʻu ia ke ne tuʻu leva ʻo teuteu.
Naʻe angamaheni ʻaki e ʻaho Tokonakí ko ha ʻaho ia ke ne vaʻinga ai mo hono ngaahi kaumeʻá pe tokoni he ngāue ʻi tuʻá pe ʻosi ʻene ngaahi fekau ke faí pea afe atu ʻo ʻaʻahi ki heʻene kuitangatá mo e kuifefiné. Naʻá ne faʻa tui e vala ʻokú ne ongoʻi fiemālie ai pea sai pē kapau ʻe ʻuli. Ka ʻi he ʻahó ni, naʻá ne tui hono teunga lelei taha ki he Sāpaté ʻa ia kuo fō mo haeane ʻe he fineʻeikí. Naʻá ne fakamaʻu hono sote hiná pea mono e tapá ki loto ʻi hono talausesé. Naʻá ne tui hono sitōkení mo e suú pea ʻai takai e hēkesí ʻi hono kiá—ʻe toki tokoni ange ʻa e tangataʻeikí ke haʻi. ʻI he taimi naʻe ui ai ʻene faʻeé, “Taimi ke tau ō,” kuó ne ʻosi maau.
Hili e heka ʻa e tokotaha kotoa pē ki he vēní pea haʻi honau letá, naʻe fakaʻuli atu leva e tangataʻeikí he halá pea afe. Naʻe malimali ʻa Kōlini heʻenau aʻu ki he temipalé. Naʻá ne sio ki heʻene hā molemole mo ngingila mai ʻi he huelo ʻo e laʻaá pea mo e ngaahi matapā sioʻata lanu kehekehe naʻe lele ki ʻolunga ki he tauá mo e ʻāngelo ko Molonaí.
Kuo tuʻo lahi e sio ʻa Kōlini ʻi he temipalé. Kuó ne ʻosi hū foki ki he loto temipalé: ʻa ia ko e taimi naʻe silaʻi ai ia ki heʻene mātuʻá ʻi hono māhina onó pea mo e taimi naʻe ohi ai ʻe heʻene ongomātuʻá ʻa hono kiʻi tehina ko Kātení. Naʻe fuʻu kei siʻi ʻa Kōlini ke ne manatuʻi e ongo taimi ko ʻení, ka ʻi heʻene tupu haké, naʻá ne ʻiloʻi naʻe mahuʻinga ʻa e meʻa naʻe hoko aí. Pea naʻe mahino kia Kōlini, ko ʻene hili ange ʻa e ʻaʻahi ʻi he ʻaho Tokonaki makehe ko ʻení, ʻe hoko hono kiʻi tuofefine ohi ko Seilá ko ha konga ʻo e fāmilí ʻo taʻe ngata, ʻo hangē pē ko hono ongo taʻoketé.
ʻI ha toe ʻaho kehe ange, naʻe saiʻia ʻa Kōlini ia ke kata mo talanoa. Ka ʻi heʻene hū atu mo hono fāmilí ʻi he matapā lahi ʻo e temipalé, naʻá ne feinga ke tuku ʻi tuʻa ʻene fute holó mo ʻene katá. Naʻá ne ʻilo ko ha feituʻu toputapu ia.
Naʻe ʻave ʻa Kōlini, Kāteni mo Seila ʻe ha kau ngāue temipale anga fakakaumeʻa ki ha loki makehe pē ia maʻá e fānaú, ʻa ia naʻe tui ai honau teunga hiná mo tatali ke nau toki ō ki he loki silá ʻa ia naʻe tatali mai ai ʻenau ongomātuʻá. Naʻe sio ʻa Kōlini ʻi he loki silá ki heʻene ongo kuí, ngaahi mehikatangá mo e faʻētangatá, ngaahi kaumeʻa ʻo e fāmilí mo ha kāingalotu ʻo hono uōtí. Ko ha ʻaho fakafiefia ʻeni, neongo ne holo ʻe ha niʻihi honau loʻimatá.
Naʻe fakafeʻiloaki ʻa e tokotaha faisila ʻo e temipalé ki he fānau tangatá ni ʻaki haʻanau lulululu mo ha malimali. Naʻá ne talaange ʻenau hā fakaʻofoʻofa ʻi honau teunga hiná. Naʻá ne fakalotolahiʻi kinautolu ke nau fai maʻu pē ʻa e ngaahi fili totonú koeʻuhí ke nau lava ʻo teuteu ki haʻanau ngāue fakafaifekau pea nau toe foki mai ki he temipalé. Hili ko iá naʻá ne fakamanatu ange kiate kinautolu ʻa hono mahuʻinga ʻo e meʻa naʻe teu ke fakahokó. Hili pē iá peá ne kamata leva e ouau ʻo e silá
ʻI he ʻosi ʻa e silá, naʻe tuʻu fakataha ʻa Kōlini mo hono fāmilí ʻo sio ki he ngaahi sioʻata ʻi he lokí. Naʻá ne sio ki ai mo ʻene tamaí, faʻeé mo hoʻo kiʻi tuofefiné. Naʻe ʻikai ha ngataʻanga honau ʻatá, ʻo hangē pē ko hono fāmili taʻengatá. Ne ʻiloʻi ʻe Kōlini ʻe lava ke fakataha hono fāmilí, ʻo ʻikai ʻi ha ʻaho pē ʻe taha, ka ʻo taʻengata koeʻuhi pē ko e temipalé.