O Le A le Uiga o le Togiola ia te Oe?

Masalo o le fuaiupu e sili ona ta’u soo i a tatou sauniga ma tusitusiga, o le faamaninoga matagofie ma le otootoga lenei o le fuaiupu mai le tusi a Mose: “Aua faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39).

Ona o le Toetu, o le a maua ai e i tatou uma le tino ola pea. Ona o le Togiola, o le a maua ma olioli ai i le ola e faavavau i latou o e ua lava le faatuatua i le Alii o Iesu Keriso e tauave ai i o latou luga Lona suafa, o e salamo ma ola e tusa ai ma Lana talalelei, o e tausia feagaiga na osia ma Ia ma Lona Tama, ma e e faia sauniga faaola o loo maua i auala ma nofoaga paia.

Ou te le manatua pe na ou fetaui i se tagata na faaalia se faatuatua malosi ia Iesu Keriso ma na matuā popole lava i le Toetu. Ioe, atonu ua tofu i tatou uma ma ni fesili e uiga i faamatalaga [o le Toetu], ae ua tatou malamalama o le folafolaga autu e maoae ma mautinoa.

Talu ai ona o le ola e faavavau e i ai ona tuaoi ma e manaomia ai a tatou taumafaiga ma le usiusitai, o le toatele o i tatou e tauivi mai lea taimi i lea taimi, atonu foi e fai soo—pe e le aunoa foi—ma ni fesili e uiga i le ola i se olaga ua tatou iloa e tatau ona tatou ola ai. Ae faapei ona fesili mai Elder David A. Bednar o le Korama a Aposetolo e Toasefululua e faapea, “[Pe] tatou te talitonu sese ea e tatau ona tatou faia na o i tatou lava le malaga mai le lelei e agai atu i le lelei sili atu ma avea ai ma au paia e ala i le naunautai atoa, pulunaunau, ma le aoaiga”?³

Afai o lo tatou faaolataga ua na o se tulaga o a tatou lava taumafaiga, o le a tatou oo i ni faigata ogaoga, aua o i tatou uma e le atoatoa ma e le mafai ona tatou usitaia atoa auala uma i taimi uma. E faapefea la, ona tatou maua le fesoasoani ma le lagolago tatou te manaomia? Na faamanino mai e Nifae le faafitauli i le sootaga i le va o le alofa tunoa ma galuega ina ua ia molimau mai, “Aua ua matou iloa e faaolaina i tatou i le alofa tunoa pe a uma ona faia mea uma tatou te mafaia” (2 Nifae 25:23).

Ua faamanatu mai e le Lomifefiloi o le Tusi Paia ia i tatou o le alofa tunoa o lona uiga o se auala faalelagi po o se mea faigaluega maoae e aumaia ai le malosi po o le fesoasoani e ala i le alofa fua ma le alofa o Iesu Keriso ua mafai ona maua e ala i Lana Togiola.⁴ O lea, e ala mai i le alofa tunoa o Keriso, ua mafai ai ona tatou toetutu, ma o Lona alofa tunoa, alofa, ma le Togiola e fesoasoani ia i tatou i le ausia o galuega lelei ma faataunuu ai faagasologa manaomia lea e semanu e le mafai ona faia pe ana faapea e tuutasi mai lava i o tatou lava gafatia ma punaoa.

O uiga faaalia o Nifae o se tasi lea o mea mai mea e tele ou te faamemelo ai ia te ia. Sa le faigofie lona olaga, ae maise lava pe a faatusatusa atu i le lagomalie lea e toatele i tatou ua manatu māmā i ai i aso nei. Sa nonofo Nifae ma lona aiga mo le tele o tausaga i le vao a o le’i taunuu atu i le nuu o le folafolaga. Sa latou pagatia i taimi o le fiaai, fiainu, ma tulaga matautia. Sa feagai Nifae ma ni faafitauli ogaoga faaleaiga lea na atili faaleagaina e Lamana ma Lemuelu, mulimuli ane, na o ese ai o ia ma i latou na mulimuli atu ia te ia, mai ia i latou na au ma Lamana ma Lemuelu.

I le feagai ai ma nei faigata ma faafitauli uma, ae na fai mai lava Nifae, “Ua oo foi ina nonofo i matou ma le fiafia” (2 Nifae 5:27).

