Dau Masu Tikoga

Na kena rawarawa duadua, na masu sa ikoya na nodra vosa yani vua na Tamadra Vakalomalagi o ira na Luvena tagane kei na Luvena yalewa e vuravura. “Ena gauna ga eda sa kila kina na ituvaki dina ni noda veiwekani kei na Kalou (o ya, ni Kalou sa Tamada dina, ka da sa luvena), ka yaco na noda masu me sa noda itovo ka vakarau ni noda bula” (Bible Dictionary, “Prayer,” 752). Eda sa vakaroti meda dau masu tikoga vua na Tamada ena yaca ni Luvena (raica 3 Nifai 18:19–20). Sa yalataki tu vei keda ni kevaka eda na masuta ena yalodina na veika e dodonu ka vinaka me baleta na inaki ni Turaga, eda na vakalougatataki, taqomaki, ka dusimaki (raica 3 Nifai 18:20; V&V 19:38).

Na ivakatakila sa ikoya na nona vosa mai na Tamada Vakalomalagi vei ira na Luvena e vuravura. Ni da kerekere ena vakabauta, sa rawa me da na ciqoma kina vakaveitarataravi na ivakatakila ka sala muria mai na veivakavukui eso ka kila na veika vuni kei na veivakacegui ena kauta mai na reki kei na bula tawamudu (raica V&V 42:61). Na veika vuni sa ikoya na veika ena vakatakilai ka kilai walega ena kaukauwa ni Yalo Tabu (raica Harold B. Lee, Ye Are the Light of the World, 1974, 211).

Na ivakatakila mai vei Tamana kei na Luvena ena vakadewataki mai vua na ikatolu ni Lewetolu Vakalou, sa ikoya na Yalo Tabu. Na Yalo Tabu sa ivakadinadina ka italai ni Tamana kei na Luvena.

Na ivakarau e vakayagataka na Kalou ena kena buli ko vuravura sa veivakasalataki tiko me vukei keda meda kila vakavinaka kina na sala me vakaibalebale vakalevu cake kina na noda masu. Ena wase e tolu ni ivola i Mosese eda vulica kina ni veika kece a vakayalo na kedra buli ni bera nodra buli vakayago e vuravura.

“Ia au sa kaya vakaidina vei iko, sa vakaoqo na itukutuku kei lomalagi kei vuravura ni sa buli, e na siga au sa bulia kina na vuravura kei na lomalagi ko i au na Turaga na Kalou,

“Io au sa bulia talega na kau kece ga ni vanua ni sa bera ni tu e vuravura, kei na co kece ga ni vanua ni sa bera ni tubu. Ia ko i au na Turaga na Kalou, au sa bulia oti tu na veika kece au sa tukuna ni bera ni mai rairai e dela i vuravura.” (Mosese 3:4–5).

Eda vulica mai na veitiki ni ivolanikalou oqo ni a vakayacori na veibuli vakayalo ni bera ni mai vakayacori na veibuli vakayago. Ena sala vata oqo, na masu ena mataka sa ikoya e vakaibalebale ka sa gacagaca bibi dina ni kena buli vakayalo na veisiga yadua—ni bera ni vakayagotaki na buli se na cakacaka e vakayacori ena dua na siga. Me vaka ga na kena semati se tomani na veibuli vakayago ki na veibuli vakayalo, sa vakakina na kena semati na masu ena mataka kei na kena ena yakavi e vakaibalebale vakalevu cake, ka me tomani tikoga vakakina.

Me vakasamataki mada na ivakaraitaki oqo. Era na tiko beka eso na ka ena noda itovo, noda ivakarau ni bula, se na veika e baleta na noda qaqaco vakayalo eda gadreva me da vakarogotaka vua na Tamada Vakalomalagi ena noda masu ena mataka. Ni da sa vakavinavinakataka oti na noda kalougata a soli mai, meda na kerea na kila ka, veidusimaki, kei na veivuke me da vakayacora na veika eda sega ni cakava rawa ena noda kaukauwa ga. Me kena ivakaraitaki oqo, ni da masu me da:

• Vakaraitaka na veigauna eso eda a vosa cudrucudru se vakatani kina kivei ira na noda daulomani.

• Kila e yaloda ni da sa vuku cake sara, ia eda sega ga ni da cakava na veika eda sa kila tiko.

