“O o’u matua e le malolosi i le Ekalesia. E faapefea ona tumau lo’u malosi e aunoa ma la la’ua lagolago?”

Valaaulia ou matua e fai a outou tatalo faaleaiga. Valaaulia i la’ua i gaoioiga a le Ekalesia. Faatulaga ni afiafi faaleaiga. Tatalo e le aunoa mo i la’ua, ma taumafai ia fai oe ma se faataitaiga lelei. O le auala lena o le a e faamalosia ai lou aiga ma lau lava molimau, o le a e lagonaina ai ni lagona lelei sili atu, ma o le a fesoasoani foi le Alii ia e tumau malosi i le Ekalesia. Ia faia ma le faatuatua ma le naunauta’i, ma o le a tali mai o Ia i au tatalo.

O lo’u tamā e le o se tagata o le ekalesia, ae o lo’u tina ma o’u uso e le malolosi [i le Ekalesia]. O se mea tiga tele lo latou le amanaiaina o o’u talitonuga. Ae ua tuputupu ae lo’u faatuatua i lo’u auai atu i le seminare, lotu, ma le Mutuale ma a o o’u tatalo ma faitau i tusitusiga paia. O le fautuaga sili lava e mafai ona ou tuuina atu o le aua le fiu.

Ou te iloa se teineitiiti maoae lava o lē e ese le malosi i le Ekalesia e ui ina le toaaga ona matua. O ia o se faamalosiauga i isi teineiti aua ua uma ona maua lana pine a Tamaitai Talavou. Fai mai o ia, o le lagolago a isi tamaitai talavou, o le toaga i le lotu, ma le fesootai soo ma lona Tama oi le Lagi, o auala lelei uma ia e fesoasoani ia te ia e tumau ai lona malosi i le ekalesia.

Ou te faalagolago i le tatalo ma le faitauina o tusitusiga paia e faamalosia ai la’u molimau, ma ou te maua se sulufaiga saogalemu e ala i le auai i le Sikauti ma le polokalama a Alii Talavou, faapea ma le faataunuuina o o’u valaauga. E aoga foi le mulimuli i fautuaga a perofeta ma le filifilia o uo lelei. Ia manatua ia avea oe i taimi uma ma se faataitaiga lelei i lou aiga e ala i le faaali atu ia i latou o le alofa faamaoni, popole alofa, ma le faaaloalo. Afai e fai lau vaega, o le a fai e le Alii Lana vaega.

O lo’u tina e le toaga i le lotu, ae o isi tagata o lo’u aiga e le auai i le ekalesia. O le mea o loo o’u faia o le faalagolago lea i o’u taitai ma a’u uo; latou te fesoasoani mai ia te au i taimi uma. E taua tele i latou i lo’u olaga ona sa latou tofu sao i le ituaiga olaga sa ou ola ai ma la’u sini o le alu i se misiona. Latou te tuuina mai ia te au le tele o le lototele e ala i a latou faataitaiga. E tatau ona e talisapaia le faauoga a tagata o e o loo fesoasoani e lagolagoina oe i le avea ai o oe ma se tagata o le Ekalesia, ma faaalu se taimi tele ma i latou, e mautinoa lava o le a i ai i taimi uma se mea e sili atu e te aoaoina.

Ia faaauau pea ona e talanoa atu i ou matua, ma taumafai ia maua mai la laua lagolago. Ia ta’u atu lou alofa ma le talisapaia o i laua, ma t’au atu i ai le taua ia te oe o lou alu i le lotu. Talosaga atu i ou taitai mo le feaveaiina o oe [i le lotu], ma vaai pe mafai ona taumafai lou epikopo e talanoa i ou matua. Tatalo ma ole atu i le Tama Faalelagi mo Lana fesoasoani, ma tatalo ina ia amata ona iloa e ou matua o le tumau o lo laua malolosi i le ekalesia e taua lea ia te oe. E mafai foi ona e malosi atu e ala i le faitauina o le Tusi a Mamona i aso taitasi ma tausi poloaiga.

Ou te vaai soo lava i lenei tulaga i la’u misiona, ma o tamaiti e faafeagai ma lenei tulaga e ese le lotototoa. E faapefea ona latou faia? E ala i le atiina ae o se polokalama lagolagosua i totonu o le Ekalesia e ala atu i uo ma taitai, ma e ala i le atiina ae o se polokalama lagolagosua ma le Alii e ala i le tatalo, faitauina o tusitusiga paia i aso taitasi, ma le auai i le Lotu. E mafai ona e manumalo i le faia o nei mea!