Sa malamalama o ia e i ai se mamanu e ola ai lea e iu ai i le fiafia, tutoatasi i faigata, luitau, ma faanoanoaga e oo mai i o tatou olaga uma. Sa mafai ona taulai atu o ia i le vaaiga tele o le fuafuaga a le Atua mo ia ma lona nuu, ma na mafai ai ona aloese mai le olopalaina e lona le fiafia po o le matauga moni e faapea, e le fea le olaga. E le fea, ae sa fiafia lava o ia ma lona nuu. Sa latou malamalama o le a faia se Togiola, ma sa latou talitonu o le a aofia ai ma i latou.

Sa fesili Nifae ia te ia lava i ni fesili taua lea tatou te ono fesili ai foi ia i tatou lava a o tatou manatunatu i le tulaga o le Togiola a Keriso i o tatou lava olaga:

“O lenei foi, afai ua ou iloa mea e faapea ona tetele, afai ua asiasi le Atua i lona faamaulalo i le alofa e faapea ona tele i le fanauga a tagata, se a le mea e tagi ai lo’u loto ma faatalitali lo’u agaga i le vanu o le faanoanoa, ma ou tauau ina tinovale, ma faavaivai lo’u malosi ona o o’u puapuaga?

“Se a foi le mea ou te gauai ai i le agasala, ona o lo’u tino? Ioe, se a le mea ou te vaivai ai i tofotofoga, ia i ai le ua leaga i lo’u loto e faaumatia lo’u filemu ma faatigaina ai lo’u agaga? Se a le mea ua ou ita ai ona o lē ita mai ia te au?” (2 Nifae 4:26–27).

Ina ua mavae lona tagitui sa ia taliina ai loa ana lava fesili, ma le iloa o le ala e taulima ai ona faafitauli lea e tatau ona ia faia: “Lo’u agaga e, ina ala mai ia! Aua le toe vaivai i le agasala. Lo’u loto e, ina fiafia ia, ia le toe ulu mai le ita mai ia te au i lo’u agaga. … Le Atua e, ua ou faalagolago ia te oe, ou te faalagolago ia te oe e faavavau” (2 Nifae 4:28, 34).

O lona uiga ea o lenei mea sa le toe i ai ni faafitauli o Nifae? O lona uiga ea sa malamalama atoatoa o ia i mea uma na tutupu ia te ia? Manatua le tali sa ia tuuina atu i le agelu i ni nai tausaga i luma atu, ina ua fesiligia o ia i se fesili taua e uiga i le Togiola a Keriso, lea o le a tupu i le lumanai: “Ua ou iloa e alofa [le Atua] i ana fanau; a e ui i lea, ou te le iloa le uiga o mea uma” (1 Nifae 11:17).

E le mafai ma tatou te le iloa foi le uiga o mea uma, ae e mafai ma e tatau ona tatou iloa e alofa le Alii i Ana fanau, ma e mafai foi ona avea i tatou ma e mauaina uma le fuataga o le alofa tunoa o Keriso ma le Togiola i o tatou olaga faapea ma o tatou tauiviga. E faapena foi, ua tatou iloa ma e tatau ona manatua le valea ma le matautia o le tuuina atu i le tiapolo o se avanoa se tasi i totonu o o tatou loto.

E tusa lava pe ua tatou malamalama ma tautino atoatoa e tavavaeese mea leaga ma le tiapolo mai o tatou loto ma o tatou olaga, ae tatou te sese lava ona o le tele o taimi o i tatou o alii ma tamaitai o le “lalolagi” (tagai Mosaea 3:19). O lea, e tatau ai ona tatou faafetai mo le ma avea ma tagata e ola i le mataupu faavae o le salamo. E pei ona masani ona tatou talanoa ai e uiga i lo tatou salamo o se mea e tupu, lea o nisi taimi e tupu ai, ae mo le toatele o i tatou, o se tulaga faifaipea o se faagasologa tumau e mo le olaga atoa.

O le mea moni, e i ai agasala o le le faia o le mea e tatau ona tatou faia ma le faia o le mea e le tatau ona tatou faia, lea e mafai ona tatou vave amataina ai le faagasologa o le salamo. O loo i ai ituaiga agasala ma measese faapitoa lea e mafai ona tatou lafoaia i le taimi nei ma lē toe faia lava. Mo se faataitaiga, e mafai ona avea i tatou ma ni tagata e totogi atoa sefuluai mo aso uma o totoe o o tatou olaga, e tusa lava pe afai e le o le tulaga lea sa masani ona i ai. Ae o isi itu o o tatou olaga e manaomia ai lo tatou alualu i luma faifaipea ma le taulaiga tumau, e pei o lo tatou faaleagaga, alolofa, magafagafa i isi, nofouta i isi tagata o le aiga, manatu popole mo tuaoi, malamalamaaga i tusitusiga paia, auai i le malumalu, ma le tulaga lelei o a tatou tatalo faaletagata lava ia.