• Vakaraitaka na mosi ni yaloda me baleta na noda malumalumu ka sega ni da gugumatua sara me da drotani rawa mai na noda itovo vakayago.

• Vakadeitaka me da tuvalaka noda bula ka vakamuria taucoko na ivakarau ni nona bula na iVakabula.

• Kerea na veivaqaqacotaki me da vakayacora rawa ka uasivi sara.

Oqo na mataqali masu sa idola bibi ni vakavakarau vakayalo ki na dua na siga.

Ni yaco mai e dua na siga, eda masu vuni e yaloda me da vukei ka dusimaki tikoga—me vaka a kaya o Alama: “Ia mo vakaliuca na Turaga ena nomu cakacaka kecega” (Alama 37:36).

Eda raica ni veisiga vakaoqo eda dau cavuta na veivosa cudru eso, ka da sega, se sega mada ga ni yalo katakata, ia e sega ni vakakina. Eda kila ni da sa vukei ka vaqaqacotaki mai lagi ka da yalomalua ni sa saumi na noda masu. Ena gauna mada ga eda sa kila kina, eda na cabora vuni kina e dua na masu ni vakavinavinaka.

Ni mai cava e dua na siga, eda tekiduru tale ka tukutuku lesu vei Tamada. Eda raica lesu na veika sa vakayacori ena siga o ya ka vakavinavinaka na yaloda ki na veivakalougatataki kei na veivuke a soli vei keda. Eda sa veivutuni kina, ka vukei keda na Yalotabu ni Turaga, me da raica rawa na veisala eso me da cakava me vinaka cake sara na siga ni mataka. O koya gona, na noda masu ena yakavi e tarai cake ga mai na kena semati tikoga na noda masu ena mataka. Ia na noda masu ni yakavi sa ivakavakarau talega ki na noda masu e na mataka e vakaibalebale vakalevu cake.

Na noda masu ena mataka kei na yakavi—kei na veimasu kece sara ena kedrau maliwa—era sega ni duidui, se duatani na kena cakacaka; ia era sa semati vata ga ena veisiga yadua kei na veisiga kecega, veimacawa, veivula, ka vakayabaki talega. Sa ikoya oqo na gacagaca ni noda vakamuria na ivakasala mai na ivolanikalou o ya me da “dau masu tikoga” (Luke 21:36; 3 Nifai 18:15, 18; V&V 31:12). Na masu e vakaibalebale vakalevu cake sa iyaya ni cakacaka ni kena rawati na veivakalougatataki cecere duadua sa vakarautaka oti tu na Kalou me baleti ira na Luvena era sa yalodina tiko.

Ena yaco me vakaibalebale vakalevu cake na masu kevaka me da nanuma tiko na noda veiwekani kei na Kalou ka muria na ivakasala o ya:

“Mo masuta na Turaga me vukei iko ena ka kece ga; io, mo vakaliuca na Turaga e na nomu cakacaka kece ga, ka vakarogotaka vua na nomu sala kece ga; mo dau nanuma tiko ga na Turaga, io mo lomani Koya e na gauna taucoko.

“Mo vakarogotaka vua na Turaga na nomu sala kece ga, ia e na vakadodonutaka na nomu i lakolako ko Koya; mo soli iko vua na Turaga ni ko sa davo sobu e na bogi ka na vakatawai iko ko Koya, ia ni ko sa yadra e na mataka, mo vakavinavinakataka vua na Kalou; raica kevaka ko sa kitaka na veika kece oqo, ko na laveti cake e na siga mai muri” (Alama 37:36–37; vakamatatataki).

Ena neirau a veiqaravi voli ena Brigham Young Univesiti–mai Idaho, keirau dau veisureti kei Sister Bednar vei ira na Vakaitutu Raraba me ra gole mai vale. Keitou a vulica kina vakamatavuvale e dua na lesoni bibi me baleta na masu e vakaibalebale vakalevu cake ni keitou a masu ena dua na yakavi vata kei na dua na lewe ni Kuoramu ni iApositolo Le Tinikarua.

