Upat ka mga Pakigpulong, Upat ka mga Kinabuhi ang Nausab

Sa mubong panahon human ang akong bana midawat sa iyang master’s degree, siya naghunahuna sa pagbalik og eskwela alang sa PhD. Kini nga panglantaw nakadismaya kanamo tungod kay ang pag-angkon sa iyang master’s degree hilabihan kalisud. Kami adunay duha ka gagmay nga mga anak ug dugay na nga nangandoy nga makaangkon og maayo nga trabaho ug bisan gani usa ka balay.

Kadto nga komperensya sa Oktubre, si Elder Jeffrey R. Holland sa Korum sa Napulog Duha ka mga Apostoles mipakigbahin og pipila sa iyang mga kasinatian kabahin sa pagbalhin sa iyang bag-ohay pa nga nagsugod nga pamilya ngadto sa Connecticut alang sa graduate school. Kami usab mibalhin sa Connecticut alang sa graduate school. Dayon siya mihulagway giunsa niya ug ang iyang pamilya gipaigo ang tanan nilang kabtangan ngadto sa ilang gamay nga sakyanan—among gibuhat ang susama nga butang. Siya mipasabut nga sa dihang siya misugod sa pagbyahe, ang iyang sakyanan na-overheat ug naaberiya dili lamang kausa apan kaduha! Ang among sakyanan usab naaberiya og kaduha.

Sa katapusan, siya mihulagway og mas bag-o nga kasinatian sa pagdrayb og kasaligan nga sakyanan sa samang dapit diin ang iyang sakyanan naaberiya mga 30 na ka mga tuig ang milabay. Sa iyang hunahuna, iyang nakita ang iyang kaugalingon isip usa ka batan-on nga amahan ug miingon niining mga pulong: “Ayaw gayud og hunong, dong. Ayaw gayud og undang. … Adunay tabang ug kalipay sa unahan—daghan gayud niini. … Padayon sa pagka-positibo. Kini mahimong mamaayo ra sa katapusan. Salig sa Dios ug pagtuo sa maayo nga mga butang nga moabut.”¹ Ang kasinatian ni Elder Holland nakatabang kanako nga mobati nga ako nasabtan ug gihigugma. Ang iyang ehemplo naghatag kanako og kaisug sa pagpangita og espirituhanon nga pagsaksi nga ang dugang edukasyon alang sa akong bana mao ang kabubut-on sa Ginoo alang sa among pamilya. Lima ka tuig ug duha ka mga anak sa kaulahian, ang akong bana nakahuman na sa iyang dissertation. Ang pag-eskwela sigurado gayud nga mahagiton, apan kami nagmalipayon. Kami misunod sa kabubut-on sa Ginoo, ug Iya kaming napanalanginan sa pisikal, espiritwal, ug pinansyal nga paagi.

Sukad niadto nga komperensya, ako kanunay naghunahuna kabahin sa pakigpulong ni Elder Holland. Ako nakakat-on nga sa diha nga ako naningkamot sa pagsalig sa Dios pinaagi sa pagsunod sa tambag sa Iyang mga propeta ug mga apostoles, maayong mga butang mahimong moabut.

Sa dihang bata pa, ako malingaw nga magsulat para sa akong lola. Siya nagpuyo sa pikas nasud, busa ako panagsa ra makakita kaniya kausa sa usa ka tuig. Apan isip usa ka batan-on, ako hinay-hinay na nga nahimong busy kaayo og panagsa na lang makasulat, ug among relasyon hinay-hinay nga nawala. Kon si Lola mobisita sulod sa pipila ka mga adlaw, ako panagsa lang mangutana kaniya o mosulti og komento, apan ang among pag-istoryahanay dili gayud tinuoray o kinasingkasing. Sa dihang ako nag-16 na, ako wala na gayud kaayo makaila kaniya, ug dili nako kahibalo unsaon sa pag-istorya kaniya.

