Dahkot Kaselel Mehlel?

President Monson kihda nan iren mahsen wet, “Nan sampah, loalen aramas kin kalapw mwomwen wia mehkot me keriauih de sohte kesempwal duwehte masamwahu de mai en koasoai.” Peinakapw akan mwein kakete pwunupwunodiki ihs irail oh ihs me irail kak wiahla. Tehk mahs madamadau pwukat me pid dahkot kaselel mehlel sang Elder Lynn G. Robbins en Isiakan:

• Peinakapw men me pohn mese lingan pwehki peren oh mour mwahu kin soaramwahu.

• Sirei me kohsang aramas mour mwahu me inenen kaselel ni eh inenen soaramwahu. Kaselel mehlel wet sohte me kak pein litopwihieng pohn mese ahpw wia kisakis en Ngehno.

• Likou mwahu me sohte kasansal wia kilel oh uhdahn anahnepe pwehn mie soaratail.

• Ma ke sohte pwungki mwomwomw, e pahn sawas ma ke pahn kilang pein kowe sang nan mesen irail akan me kin poakepoakeiuk. Kaselel loalatail me rir ahpw me kompoakapahtail kin kak kilang kak wia mehn iroir pwehn kamwahuiala pein kitail.

• Soangen ohl me lih mwahu kin men pwoudiki “sohte kin kasawih” ni duwen me aramas kin kasawih (tehk 1 Samuel 16:7). E pahn kilang loale oh soaren liho me pahn kohsang mohngiong mwakelekel oh peren. Met pil mehlel ong peinakapw men me raparapahki mwahnakapw mour mwahu.

• Samatail Nanleng ketin kupwuriki koaros Sapwellime serihkan en pilada me pwung, iei met kelehpw me wia ahl ong peren mehlel oh kaselel loalatail.

• Rehn Kauno, sohte me kin sihsiai. Koaros ahniki ansou mwahu me pahrek en tungoalenki sansal en Koht pohn mesarail kan (tehk Alma 5:19). Sohte kaselel me lingan sang met.

Pwehn wadek iren mahsen wet ni unsek, tehk Lynn G. Robbins, “True Beauty,” New Era, Nopempe 2008, 30. Mwahnakapw kan kak diar kaweid me duwete met nan Errol S. Phippen, “Ugly Duckling or Majestic Swan? It’s Up to You,” Liahona, Oakotope 2009, 36.