Ena mataka ni siga o ya, a tukuni vei au kei Sister Bednar ni sa takali vakasauri e dua na itokani vinaka, ka keirau gadreva sara me keirau sa masulaki koya na watina kei ira na luvedrau. Au a sureti watiqu sara me keirau sa masu, ia e sega tiko ni kila o lewe ni Tinikarua na leqa sa yaco, ka kerea sara me cabora ga o Sister Bednar na masu ni vakavinavinaka ni veivakalougatataki sa soli mai ka kakua ni kerea e dua na ka. Na nona ivakasala e tautauvata kei na ivakaro nei Alama vei ira na lewe ni Lotu ena gauna makawa o ya “me ra dau masu tiko ga me kakua ni mudu, ka me ra vakavinavinakataka na ka kece ga” (Mosaia 26:39). Ni dau yaco mai na leqa tawa namaki, e dau totolo sara me da kerea na nodra vakalougatataki na noda itokani ka berabera ni cabori na vakavinavinaka.

A vakayacora ena vakabauta o Sister Bednar na veidusimaki a soli vua. A vakavinavinakataka na Tamada Vakalomalagi na veiwekani sa mai yaco e vakaibalebale vakalevu cake ka daunanumi tikoga. A cauraka talega na vakavinavinaka vua na Yalo Tabu na Dauveivakacegui kei na isolisoli ni Yalotabu me rawa ni da sabaya kina na meca ka qaravi ira na tamata. Na kena e bibi duadua, a vakavinavinakataka o koya na yavu ni veivakabulai, na solibula veisorovaki i Jisu Karisito, na Nona Tucake Tale, na cakacakatabu vakalotu kei na veiyalayalati ni kosipeli vakalesui mai me rawa ki na veimatavuvale me ra duavata tawamudu.

Keitou a vulica kina vakamatavuvale e dua na lesoni cecere me baleta na kaukauwa ni masu ni vakavinavinaka e vakaibalebale vakalevu cake. Ena vuku ni masu, a vakalougatataki kina na neitou matavuvale ena veivakauqeti me baleta na veika bibi eso e curuma tu na neitou vakasama ka vakayavalata na yaloi keitou. Keitou a vulica ni neitou a vakavinavinakataka na yavu ni bula marau kei na ilesilesi ni iVakabula me baleta na veivakabulai keitou sa vakadeitaki ka vaqaqacotaki mai kina ni sa na vinaka na veika kecega baleti ira na neitou itokani vinaka. Keitou a ciqoma talega na veivakavukui me baleta na veika me keitou dau masulaka ka kerekere vakadodonu ena vakabauta.

Na masu e vakaibalebale vakalevu cake ka vakayalo au sa sotava oti, e cabori ga kina na vakavinavinaka ka lailai sara na kerekere, ke dua. Niu sa mai vakalougatataki oqo ena masu vata kei ira na iapositolo kei na parofita, au raica ni kedra ituvaki na iliuliu ena gauna oqo, ena Lotu ni iVakabula edaidai sa tautauvata kei na kena e vakamacalataki kina o Kavetani Moronai ena iVola i Momani: sai ira oqo sa vuabale na nodra vakavinavinaka vua na Kalou ena vuku ni isolisoli kei na veivakalougatataki e solia vei ira na Nona tamata (raica Alama 48:12). Sa vakakina, ka sega ni levu na ka e ratou kerea, sa soli vei iratou na veika me ratou masulaka, ka ratou sa gadreva sara (raica 3 Nifai 19:24). Era masu vaka na gone o ira na parofita ka rawarawa tu ga ka kaukauwa sara ni cabori ena yalodina.

Ni da saga me vakaibalebale vakalevu cake na noda masu, e dodonu me da nanuma tiko ni “sa kilkili sara me vakatusa na tamata ni sa bulia na ka kece ga na Kalou; io me muria tale ga na nona vunau. Ia kevaka e sega, e na tau vua na nona cudru waqawaqa” (V&V 59:21). Au sa kerea tiko ni gauna eda na masu tale kina me sa masu walega ni vakavinavinaka kei na vakamuduo. Kakua ni kerea e dua na ka; me reki ga na yaloda ka da vakavinavinaka yani mai na vu ni yaloda taucoko.

Na noda masuta na Tamada Vakalomalagi me da vakalougatataki ena veika eda gadreva ena noda bula yadua e ka vinaka ka dodonu. Ia, na noda masulaki ira talega na tamata ena yaloda dina, o ira eda daulomana kei ira era dau vakasaurarataki keda sa gacagaca bibi dina ni masu e vakaibalebale vakalevu cake. Ni da dau masu tiko ena vakavinavinaka ena vakarabailevutaka kina na salatu ni ivakatakila, o koya gona ni da masulaki ira na tamata ena yaloda taucoko ena rogo vakalevu cake sara kina vei keda na domo ni Turaga ka da muria.