E mafai ona tatou faafetai i le Faaola, ona o [Lona] silafiaina lelei o i tatou nai lo lo tatou iloaina o i tatou lava, i lona amataina o le faamanatuga ina ia mafai ona tatou faafouina ai e le aunoa a tatou feagaiga e ala i le aai ma feinu i faatusa paia ma se tautinoga e tauave i o tatou luga Lona suafa paia, ia manatua pea o Ia, ma tausi Ana poloaiga. A o tatou mulimuli i le mamanu e mafai ai ona tatou “nonofo ma le fiafia,” o le a faapena ona faia e lo tatou salamo ma a tatou faatinoga se tulaga lelei e maualuga atu, ma faapea foi ona faateleina ai lo tatou gafatia e malamalama ma talisapaia ai le Togiola.

I vaiaso a o lei oo i le faatulagaina o le Ekalesia i le 1830, na maua ai e le Perofeta o Iosefa Samita se faaaliga matagofie lea e faaopoopo mai i lo tatou malamalama i le Togiola, aua o le Faaola lava Ia o loo fetalai ma aoao mai. Sa Ia faamatalaina o Ia lava “o le Togiola o le lalolagi” (MFF 19:1), ma faailoa mai sa mulimuli o Ia i le finagalo o le Tama, ma fetalai mai, “Ou te poloai atu ai ia e salamo, ma tausi i poloaiga ua e maua” (MFF 19:13).

O lenei mamanu faigofie o le salamo ma le usiusitai o le mea moni, o le faavae lea o le “nonofo ma le fiafia.” Ua tatou iloa o le mea lenei e tatau ona tatou faia, e ui ina o nisi taimi e galo ai ia i tatou le mafuaaga. Ua faamanatu mai e le Alii ia i tatou le mafuaaga i upu nei mai lea lava faaaliga:

“Aua faauta, o au le Atua na puapuagatia i nei mea mo tagata uma, ina ia latou le puapuagatia pe afai latou te salamo;

“A e peitai, afai latou te le salamo e ao ina latou tiga e pei o au;

“O le tiga lea na faagateteina ai au lava, o le Atua, le silisili ese i mea uma, ona o le tiga ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le upu oona, ae teena—

“A e ui i lea, ia i le Tama le viiga, ma na ou inu ma faaumaina ai a’u sauniuniga i le fanau a tagata” (MFF 19:16–19).

Oka se lesona ina a mataina Ou te mautinoa e leai se tasi o i tatou e mafai ona vaai i le ogaoga ma le loloto o tiga o le Alii a o Ia faataunuuina le Togiola sili. Ou te masalo foi sa le’i i ai se silafia atoa o Iosefa Samita i lena taimi e uiga i puapuaga o le Faaola, e ui ina sa maua e le Perofeta le talisapaia sili atu ma le malamalama mai ona lava tofotofoga ma sauaga i tausaga mulimuli ane. Mafaufau i le faatonuga aoa’i na tuuina mai e Iesu lava Ia ina ua Ia fautuaina ma faamafanafanaina Iosefa i itula pogisa o lona faafalepuipuiina i le Falepuipui o Liperate. Na fetalai mai le Alii: “Na oo ifo i lalo o mea uma le Atalii o le Tagata. Pe sili ea oe i lo ia?” (MFF 122:8).

O lenei fesili ia Iosefa o se fesili foi lea ia i tatou taitoatasi i a tatou lava tauiviga ma luitau patino. E leai se tasi o i tatou e tatau ona masalomia le tali sa’o.

E faapea, na oo Iesu i le mea na tupu ia te Ia, e le faapea ona e le mafai ona Ia taofia ae ona o Lona alofa ia i tatou, e matuā ogaoga lava. E alofa foi ma faamamalu Iesu i Lona Tama i se loloto ma le faamaoni lea e na ona mafai ona tatou vaai faalemafaufau i ai. Afai tatou te mananao e toe taui atu le faamamalu ma le alofa i le Faaola, e le tatau la ona galo ia i tatou sa Ia faia le mea na Ia faia mo i tatou, ina ia tatou le pagatia i ia lava mafatiaga e manaomia mai ia i tatou e le faamasinoaga tonu.

