Ko e Foki Lelei ki he Tamai Hēvaní

Lolotonga ʻeku ako ke u hoko ko ha pailaté, naʻe pau ke u ako ki hono fakafolau e vakapuná ʻi ha vaha mamaʻo. ʻOku fie maʻu ke palani lelei e puna ʻi he vahaʻa ʻo e ngaahi ʻōseni lalahí, kolosi ʻi he ngaahi toafa lalahí, mo e fakafehokotaki ʻo e ngaahi konitinēnití, ke fakapapauʻi ʻe fai ha tūʻuta lelei ki he feituʻu ne palani ki aí. ʻOku aʻu ha niʻihi ʻo e ngaahi puna hokohoko ko ʻení ʻo houa ʻe 14, ʻi ha maile ʻe meimei 9,000 (km ʻe 14,500).

ʻOku ʻi ai ha tuʻunga mahuʻinga ke fai ai ha fili he lolotonga ʻo e faʻahinga puna lōloa peheé ʻoku ʻiloa ko e tuʻunga ʻo e foki leleí. Ko ʻene aʻu mai ki he tuʻunga ko ʻení ʻoku kei maʻu pē ʻe he vakapuná ha lolo feʻunga ke foki lelei ai ki he malaʻe vakapuna ne mavahe mei aí. Ko ʻene fakalaka pē he tuʻunga ko iá, ʻoku ʻikai ha toe fili ʻa e kapitení ka ke hoko atu ai pē. Ko hono ʻuhinga ia ʻoku faʻa ui ai ʻa e taimi ko ʻení ko e tuʻunga ʻo e tapu tafokí.

ʻOku loto ʻa Setane ke tau pehē ʻi he taimi kuo tau faiangahala aí, kuo tau fakalaka ʻi he “tuʻunga ʻo e tapu tafokí”—pea kuo fuʻu tōmui ke tau tafoki. Ko e Fakalelei ʻa Sīsū Kalaisí ko e meʻaʻofa ia ʻa e ʻOtuá ki Heʻene fānaú ke fakatonutonu mo ikunaʻi ʻaki ʻa e ngaahi nunuʻa ʻo e angahalá. Naʻe hifo mai ʻa Kalaisi ke fakamoʻui kitautolu. Kapau ne tau fai ha meʻa hala, ʻe lava ke fakapapauʻi mai ʻe he Fakalelei ʻa Sīsū Kalaisí ʻoku ʻikai ha tuʻunga ia he angahalá ʻe tapu ke toe foki mei ai. ʻE lava pē ha foki lelei mei ai ʻo kapau te tau muimui ki he palani ʻa e ʻOtuá maʻa hotau fakamoʻuí.

Ko e taimi pē ʻokú ke kau atu ai ki he fononga ko ʻeni ʻo e moʻuí, neongo pe ko e hā e ngaahi faingataʻa te ke fehangahagai mo iá, ʻoku ʻi ai maʻu pē ha tuʻunga ia ke ke foki lelei mai ai; ʻoku ʻi ai maʻu pē ha ʻamanaki lelei. Ko koe ʻa e ʻeikivaka ʻi ho vaká, pea kuo teuteuʻi ʻe he ʻOtuá ha palani ke toe fakafoki lelei mai ai koe kiate Ia, ki ho ikuʻanga fakalangí.

ʻOku ʻomi ʻe he meʻaʻofa ʻo e Fakalelei ʻa Sīsū Kalaisí, he taimi kotoa pē pea ʻi he potu kotoa pē, ʻa e ngaahi tāpuaki ʻo e fakatomalá mo e fakamolemolé. Tuʻunga ʻi he meʻaʻofa fakalangí ni, te tau lava kotoa ʻo maʻu ai ha faingamālie ke foki lelei atu mei he hala fakatuʻutāmaki ʻo e angahalá. ʻE fakapaleʻi kitautolu ʻaki ʻa e fiefia ʻi he moʻuí ni mo e fiefia taʻengata ʻi he moʻui ka hoko maí ʻo kapau te tau fili ke tali pea fakaʻaongaʻi e meʻaʻofa ko ʻeni mei heʻetau Tamai Hēvaní.