E Talia i Soo Se Gagana

O e i ai i se paranesi po o se uarota o ona tagata e le tautatala uma i le gagana e tasi? A o faaauau ona faatupulaia le Ekalesia i le lalolagi atoa, ua tele ai lava ina tupu lenei aafiaga. E lua tausaga na ma auai ai ma lou toalua i se paranesi faapena i Niu Ioka. Na aoga lava ou tomai o le aoaoina o le Igilisi i tagata e tautatala i isi gagana, ae e tusa foi pe leai sou poto masani faapenei, e tele lava mea e mafai ona e faia e fesootai ai le va o talanoaga ma isi o e e le tautatala i lau gagana moni.

Ataata ma faafeiloai atu i isi tagata. Fai se taumafaiga e aoao ai le faatalofa atu i isi tagata i a latou gagana moni. Ae e tusa lava pe le mafai ona e tautala i se upu o la latou gagana, e mafai lava ona e faia ia latou lagona e talileleia i latou. O Aso Sa uma lava, e faafeiloai ai au e Mata i se opo mafanafana ma se faafeiloaiga i le faaSipaniolo. E ui ina sa ou le malamalama i ana tala, ae na ou lagonaina lona alofa e ala i lana opo ma le malu o lona leo.

Tali atu i le kalama sa’o. E aoao e tagata se gagana, i vaega, e ala i le faalogo i ai. E sili atu le aoao o se tasi i le, “E le o i ai la’u tusi lesona” nai lo le “Leai tusi lesona.” E tusa lava pe sasisasi le tautala a le isi tagata, ia tali atu i le gagana sao. O lenei mea e faaalia ai le faaaloalo i isi ma fesoasoani foi latou te aoao ai le gagana sao.

Tautala lemu, ae le o le leotele. O upu e masani ona milo faatasi pe a tatou faalogo i ai, ae maise lava pe afai o se tasi o loo aoaoina se gagana fou. A e tautala, ia faagesegese ina ia mautinoa e faigofie ona malamalama tagata ia te oe. E le manaomia ona tautala leotele, sei vagana e i ai se faafitauli i le faalogo a le isi tagata. Afai o oe o se faiaoga, ia e faaaofia ai tagata e le tautatala i le gagana moni pe a latou maua se avanoa e malamalama ai i le fesili ma fai ai se tali faigofie. Ia uunaia isi e fesoasoani atu, e fatuina ai se lagona o le faauo ma le sololelei i totonu o le potuaoga.

Faaaoga mea faitino. Mo se faataitaiga, atonu o le a le malamalama tagata e le tautatala i le gagana moni i upu uma o se lesona e uiga i le Uluai Faaaliga. Ae o le a latou malamalama i se ata o Iosefa Samita o tootuli i luma o le Atua ma Iesu Keriso. O le a mafai foi ona faateleina la latou vaogagana e ala i le faamasani i upu e te faaaogaina i le tala o le Toefuataiga ua uma ona latou iloaina.

Tusi i luga o le laupapa mau ma tusi e faasino i ai le lesona. E faigofie ai i tagata e le tautatala i le gagana moni ona sue ia mau ma lesona. O le mea e lelei ai, o a tatou tusi lesona ma tusitusiga paia o loo maua i ni gagana eseese. A o faitau leotele e se tagata ia mau, e mafai e isi tagata o le vasega ona mulimuli faatasi ai i tusi ma mea e faaaoga i a latou lava gagana. E le gata ina mafai ona auai ai tagata uma o le vasega, ae e uunaia ai foi tagata o le vasega e aumai a latou tusitusiga paia ma tusi lesona.

Ia avea ma faiaoga asiasi po o faiaoga o aiga sili atu ona lelei. Ofo atu e fesoasoani ia i latou e fou atu i lo outou atunuu. Mo se amataga, atonu e mafai ona e fesoasoani atu i a latou faatauga, faaaoga le falemeli, pe lesitala mo le aoga.

O nisi o au faauoga e sili ona pele i Niu Ioka na faia lea ma i latou e toetoe a le mafai ona ou tautala i ni upu se lima i la latou gagana. Na ou iloaina sa latou manaomia lau fesoasoani, ma na lava lena e amata ai se faauoga.