O le sasa, faigata, sauaga, fao, ma le atuatuvale tele ma puapuagatia na taitaiina uma atu lava i Lona oo i le tiga matuitui lea e le mafai e soo se tasi ona onosaia, e aunoa ma Lona mana ma aunoa ma Lona naunautai e tumau ai i le ala ma onosaia ai mea uma na mafai ona tuuina atu ia te Ia.

A o tatou mafaufau i le loloto o le Togiola ma le naunautai o le Faaola e puapuagatia mo a tatou agasala uma, e tatau ona tatou faailoa atu ma le faafetai o le taulaga togiola o loo aofia ai le tele ma le anoanoai o isi mea! Mafaufau i upu nei a Alema i tagata faamaoni o Kitiona lea na toeitiiti atoa le seneturi talu ona fai ae faatoa faataunuuina le Togiola:

“E maliu foi [Iesu], e onosai i mea tiga, ma puapuaga, ma tofotofoga uiga eseese; e faapea foi ina ia faataunuuina le upu ua faapea mai, na te ave i ona luga puapuaga ma ma’i o lona nuu.

“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu; na te ave foi i ona luga o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi ai lona nuu e tusa ma o latou vaivai.

“O lenei, ua silafia e le Agaga mea uma, a e ui i lea, e tigaina le Alo o le Atua i le tino, ina ia ave i ona luga agasala a lona nuu, ina ia tineia foi a latou solitulafono e tusa ma le mana o lona faaolaina; o lenei foi faauta, o le mau lea ua ia te au” (Alema 7:11–13).

Mafaufau i se fofo atoatoa ma le loloto mo o tatou tiga, mafatiaga, faaosoosoga, ma’i, agasala, faanoanoaga, ma soligatulafono. Mata e mafai ona e mafaufauina se isi lava filifiliga e sui a’i le Togiola a Iesu? Ona faaopoopo atu lea i ai o le Toetu e le mafaatusalia, ona amata ai lea ona maua si o tatou fasi malamalama e pepese ai, “Ou te tu ma ofo i le alofa o Iesu mo a’u.”⁵

O le a le uiga o le Togiola ia te oe ma a’u? O lona uiga o mea uma lava. E pei ona faamalamalama mai e Iakopo, e mafai ona tatou “faalelei ma [le Tama] i le togiola a Keriso, o lona Alo e toatasi” (Iakopo 4:11). O lona uiga e mafai ona tatou salamo, o mai tatou te aufaatasi ma talia atoatoa o Ia, ma aloese i measese po o feeseeseaiga e faapea ona “faafitia le alofa o Keriso, ma faaleaogaina le togisala mai ia te ia ma le mana o lona togiola” (Moronae 8:20).

Tatou te aloese mai le le faamamaluina ma le le faaaloalogia o le Togiola a le Faaola i le usitaia o le fautuaga a Helamana, lea e tutusa lava le taua i onaponei e pei ona sa i ai i tausaga na muamua atu lava i le afio mai o le Alii i le lalolagi: “Ioe, ia manatua, ia manatua lava, ou atalii e … e leai se isi ala po o se tasi mea e mafai ona faaolaina ai tagata, a e na o le toto togisala o Iesu Keriso, o Le afio mai; ioe, ia oulua manatua e afio mai o ia e togiola le lalolagi” (Helamana 5:9).

E moni lava o Lana Togiola e aofia ai le lalolagi ma tagata uma mai lava i le amataga e oo i le gataaga. Ae peitai, aua nei galo ia i tatou, o lona loloto ma le atoatoa e faapena foi ona matuā patino ma tulagaese le mamanuina ina ia fetaui lelei ma faailoa lelei ai o tatou lava tulaga taitoatasi. E sili atu le silafia lelei e le Tama ma le Alo o i tatou taitoatasi nai lo lo tatou iloaina o i tatou lava, ma ua saunia ai se Togiola mo i tatou lea e fetaui tonu lava ma o tatou manaoga, luitau, ma gafatia.

Ia siia’e le faafetai i le Atua mo le meaalofa o Lona Alo, ma ia faafetaia le Faaola mo Lana Togiola. E moni ma o loo galueaiina nei ma o le a taitaiina ai i tatou i mea e tatau ma moomia ona tatou i ai.