Mekem Ol Famle mo Ol Hom Oli Kam Strong Moa

“Wanwan long yumi i stap long wan defren famle situesen. Sam famle oli gat wan mama mo papa wetem ol pikinini long hom. Sam kapol oli nomo gat ol pikinini i stap long hom wetem olgeta. Plante memba blong Jos oli singgel, mo sam oli ol singgel paren. Ol narafalawan oli ol wido from ol man blong olgeta i ded o ol woman blong olgeta i ded mo oli stap olgetawan.

“Nomata famle blong yumi i luk olsem wanem, wanwan long yumi i save wok blong mekem ol famle blong yumiwan i kam strong moa o help blong mekem ol narafalawan oli kam strong moa.

“[Wan taem] mi bin stap long hom blong nis blong mi mo famle blong hem. Long naet ia bifo ol pikinini oli go silip, mifala i gat wan sot famle haos naet mo wan skripja stori. Papa blong olgeta i tokbaot famle blong Lihae mo olsem wanem hem i bin tijim ol pikinini blong hem se bae oli mas holem strong rel blong aean, we hem i toktok blong God. Sapos oli holem strong rel blong aean ia bae i kipim olgeta i sef mo lidim olgeta i go long glad mo hapines. Sapos oli lego rel blong aean ia, bae i gat denja blong oli draon long reva blong doti wota.

“Blong soemaot samting ia long ol pikinini, mama blong olgeta i kam olsem “rel blong aean” we oli mas holemtaet, mo papa blong olgeta i plei rol blong devel, we i stap traem blong pulum ol pikinini longwe long sefti mo hapines. Ol pikinini oli lavem stori ia mo oli bin lanem se hem i impoten blong holemtaet rel blong aean. Afta long skripja stori ia, hem i bin taem blong famle prea. …

“Ol skripja, famle haos naet, mo famle prea bae oli mekem ol famle oli kam strong moa. Yumi nidim blong tekem evri janis blong mekem ol famle oli kam strong moa mo sapotem wanwan long yumi blong stap long stret rod.”¹

1. Wanem nao ol aedia we bae yu serem wetem ol sista blong yu blong mekem ol famle mo ol hom oli kam strong moa? Taem yu stap tingting hevi long wanwan situesen blong olgeta, Spirit bae i save karem ol tingting i kam long maen blong yu.

2. Wanem nao ol impoten samting we yu save jenisim long manis ia blong save mekem famle mo hom blong yuwan i kam strong moa?

Stat long stat finis, Rilif Sosaeti i bin gat wan oda blong oli mekem ol famle mo ol hom oli kam strong moa. Profet Josef Smit i bin tijim ol sista long wan eli Rilif Sosaeti miting, “Taem yu go hom, neva givim wan kros o ol toktok we i no kaen long ol hasban blong yufala, be letem kaen fasin, jareti, mo lav i kam pat blong ol wok blong yu long fiuja.”²

Long 1914 Presiden Josef F. Smit i bin talem long ol sista blong Rilif Sosaeti, “Long eni ples we i gat wan fasin blong no wantem save o i no gat wan andastaning long saed blong famle, … long ples ia i gat oganaesesen ia i stap laef o i stap kolosap long yumi, mo tru long ol stret endaomen mo insperesen we i blong oganaesesen ia, oli rere mo redi blong givim tijing wetem tingting long ol impoten diuti ia.”³