Ikaw Nasayud Na

Sama ni Nephi, ako natawo sa mga ginikanan kinsa nagtudlo kanako sa ebanghelyo. Ang akong pamilya naghimo sa pagtuon sa kasulatan ug pag-ampo sa pamilya matag adlaw. Ako naminaw samtang ang akong mga ginikanan nagpamatuod kabahin kang Joseph Smith, sa Basahon ni Mormon, ug sa matag baruganan sa ebanghelyo. Tungod niini nga mga kasinatian, ako wala gayud magduha-duha nga ang Simbahan tinuod.

Apan sa usa ka piho nga punto, bisan natudloan na sa ebanghelyo ug nagkat-on gikan sa maayong mga ehemplo sa akong mga ginikanan, akong naamgohan nga samtang ako wala nagduha-duha nga ang Simbahan tinuod, ako usab walay mainitong pagpamatuod sa kamatuoran niini. Ug bisan og ako nangandoy sa akong tibuok kinabuhi nga moadto og misyon, ako nakahibalo nga ako kinahanglang masayud sa kasigurohan nga ang ebanghelyo tinuod.

Wala madugay sa wala pa ko nag-18, ako misugod sa pagtambong og klase sa pagpangandam og misyon sa ward. Ako usab misugod sa paghupot og journal.

Usa ka adlaw diha sa klase sa pagpangandam og misyon, kami adunay usa ka leksyon nga dili gayud nako makalimtan. Ang hilisgutan mao “Ang Basahon ni Mormon—ang Kasingkasing sa Misyonaryo nga Buhat.” Ang magtutudlo mipakita kanamo og usa ka video mahitungod sa mga kabatan-onan sa tibuok kalibutan nga nagpakigbahin sa ilang mga pagpamatuod sa Basahon ni Mormon ug ang kasinatian sa usa ka batan-ong lalaki kinsa wala pa makahukom sa paglarga og misyon hangtud nga siya nangutana sa Dios.

Ang magtutudlo dayon mihangyo kanamo sa pagpakigbahin sa among mga pagpamatuod. Ang Espiritu dili gayud mapugngan. Akong naamgohan nga ang Basahon ni Mormon mipanalangin sa akong kinabuhi. Hinoon, akong naamgohan usab nga ako wala pa nag-ampo ug nangutana sa Dios kabahin sa kamatuoran sa Basahon ni Mormon o kabahin sa Unang Panan-awon ni Joseph Smith.

Pipila ka mga adlaw ang milabay ako nagbasa sa Basahon ni Mormon ug mihukom nga sulayan ang saad ni Moroni (tan-awa sa Moroni 10:3–5) Ako miluhod ug mibu-bu sa akong kalag ngadto sa Dios. Ako wala masayud kon sa unsang paagi nga ang tubag moabut o kanus-a ako makadawat niini, ako misalig nga Iyang ipadayag kining mga butanga ngari kanako sa Iyang kaugalingong panahon.

Sa dihang ako mibarug, akong gibati ang usa ka tinguha nga mosulat sa akong journal. Akong giablihan ang akong journal ug gibasa ang katapusan nakong gisulat, nga niadto pang miaging Dominggo human sa akong klase sa pagpangandam og misyon. Sa dihang akong gibasa ang akong kaugalingong mga pulong, diin mihulagway kon unsa ang akong gibati, usa ka malinawon nga pagbati ang akong gibati nga milukop sa akong tibuok lawas. Uban sa dakong kasigurohan ako mibati sa akong kasingkasing sa mga pulong, “Ikaw nasayud na, ikaw nasayud na.”

Ako miluhod pag-usab ug mipasalamat sa Langitnong Amahan alang sa pagtubag sa akong pag-ampo. Akong nadawat ang tubag nga misiguro sa unsay akong gituohan sa akong tibuok kinabuhi.

Karon, ako maisugong makapamatuod nga si Joseph Smith nakakita sa Amahan ug sa Anak ug ang Basahon ni Mormon tinuod. Nga nakahibalo nga ako nasayud, ako nakaalagad og full time nga misyon sa Peru Piura Mission. Sa akong misyon, akong nakita giunsa sa Ginoo pagtubag ang mga pag-ampo niadtong kinsa mapainubsanong nangita sa kamatuoran. Ug alang niini ako sa kanunay mapasalamaton.