Iren Mahsen en Padahk en Pas, Suhn 2010
Weliakapw Inou Sarawi Kan sang ni Kamadipw Sarawi
Padahngki iren pwuhk sarawi oh lepin mahsen pwukat de, ma mie anahnepe, ehu padahk tohrohr me pahn kapaiada lih akan me komw kin pwarek. Kihda kadehde en padahko. Luke irail akan me komw kin pwarek en ehukihda soahng kan me re pehmehr oh esehlahr.
Sises Krais Ketin Koasoanehdi oh Tapiada Kamadipw Sarawi
“Sises ketikihda pilawa ieu oh kapingkalahnganki, pilitikihpeseng, e ahpw ketikihong sapwellime tohnpadahk ko, mahsanih, ‘Kumwail iang ale oh tungoale’ (Madiu 26:26). ‘Iei werei met me pengpengkinkumwaillahr. Kumwail wia met ong ni katamanpei’ (Luk 22:19). Ni soangen wiepeohte e ketikihda delen waino, me nin duwen arail tiahk kin dol pihl, ketikihda kapakap en kapai oh kalahngan, oh ketikihieng irail akan me kapil ih, mahsanih: ‘Dahl wet iei delen sapwellimen Koht inou kapw me wiawihkidahr ntahi, me kepwilipwildier pwehki kumwail.’ ‘Kumwail wia met ong ni katamanpei.’ …
“Sangete rahno, ni Kamadipw en Komwurumwuro nih soutik me manda Kedsemeni oh Kolkoda, serikan en inou kin mih pahn inou sarawi en tamataman meiroang en Krais ni wiepe wet me ahpwete kapw, ileilei, sarawi oh me doke emenemen kitail.”1
Elder Jeffrey R. Holland en Pwihn en Wahnpoaron Ehk-riemeno.
Kitail kin Weliakapw Atail Inou Sarawi Kan en Pepdais sang ni Kamadipw Sarawi
“Ni ansou me kitail kin pepdais, kitail kin alehda mwahr sarawi en Sises Krais. Atail kin alehda Mware wia ehu irair keieu kesempwal me kitail ahniki nan mour. …
“Wihk koaros nan mihting en kamadipw sarawi kitail kin inouki en taman meiroang en tomw en atail Sounkomour ni atail kin weliakapw atail inou en pepdais. Kitail kin inouki en wia me Sounkomour ketin wia—en peikiong Sahm oh en kolokol ansou koaros Sapwellime kosonned akan. Kapai me kin uhd kopwurupwurdohng kitail iei en ahniki ansou koaros Sapwellime Ngehn pwehn ketiket rehtail.”2
Elder Robert D. Hales en Pwihn en Wahnpoaron Ehk-riemeno.
“I iang towehda ahn serepein men me sounpar waluh ah rahn en pepdais. Ni keimwseklahn rahno e ndahieng ie ni soupeikasal douluhl, “I pepdaiskihier erein rahn ehu pwon, oh I saikinte dipada pak ehu!’Ahpw ah rahn unseko mie imwi, oh I koapwoaroapwoariki me serepeino tepier esehla, duwehte kitail koaros atail kin esehla, me mehnda uwen atail kin song koaros, kitail sohte kin soikala ansou koaros irair me sohte mwahu de sohte wiahda pilipil sapwung. …
“… Kitail sohte kak kelehpw oh pein weliakapwala mehlel. Pein atail ngoahng oh men wiahda me mwahu sohte itar. Ni atail kin wiahda sapwung de pilipil suwed, kitail anahne sawas en Sounkomouro pwehn pwurala nan ahl pwung. Kitail kin tungoale kamadipw sarawi nan wihk koaros pwehn kasale atail pwoson Sapwellime manaman en weliakapw kitail. Kitail kin koluhkihla dipatail kan oh inouki en soikala douluhl.”3
Julie B. Beck, President lap en Pwihn en Sawas en Lih.
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen Visiting Teaching Message, June 2010. Pohnpeian. 09366 885
Sawas kan ong Padahk en Pas
Ni omw pahn kedekedeo esehla lih emen oh ah peneinei, rapahki wiepe kan me komw kak sewese ih en weliakapw ah inou sarawi kan sang ni tungoale kamadipw sarawio. Ma e sohte kin iang towe mihting en kamadipw sarawi, komw kak luke ih en iang towe de kihda ahmw sawas pwe en kak iang towe (kihda peidaid, sawas en apwalih seri, wia kompoakapah men, oh soahng teikan me rasehng met)?
Kaunop Pein Komwi