Ang Gugmang Putli Mipuno sa Among Kasingkasing

Ang akong mga anak nga babaye, nag-edad og 8 ug 10, mora og hinay-hinay nga nagkalagyo sa usag usa. Isip ilang inahan, ako nasakitan nga nakakita sa dili pagsinabtanay nilang duha ug ang suko nga mga nawong nga ilang gipakita sa usag usa.

Niining panahona ako kinasingkasing nga nag-ampo nga ang Dios motabang kanako sa akong kaugalingong mga kahuyang. Ako nag-ampo nga Iya kong tabangan nga makat-on unsa ang akong kinahanglan nga makat-unan kabahin sa gugmang putli, ug ako nadala ngadto sa pipila ka nindot nga mga bersikulo sa kasulatan.

Usa ka gabii miinit ang ulo sa usa sa akong anak nga babaye. Ako nasuko ug, paghuman nako og grabe nga kasaba kanila, ako masuk-anong migawas aron sa pagpabugnaw ug paghunahuna. Human sa pipila ka minuto, ang Espiritu misugod sa pagpahumok sa akong kasingkasing, nag-aghat kanako nga mosulod ug mangayo og pasaylo sa akong kinamagulangan nga anak nga babaye, kinsa akong nakasab-an pag-ayo.

Sa dihang ako misulod sa iyang kwarto, akong nakita ang akong 10-anyos nga anak nga babaye nagluhod sa kilid sa iyang kama, naghilak. Siya mitan-aw kanako nga may luha sa iyang mga mata ug miingon, “Wala ko kahibalo unsa ang akong buhaton.” Siya miingon kanako nga gusto niya nga mag-ampo ug magbasa sa iyang mga kasulatan aron ma-arang-arang ang iyang pamati, apan dili niya mabuhat tungod kay lain kaayo ang iyang gibati.

Sa dihang siya misulti kanako unsa siya kaguol sa iyang bahin tungod sa among panaglalis ug dayon miingon nga dili ako ang angayan nga basulon, o, unsa ka dako sa kaulaw nga akong gibati. Kami nagkaistoryahanay og kadiyot ug dayon mipakli ngadto sa mga kasulatan, diin ako nagbasa kaniya kabahin sa gugmang putli, “ang tiunay nga gugma ni Kristo” (Moroni 7:47), ug mipakigbahin sa pipila ka mga butang nga akong nakat-unan. Niana nga higayon ang iyang manghud nga babaye mitan-aw sa kwarto, ug amo siyang gidapit sa pag-apil kanamo. Dayon ako mipasabut, sa mga pulong nga masabtan sa usa ka otso-anyos, kon unsa ang among nabasahan kabahin sa gugmang putli.

Paghuman nako, ang duha ka mga babaye milingi kanako sa bukas nga mga mata nga nagpakita og interes ug usa ka tinguha nga mapuno niining dakong gugma nga gisulti dinhi sa mga kasulatan. Kami dayon nangluhod ug, sama sa tambag ni Mormon, kami mapainubsanon nga nangayo sa Amahan sa pagpuno kanamo niini nga gugma (tan-awa sa Moroni 7:48).

Natandog pinaagi sa Espiritu, kami dili makapugong sa paghilak. Kami mitindog, nagginaksanay, ug nagpakita sa among gugma sa usag usa. Nianang higayona ako nakakita og usa ka mahangturon nga panag-igsoonay ug panaghigalaay nga misugod sa pagtubo tali sa akong duha ka mga anak nga babaye, ug ako mibati og kahupay.

Ang ilang relasyon nagpadayon nga nagtubo sukad niadto. Sila adunay mas dakong tinguha sa pagsulbad sa ilang mga panaglahi, nagpakita nga mas mapailubon, ug makigbahin sa ilang mga butang. Ako mapasalamaton sa ilang matarung nga mga tinguha ug mga paningkamot.

Ako kanunay nga mohandom niana nga kasinatian, ug nag-ampo nga aduna pay mas daghan nga mahitabo sama niini samtang kami magpadayon sa paglig-on sa mga higot sa gugmang putli ug paghigugma sa among panimalay.