Sa katapusang adlaw sa usa sa iyang mga pagbisita, ako nag-inusara nga naglingkud sa kusina nag-andam og panihapon sa dihang siya miabot ug milingkod. Ako miabi-abi kaniya, apan pagkahuman ako wala nay mga pulong mga masulti. Ako makaingon nga siya ganahan nga makig-istorya kanako ug siguro nagpangita og kahigayonan sa dugay na nga panahon, apan unsaon nako sa pagsugod og istorya ngadto sa 75 anyos nga tigulang nga babaye nga sa akong hunahuna kami walay kaparehas nga hisgutan?

Ako mikomento kabahin sa akong giluto, apan kana nga hilisgutan wala magdugay. Sa katapusan, ako nangutana ni Lola kabahin sa iyang kinabuhi sa dihang siya sama sa akong edad. Siya misulti kanako og mga istorya kabahin sa trabaho ug sosyal nga mga kalihokan, dayon nag-istorya kabahin kon giunsa niya paghimamat ang akong lolo ug ang iyang paghigugma. Ako nakaamgo nga ang iyang kinabuhi ug mga tinguha isip usa ka batan-on dili gayud ana kalahi kaysa akoa.

Mga pipila ka bulan ang milabay, si Presidente Boyd K. Packer, Presidente sa Korum sa Napulog Duha ka mga Apostoles, naghisgut kabahin sa mga apohan sa kinatibuk-ang komperensya. Sa iyang pakigpulong, “Ang Bulawanon nga mga Katuigan,” siya naghisgut sa kaalam ug paggiya nga mahatag sa hamtong nga mga miyembro sa simbahan. Ang iyang tema nakahimo kanako sa pagpamalandong sa akong relasyon ngadto sa akong lola, ug ako nakaamgo nga ako nagkulang sa usa ka bililhon kaayo nga pagpakighigala.

Ako mihukon sa pagsulat og usab kang Lola. Ako dili gihapon sigurado kon unsa ang akong isulti, busa ako misulat lamang kabahin sa trabaho, mga higala, pamilya, ug unsa ang akong gipangbuhat. Siya mitubag sa matag sulat nako ug miingon kanako kabahin sa uban pa nakong mga paryente, ang iyang hardin, ug iyang matag adlaw nga mga kalihokan. Sa sunod higayon nga kami nag-uban, ang pagpakig-istorya ngadto kaniya sayon na lamang.

Ako mapasalamaton sa pakigpulong sa komperensya nga miabot sa higayon nga ako andam ug ganahan na nga makaila pag-usab sa akong lola. Pinaagi sa mga pulong ni Presidente Packer, ako nakaamgo nga wala nako hatagi og bili ang “talagsaon nga kapanguhaan og kasinatian, kaalam, ug inspirasyon”² kana mao gayud ang akong lola. Karon ako nakahimo sa pagdayeg niining talagsaon nga babaye ug napanalanginan pinaagi sa iyang ehemplo ug pakighigala.

Ako mosulti sa tinuod nga sa dihang ako mibiya alang sa akong misyon, ang akong pagpamatuod limitado lamang sa kahibalo kabahin sa plano sa kaluwasan ug sa Basahon ni Mormon. Ako miila nga ang akong pagpamatuod mabaw lamang kaysa akong gusto, ug ang resulta, ako mibati nga may kulang isip usa ka misyonaryo.

Sama sa kadaghanan sa mga miyembro nga French sa Simbahan nianang higayona, ako wala gayud pa makasulay sa pagtambong og sibya sa kinatibuk-ang komperensya. Kami kanunay motambong sa mga gisibya na pagbalik, diin kami maminaw sa komperensya sa French pinaagi sa usa ka tighubad. Karon, isip usa ka misyonaryo nga mialagad sa Wales ug magsulti og Iningles, ako diretso na dayon makadungog sa tingog sa propeta, si Presidente Ezra Taft Benson (1899–1994).

Sa dihang ang sesyon nagsugod na, ang lokal nga kongregasyon mikanta uban sa mga miyembro nga anaa sa Tabernacle sa Siyudad sa Salt Lake. Ako usab mikanta ug dali nga nadala sa usa ka malukpanon nga pagbati sa kalipay ug pagkasakop. Kini nga mga pagbati mipamatuod nga ako usa ka miyembro sa Simbahan ni Jesukristo.

