Pagsabut ug Pagsunod sa Ebanghelyo ni Kristo

Elder Joseph B. Wirthlin (1917–2008) sa Korum sa Napulog Duha ka mga Apostoles: “Ang mga matinud-anon nga mga miyembro sa Simbahan kinahanglang mahimong sama sa kahoy nga tugas ug kinahanglan nga ipalawom ang ilang mga gamot ngadto sa tambok nga yuta sa mga nag-unang mga baruganan sa ebanghelyo. Kinahanglan nga kita makasabut ug mosunod sa yano, nag-una nga mga kamatuoran ug dili kini himoong lisud. Ang atong mga pundasyon kinahanglang lig-on ug lawom ang pagkagamot aron atong mabuntog ang mga hangin sa tintasyon, sayop nga mga doktrina, pagsulay, ug ang pagdasdas sa kaatbang nga dili maluray-luray o maibut.

“Ang espirituhanon nga pag-amuma sama ra kaimportante sa usa ka pagdyeta aron kita mahimong lig-on ug piskay. Atong maamuma ang atong mga kaugalingon sa espirituhanon pinaagi sa pag-ambit sa sakrament matag semana, pagbasa sa mga kasulatan matag adlaw, pag-ampo matag adlaw sa personal ug sa pamilya, ug kanunay nga magbuhat sa buluhaton sa templo. Ang atong espirituhanong mga kalig-on susama sa mga baterya; kini kinahanglan nga i-charge ug kanunay nga i-recharge” (“Deep Roots,” Ensign, Nob. 1994, 75).

Barbara Thompson, ikaduha nga magtatambag sa kinatibuk-ang kapangulohan sa Relief Society: “Mga igsoong babaye, karon, labaw pa sa tanan, kita nanginahanglan og mga babaye nga mouswag ug magmalig-on. Kita nagkinahanglan og mga babaye kinsa mopahayag sa kamatuoran uban sa kalig-on, hugot nga pagtuo, ug kaisog. Kita nagkinahanglan og mga babaye nga mohatag og ehemplo sa pagkamatarung. Kita nagkinahanglan og mga babaye nga ‘moapil diha sa maayo nga katuyoan.’ Kita kinahanglan nga mosunod aron ang atong mga kinabuhi mohatag og pagsaksi nga kita nahigugma sa atong Langitnong Amahan ug sa Manluluwas nga si Jesukristo ug nga kita mobuhat unsa ang Ilang gihangyo kanato nga buhaton” (“Karon Kita Maglipay,” Liahona ug Ensign, Nob. 2008, 116).

2 Nephi 31:12: “Sunod kanako, ug buhata ang mga butang diin kamo nakakita kanako nga mibuhat.”

Presidente Dieter F. Uchtdorf, Ikaduhang Magtatambag sa Unang Kapangulohan: “Samtang kita naninguha sa pagsabut, pagbuhat sa nasabtan, ug pagsunod sa husto nga mga baruganan sa ebanghelyo, kita mahimong mas espirituhanong mapaningkamuton sa kaugalingon. … Ako mopamatuod isip Apostol ni Ginoong Jesukristo nga Siya buhi, nga ang ebanghelyo tinuod, ug nga kini makahatag og mga tubag sa tanang personal ug tiningub nga mga hagit o problema sa mga anak sa Dios niining kalibutan karon” (“Mga Hiyas nga Sama kang Kristo—ang Gahum nga Mobayaw Kanato,” Liahona ug Ensign, Nob. 2005, 100, 101).

Elder M. Russell Ballard sa Korum sa Napulog Duha ka mga Apostoles: “Ang plano sa kalipay anaa alang sa tanan Niyang mga anak. Kon ang kalibutan mahimong modawat ug mosunod niini, kalinaw, hingpit nga kalipay, ug kaabunda maoy modaghan sa kalibutan. Kadaghanan sa mga kasakit nga atong nahibaloan karon mahimong mawala kon ang mga katawhan sa tibuok kalibutan mahimong makasabut ug mosunod sa ebanghelyo” (“Answers to Life’s Questions,” Ensign, Mayo 1995, 23).

Elder Robert D. Hales sa Korum sa Napulog Duha ka mga Apostoles: “Kita kinahanglan nga magsunod sa ebanghelyo sa ingon nga paagi nga kita makaangkon sa Espiritu kanunay hangtud sa hangtud. Kon kita magpuyo nga takus, ang Espiritu kanunay anaa gayud kanato. Dayon kita mahimong makatudlo pinaagi sa Espiritu. … Ang rason nga kita mag-ampo, magtuon sa mga kasulatan, magbaton og maayo nga mga higala, ug mosunod sa ebanghelyo pinaagi sa pagkamasulundon sa mga sugo mao nga kon—dili pananglit, apan kon—ang mga pagsulay moabut, kita andam” (“Teaching by Faith,” Liahona, Sept. 2003, 10, 14–15; Ensign, Sept. 2003, 20, 24–25).