Fas Presidensi Mesej, Julae 2010
Ol Fetful Fren
Wan long ol bigfala ona we Sevya i save givim, hem i blong singaotem yumi “ol fren.” Yumi save se Hem i lavem evri pikinini blong Papa blong Hem long Heven wetem wan stret lav. Be blong olgeta we oli bin stap fetful long seves blong olgeta wetem Hem, Hem i kipim spesel taetol ia blong olgeta. Yu tingbaot ol toktok we i stap long seksen 84—blong Doctrine and Covenants we Lod i talem long ol sent, we oli ol fren blong Hem—se stat long taem ia, Hem bae Hem i singaotem olgeta ol fren—se i nid blong Hem i givim long olgeta komanmen ia, se oli mas kam olsem ol fren blong Hem long ol dei taem Hem i bin stap wetem olgeta, we oli bin travel blong prijim gospel long paoa blong Hem (luk long D&C 84:77).
Yumi kam ol fren blong Hem taem yumi givim seves long ol narawan long bihaf blong Hem. Hem i stret eksampol blong kaen fren we yumi mas kam olsem. Hem i wantem nomo wanem i gud blong ol pikinini blong Papa blong Hem long Heven. Hapines blong olgeta, hem i hapines blong Hem. Hem i filim harem nogud blong olgeta olsem harem nogud blong Hemwan from Hem i bin pem praes from evri sin blong olgeta, mo i bin tekem long Hemwan evri sik blong olgeta, i karem long Hemwan ol trabol blong olgeta, mo i bin filim ol samting we oli wantem. Ol stamba tingting blong Hem oli klin. Hem i no lukaotem ona blong Hemwan, be blong givim evri glori i go long Papa blong Hem long Heven. Stret fren, we i Jisas Kraes, i no selfis nating blong givim hapines long ol narafalawan.
Wanwan long yumi we i bin mekem ol kavenan blong baptaes blong hem, i bin promes blong folem eksampol blong Hem blong karem long hemwan ol hevi samting blong ol narafalawan olsem we Hem bae i mekem (luk long Mosaea 18:8).
Long ol nekis dei we i stap kam bae yu gat plante janis blong kam wan fren blong Hem. Ating bae hem i taem we yu stap wokbaot long wan rod we i gat das long hem. Ating bae hem i taem yu sidaon long wan tren. Ating bae hem i taem yu stap lukaotem wan ples blong sidaon long wan Jos kongregesen. Sapos yu stap lukluk, bae yu luk wan i stap karem wan hevi samting. Ating hevi samting ia i blong harem nogud, o filing blong stap yuwan, o kros. Ating bae yu save luk nomo sapos yu bin prea blong Spirit i givim long yu ol ae blong lukluk insaed long ol hat mo yu bin promes blong leftemap olgeta han we oli hang i go daon.
Ansa long prea blong yu, ating bae hem i fes blong wan olfala fren blong yu, wan we yu no bin stap luk blong plante yia, be ol nid blong hem i kam stret long maen mo hat blong yu mo yu filim olsem se oli blong yu. Samting ia i bin hapen long mi. Ol olfala fren oli bin kam long mi long plante ples mo yia blong leftemap tingting blong mi taem God nomo i save talem long olgeta abaot ol hevi samting blong mi.
Ol profet blong God we oli laef oli bin askem yumi blong kam ol fetful fren long olgeta we oli kam long Jos olsem ol konvet mo blong go mo sevem olgeta we oli bin lusum rod. Yumi save mekem samting ia, mo bae yumi mekem samting ia sapos yumi stap tingbaot Sevya oltaem. Taem yumi go aot blong givim help mo karemaot wan hevi samting, Hem i go aot wetem yumi. Hem, bae i lidim yumi i go long olgeta we oli stap long nid. Hem, bae i blesem yumi blong filim wanem oli filim. Taem yumi stap gohed oltaem long ol hadwok blong yumi blong givim seves long olgeta, bae yumi kasem, moa mo moa oltaem, presen ia blong filim lav we Hem i gat long olgeta. Hemia bae i givim long yumi, strong tingting mo paoa blong go aot bakegen mo bakegen long fasin blong stap fetful.
Mo, long taem naoia mo long taem we i no save finis, bae yumi filim glad blong stap filim welkam long kampani blong ol fetful fren blong Hem. Mi prea from blesing ia blong yumi evriwan mo blong olgeta we bae yumi givim seves long olgeta.
© 2010 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen: 6/09. Translesen blong First Presidency Message, July 2010. Bislama. 09367 852
Yusum Mesej ia blong Tij
Ol memba blong famle bae oli tekempat wetem moa mining, taem oli askem olgeta blong lukaotem wan samting taem oli stap lukaot long ol skripja mo ol toktok blong ol profet (luk long Teaching, No Greater Call [1999], 55). Taem yu stap ridim stori ia, askem ol memba blong famle blong oli traem talemaot ol prinsipol we bae i helpem olgeta blong oli stap gud inaf blong oli singaotem olgeta ol fren blong Lod.
Teaching, No Greater Call i talem: “Sapos yu gat lav olsem hemia blong Kraes, bae yu rere gud moa blong tijim gospel. Bae yu kasem insperesen blong helpem ol narafalawan blong save Sevya mo folem Hem” (12). Faenemaot ol prinsipol aot long stori ia, we i save helpem yu blong kam wan hom tija we i gud moa. Toktok raon long olgeta prinsipol ia wetem kompanion blong yu, mo wetem prea, tingting long olsem wanem blong kam “ol fetful fren” long olgeta we yu givim seves long olgeta.