Samtang ako naglingkud didto, usa ka ideya ang misulod sa akong hunahuna: “Unsa kaha kon ako mangutana sa Ginoo aron sa pagsiguro ngari kanako nga si Presidente Benson mao ang Iyang propeta?”

Ako nasayud nga ako mahimong “mangutana sa Dios” (Moroni 10:4), apan ako nahadlok nga tingali og ako Siyang mapasakitan sa akong mga pangutana. Human sa usa ka minuto ka pagpamalandong, ako mihukom nga mosulay. Ako miduko sa akong ulo ug nangutana sa Ginoo aron sa pagpamatuod ngari kanako nga ang tawo nga namulong mao ang Iyang propeta, manalagna, ug tigpadayag. Sa wala madugay usa ka talagsaon nga pagbati sa kalinaw ug kalipay ang misulod sa akong kasingkasing. Akong gihangad ang akong ulo, mibuka sa akong mga mata, ug naminaw kang Presidente Benson nga nagpamatuod sa Basahon ni Mormon.

Sukad niadtong higayona, ako nasayud mismo sa akong kaugalingon nga ang Ginoo nagdumala sa Simbahan pinaagi sa usa ka pinili nga propeta. Isip resulta niadto nga pagpamatuod, ako mibiya sa komperensya nga may bag-ong mga tumong, ug ako nasayud nga kini nag-agad kanako sa pagkab-ot nila. Ako miusab sa pokus sa akong misyon ug naglantaw usab sa pagtambong sa umaabot nga mga kinatibuk-ang komperensya. Ako usab naghinam-hinam nga nagpaabot sa pag-abot sa mga magasin sa Simbahan aron ako makabasa sa balaanong mga pulong sa mga sulugoon sa Ginoo.

Niadtong Oktubre 2007 nga kinatibuk-ang komperensya, si Elder Claudio R. M. Costa sa Presidency sa Seventy naghisgut kabahin sa dili na paugmaan pa ang mga butang nga mahimo natong mabuhat karon, ilabi na kon kini may kalabutan sa atong mga pamilya.³ Sa katapusan sa iyang pakigpulong, siya mipakigbahin og pipila ka mga linya nga gibasi sa usa ka balak ni Norma Cornett Marek. Ang mensahe ni Elder Costa ug ang mga pulong niadto nga balak hilabihan gayud nakatandog kanako ug nag-awhag kanako sa pagsugod sa pagpakita sa akong gugma ngadto sa akong mga ginikanan, mga igsoong babaye, ug mga higala.

Siyempre ako nahigugma sa akong pamilya ug sa akong mga higala sa wala pa ako makadungog niadto nga pakigpulong sa komperensya, apan dili nako kinaiya nga magpahibalo kanila nga ako nahigugma kanila, sa labing ubos dili kada adlaw. Siguro sila gayud kinahanglan nga makadungog niadtong espesyal nga mga pulong gikan kanako sa kanunay. Ako dili sigurado sa sinugdanan kon sa unsang paagi nga ila kining dawaton, apan sa dihang ako nakadawat og positibo nga reaksyon, ako mihukom nga mopadayon niini nga buluhaton. Sa sunod pipila ka mga bulan, akong nakita nga ang akong relasyon kanila nalig-on sa usa ka bahin tungod kay ako misunod sa mga pulong ni Elder Costa.

Karon nga ako nangalagad isip usa ka full-time nga misyonaryo, liboan ka mga milya ang kalay-on gikan sa akong panimalay sa Costa Rica. Ako gimingaw sa akong pamilya, apan kini OK ra. Ako nasayud nga sila nahigugma kanako, ug ako usab nasayud nga sila nasayud nga ako nahigugma kanila. Ako mibati og kalinaw tungod kay ako mibuhat (ug nagpadayon sa pagbuhat) og mga oportunidad sa pagpakita sa akong gugma.

Ako mapasalamaton nga kita adunay oportunidad nga kanunay maminaw ngadto sa mga lider nga gitawag sa Dios. Ako nasayud nga kon kita mosunod kanila, ang atong mga kinabuhi ug mga kinabuhi niadtong atong gihigugma mapanalanginan.