Eda sa vulica rawa e dua na lesoni bibi mai na ivakaraitaki nei Liai mai na iVola i Momani. A vakamuria ena vakabauta o Liai na ivakasala kei na ivakaro vakaparofita ni sa na vakarusai o Jerusalemi. A qai “masulaki ira na kai nona vua na Turaga e na yalona taucoko” (1 Nifai 1:5; vakaikuritaki). Na isau ni masu ena yalodina oqo, a vakalougatataki kina o Liai ena dua na raivotu ka raica kina na Kalou kei na Luvena kei na kena sa na vakarusai o Jerusalemi (raica 1 Nifai 1:6–9, 13, 18). Na kena isau, a reki kina na yaloi Liai ena vuku ni veika sa vakaraitaka vua na Turaga (raica 1 Nifai 1:15). Me nanumi tiko ni raivotu oqo a saumi ni dua na masu baleti ira na tamata ka sega ni baleta e dua na kerekere me vakavukui se dusimaki kina e dua na tamata.

Na iVakabula sa ivakaraitaki vinaka duadua ni nodra masulaki na tamata ena yalodina. Ena Nona Masu ni Vakacacabo ena bogi ni bera na Nona Lauvako ena Kauveilatai, a masu o Jisu ena vukudra na Nona iApositolo kei ira na Yalododonu kece ga.

“Au sa masulaki ira: au sa sega ni masulaki vuravura, ko ira ga ko sa solia mai vei au, ni ra sa nomuni… .

“Ia kau sa sega ni masu ena vukudra walega oqo, ia ena vukudra talega era na vakabauti au ena vuku ni nodra vosa; …

“ … me tu vei ira na loloma ko ni a lomani au kina, meu tiko talega kei ira” (Joni 17:9, 20, 26).

Ena gauna ni cakacaka vakalotu ni iVakabula ena vanua o Amerika, a vakasalataki ira na tamata o Koya me ra tugana sara na Nona ivakavuvuli ka masuta me ra kila vakavinaka. A vakabulai ira na tauvimate, a masulaki ira na tamata ka cavuta kina na veivosa sa sega ni volai rawa (raica 3 Nifai 17:1–16). A laurai e matanalevu na kaukauwa ni Nona masu: “Ia sa sega ni tukuni rawa na levu ni neimami marau ni keimami sa rogoci Koya ni sa masulaki keimami vei Tamana” (3 Nifai 17:17). Me da vakasamataka mada ni na vakacava beka keda rogoca na iVakabula kei vuravura ni sa masulaki keda tiko.

Era vakila tale beka ga o ira na watida, luveda, kei ira na lewe ni matavuvale tale eso na kaukauwa ni noda masu vua na Tamada ena vuku ni nodra leqa kei na gagadre? Era sa rogoca tale beka ga na noda masu o ira eda qaravi ira tiko ka vakila na veivakauqeti ni noda masu ena yalodina ena vukudra? Kevaka era se bera ni rogoca ka vakila na veivakauqeti ni noda masu ena yalodina e na vukudra o ira eda qaravi ira tiko, ia sa gauna sara ga ni veivutuni oqo. Ni da vakatotomuria na ivakaraitaki ni iVakabula, ena yaco me vakaibalebale vakalevu cake dina kina na noda masu.

Eda sa vakaroti me da “dau masu tiko ga” (2 Nifai 32:9; V&V 10:5; 90:24)— “mo dau masu votu; … masu lo, masu e matana levu, ka masu vuni talega” (V&V 19:28). Au sa vakadinadinataka ni na vakaibalebale vakalevu cake na masu ni da vakarogotaka vua na Turaga na noda cakacaka kecega, ka da vakavinavinaka ena yalodina, ka da masulaki ira na tamata ena inaki dina kei na vu ni yaloda dina.

Au vakadinadinataka ni bula tiko na Kalou ka sa dau rogoca ka sauma mai na noda masu ena yalodina. Sa iJisu na Karisito, na noda iVakabula ka Daunitataro. E ka dina na ivakatakila. Sa vakalesuimai na taucoko ni kosipeli ki vuravura ena itabagauna oqo. Sa noqu ivakadinadina oqo ena yaca tabu ni Turaga o Jisu Karisito, emeni.