Ako dili miyembro sa inyong simbahan, apan ako mibati nga ang Liahona, diin ako nakadawat gikan sa usa ka higala sa trabaho, maawhagon gyud kaayo. Kini usab mapanudloon kaayo, ilabi na ngadto sa mga bata ug kabatan-onan. Ug kini usab nakatabang kanako. Ako ganahan sa mga artikulo gikan sa regular nga mga miyembro kinsa nagpakigbahin sa ilang mga kasinatian nga nakahimo sa paglambo sa ilang hugot nga pagtuo. Ang mga paghulagway makadani gayud kanako. Kini gidrowing nga klaro ug makahuluganon kaayo. Busa tuguti ko nga mosulti, nindot kaayo nga pagkabuhat ug daghan kaayong salamat.

Sa dihang bag-o pa ko nahimong usa ka miyembro sa Simbahan, ako dili interesado sa pag-subscribe og Liahona. Dayon ako nahimong dili kaayo aktibo sulod sa mubo nga panahon. Sa dihang ako naghimo og tumong sa pagbalik ngadto sa pagkaaktibo sa Simbahan, ako nagsubscribe og Liahona. Pagkahuman adto, ako dayon nakaamgo unsa nga esprituhanong bahandi nga akong napakyas. Kini nga magasin dili lamang impormasyon gikan sa Simbahan apan usa ka paagi sa pagpahayag diha sa mga miyembro, pinaagi niini posible nga mopakigbahin sa mga pagpamatuod, mga kasinatian, mga mensahe, ug tambag alang sa atong panahon. Kini nga magasin adunay mga pagtulun-an nga mahimong magamit kada adlaw.