Ejjeļo̧k en Ewānōk

N̄a eto aō uwaletok aolep iien bwe in āinwōt Nipai: pen ilo pokake, ļap ilo tōmak, im mwūlaļ ilo jetōb. Ilo mej ko meja Nipai eaar juōn waanjon̄ak eļap kōn em̧m̧an. Jejjo men ko raar kareel eō eļapļo̧k jān ļōmņak eo n̄an aō eddōkļo̧k n̄an aō erom āinwōt e—ak diktata jinoe n̄an bōke mekarta juōn m̧ōttan em̧m̧antata eo an.

Juōn raan eaar wōr juōn aō jorrāān jidikdik, kar jarjar jān en̄jaake eo ke ejjeļo̧k tokja. Eaar kanooj lōn̄ aō ettōnak im elōn̄ wōt kōtōpar ko. Ak āinwōt n̄e iaar jab maron̄ tōpar jabdewōt jikin. Kōn dān in kōmjalal kōn an ejjeļo̧k kōjatdikdik, iaar kwaļo̧k en̄jaake kein n̄an jema. Eaar m̧ōkaj im jutak, etetal n̄an jikin bok eo, im kanōk tok juōn iaan kape in Bok in Mormon ko an. Ilo jab ba jabdewōt, eaar kōpelļo̧ok e n̄an 2 Nipai 4 im jino an riiti eoon 17.

Ijoke, mekarta em̧m̧an eo eļap an Irooj, ilo kwaļo̧k n̄an eo jerbal ko reļļap im kabwilōn̄lōn̄ An, buruō ej lam̧ōj: “O n̄a armej in en̄taan!” Ļōmņak ko raar ettōr to ettōr tak. Ewi wāween an Nipai, aō jambion im waanjon̄ak, ba bwe e “en̄taan”? Eļan̄n̄e e en̄taan, ta eo me ekar kōm̧m̧ane n̄a?

Bar juōn allen, jarom eo eaar ettōr ilowaaō ke jema eaar riiti eoon 28: “Kwōn ruj, aō jetōb! Jab bar m̧ad ilo jerawiwi.” Āinwōt en̄jaake eo n̄an eō men̄e kōdo ko marok ko ilo ļōmņak eo aō raar etal im jako n̄an an waļo̧k okmeņāān im aiboojoj in lan̄ eo ebūļu epelļo̧k im ebbōl kōn al. Epen n̄an kōmļeļe wāween ko eoon in eaar romak ilo aō. Jejjo eoon ko jān jeje ko rekwojarjar raar kobrak n̄a kōn eļap kōjātdikdik, im lan̄lōn̄ āinwōt an in kōm̧m̧an.

Ilo eoon 30, Nipai eaar ba ejja ta eo wōt iaar ļōmņak e, bōtaab ilo naan ko rekajoorļo̧k: “Aō enaaj lan̄lōn̄ ilo kwe, aō Anij, im aō ejm̧aan in lo̧mo̧r.” Eoon in eaar bōktok ippān en̄jaake in ainōm̧m̧an im kam̧oolol kōn tūriamo im iakwe eo an Irooj.

Jema eaar kiil bok eo im kōmļeļeik bwe eoon kein jet iien ņa etaer sam ko an Nipai. Innām E eaar katakin eō ilo jouj bwe barāinwōt armej ro rebun̄bun̄ ilo laļ rejjab wānōk, im armej rein rej aikuj kile jab wānōk ko aer n̄e ejjab er renaaj utiej būro im, kōn menin, jab wānōk.

Iaar meļeļe. Kōnke eaar wōr aō mōjņo ejjab meļeļein bwe n̄a ijjab maron̄ erom āinwōt Nipai. Kile mōjņo ko aō eaar bōktok eō n̄an epaake āinwōt Nipai. Nipai eaar bun̄bun̄ kōnke, ijjeļo̧kin an pokake im tōmak, e eaar ettā im kōņaan n̄an kwaļo̧k bōd ko an.

Jān kar iien en̄jaake in, emōj aō kaorōk naan kein an Nipai. Kajojo iien ij riiti, n̄aij en̄jaake ejja m̧ōņōņō im aō emakūt ko āinwōt aō kar riiti ilo jinoin. Eoon ko rej al n̄an eō bwe n̄a ij nejin Anij, eo emaron̄ in kōm̧m̧an eļapļo̧k jān aō kar ļōmņak. Ijeļā bwe eļan̄n̄e inaaj tōmak im unm̧anļo̧k, kōjeraam̧m̧an ko jab ba kaki rej kakoni.