Moapil sa Kinasingkasing nga Pag-ampo

Julie B. Beck, kinatibuk-ang presidente sa Relief Society: “Hunahunaa ang atong gitipon nga kalig-on kon matag sister adunay sinsero nga pag-ampo matag buntag ug gabii gani, mas maayo pa, mag-ampo sa walay paghunong ingon nga gisugo sa Ginoo. Kon ang matag pamilya adunay inadlaw nga pag-ampo … , kita mas malig-on” (“Unsay labing Maayo nga Mahimo sa Santos sa Ulahing mga Adlaw nga mga Babaye: Barug nga Lig-on ug Dili Matarug,” Liahona Nob. 2007, 110).

Elder Bruce R. McConkie (1915–85) sa Korum sa Napulog Duha ka mga Apostoles: “Ang mga pag-ampo makapausab sa atong mga kinabuhi.” Pinaagi niini kita maduol sa Ginoo, ug iyang idunol ang iyang tudlo ug mohikap kanato, aron kita dili na kay mao lang gihapon.

“Ang pag-ampo usa ka taas nga tore sa kalig-on, usa ka gilis sa walay katapusan nga pagkamatarung, usa ka gamhanan nga pwersa nga makabalhin og mga bukid ug makaluwas og mga kalag” (“Patterns of Prayer,” Ensign, Mayo 1984, 32).

Elder M. Russell Ballard sa Korum sa Napulog Duha ka mga Apostoles: “Ang matag matinud-anon ug kinasingkasing nga pag-ampo modugang og laing piraso sa taming sa lawas. … Usa sa labing importante nga mga pamaagi sa pagsul-ob sa inyong kaugalingon sa taming sa Dios mao ang pagsigurado nga ang pag-ampo—matinguhaon, kinasingkasing, makanunayon nga pag-ampo—gihimo nga bahin sa inyong matag adlaw nga kinabuhi” (“Be Strong in the Lord,” Ensign, Hulyo 2004, 10).

D&P 112:10: “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo”.

Presidente James E. Faust (1920–2007), Ikaduhang Magtatambag sa Unang Kapangulohan: “Una, ang pag-ampo mao ang mapainubsanong pag-ila nga ang Dios mao ang atong Amahan ug si Ginoong Jesukristo mao ang atong Manluluwas ug Manunubos. Ikaduha, kini usa ka kinasingkasing nga pagkumpisal sa sala ug sa kalapasan ug usa ka paghangyo alang sa kapasayloan. Ikatulo, kini usa ka pag-ila nga kita nanginahanglan og tabang sa dili maabut sa atong kaugalingong mga abilidad. Ikaupat, kini usa ka oportunidad sa pagpakita sa atong pagpasalamat ngadto sa atong Tiglalang. Importante nga kita kanunay mosulti: ‘Kami mapasalamaton Kanimo … ,’ ‘Kami miila Kanimo … ,’ ‘Kami mapasalamaton nganha Kanimo …’ Ikalima, kini usa ka pribelihiyo nga makapangayo sa Dios alang sa piho nga mga panalangin.

“… Ang kinasingkasing nga pag-ampo naggikan sa kasingkasing. Sa pagkatinuod, ang kinasingkasing nanginahanglan nga kita mokuha gikan sa matinguhaon nga mga pagbati sa atong mga kasingkasing” (“The Lifeline of Prayer,” Liahona, Hulyo 2002, 62).

Elder David A. Bednar sa Korum sa Napulog Duha ka mga Apostoles: “Ang makahuluganong pag-ampo nagkinahanglan sa balaan nga pagpakigsulti ug gipahinungod nga buhat. Ang mga panalangin nagkinahanglan og paningkamot sa dili pa kini nato madawat, ug ang pag-ampo, isip ‘matang sa trabaho, … maoy gitudlo nga paagi nga maangkon ang labing taas sa tanang mga panalangin’ (Bible Dictionary, “Prayer,” 753). Kita magpadayon ug molahutay sa gipahinungod nga trabaho sa pag-ampo human kita moingon og “amen” pinaagi sa pagbuhat sa mga butang nga atong gisulti ngadto sa Langitnong Amahan (“Pangayo pinaagi sa Hugot nga Pagtuo,” Liahona, Mayo 2008, 95)

Presidente Thomas S. Monson: “Sa atong paghalad ngadto sa Ginoo sa atong pamilya ug sa atong personal nga mga pag-ampo, ato kining buhaton uban sa hugot nga pagtuo ug pagsalig Kaniya. Hinumduman nato ang sugo ni Apostol Pablo ngadto sa mga Hebreohanon: ‘Kay bisan kinsa nga magaduol sa Dios kinahanglan magatuo sa iyang pagkaanaa ug nga siya magabalus ra sa mga magapangita kaniya.”’ Kon si bisan kinsa kanato hinay nga mopatalinghug sa tambag nga mag-ampo kanunay, walay mas maayo nga panahon sa pagsugod kondili karon” (“Usa ka Harianong Priesthood,” Liahona, Nob. 2007, 61).