Mga Ideya sa Family Home Evening

Kini nga mga sugyot sa pagtudlo gitanyag aron sa paghatag kaninyo og pipila ka mga ideya. Kamo mahimong mopahaum niini nganha sa inyong pamilya.

“Ang Kabilin sa Pagpangalagad sa Usa ka Pamilya,” p. 8: I-summarize ang istorya, ipasabut og maayo kon sa unsang paagi nga ang maayong mga ehemplo sa mga sakop sa pamilya makapadasig sa uban. Paghimo og usa ka umaabut nga genealogy chart: sa usa ka piraso nga papel, isulat ang mga pangalan sa mga bata diha sa inyong pamilya, ug dapita ang matag usa kanila sa pagpili og pipila ka mga pangalan alang sa ilang umaabut nga mga anak. Tapusa pinaagi sa paghisgut kon sa unsang paagi nga ang ehemplo ug pagpamatuod sa mga bata mahimong moimpluwensya sa ilang mga kaliwatan ug mosumpay kanila sa ilang mga katigulangan.

“Mga Higala Mahimo nga Sama Kanimo,” p. 31: Paglain og pipila ka managsama nga mga butang ug usa ka butang nga lahi niini. Ipasabut nga ang lahi nga butang dali nga makit-an. Basaha ang istorya. Hisguti ang kahulugan sa pamahayag: “Ako nanghinaut nga ang matag usa makakita sa mga kalainan nga anaa kaninyong tanan.” Paghimo og tumong nga mahimong usa ka mas maayong ehemplo ni Jesukristo aron ang uban gusto nga mokat-on pa og dugang mahitungod sa ebanghelyo.

“Kini Mao ang Atong Tinuohan, sa Pagluwas sa mga Kalag,” p. 40: Basaha ang seksyon “Himoa nga ang Atong mga Mata Bukas Kanunay,” ug ipahibalo nga kamo adunay usa ka semana sa pagpangita og mga oportunidad sa paghatag og serbisyo sa uban. Paglain og usa ka sudlanan ug pipila ka mga liso o gagmayng mga bato aron masundan ang mga serbisyo. Hisguti kon sa unsang paagi ang “paghimo sa atong mga mata bukas kanunay” makatabang kanato nga makaserbisyo sa uban. Paghimo og tumong sa pagpangita og mga paagi nga makaserbisyo sa uban atol sa umaabut nga semana diha sa panimalay, eskwelahan, trabahoan, ug sa simbahan. Matag higayon nga ang usa ka tawo makatuman og usa ka buhat sa pagserbisyo, siya mahimong mobutang og usa ka liso diha sa sudlanan. Inig sunod semana, ipha kon pila ka mga liso ang natigum.

“Mga Istorya ug mga Pagpamatuod sa Campfire,” p. H4: Gamit ang usa ka habol, himoa og usab ang kasinatian sa paglingkod sulod sa usa ka tolda. Panghatag og mga snack aron kan-on atol sa leksyon. Basaha ang istorya, ug ipadrama sa duha ka mga sakop sa pamilya ang panagsultihanay tali ni Kent ug ni Brett. Ipamatuod nga ang Espiritu Santo mahimong moaghat kanato aron masayran kon kanus-a mopakigbahin sa atong mga pagpamatuod ug unsay isulti. Awhaga ang mga sakop sa pamilya nga magmahimong takus sa pagdawat sa mga pag-aghat gikan sa Espiritu Santo ug sa pagsunod niini.

“Paghupay ni Lucy,” p. H10: Human og basa niini nga istorya, basaha og balik ang pamahayag sa inahan: “Ang Espiritu Santo mitabang kanimo nga ikaw mahibalo kon unsay angayang buhaton aron mobati ka og mas maayo.” Dapita ang mas batan-on nga mga anak sa pagdrowing og hulagway sa usa ka sitwasyon diin ang pag-ampo ug ang giya sa Espiritu Santo makatabang. Tapusa pinaagi sa pagkanta og dungan sa usa ka paborito nga kanta sa Primary, ug hatag og pagpamatuod mahitungod sa makahupay nga gahum sa pag-ampo ug sa sagrado nga musika.