Usa ka Pagpamatuod nga Naangkon sa Pagsidlak sa Adlaw

Nagtubo ako isip usa ka miyembro sa Simbahan. Natudloan ako sa mga baruganan sa ebanghelyo pinaagi sa akong mga ginikanan ug nabunyagan ug nakumpirmahan ug nakadawat sa priesthood gikan sa akong takus nga amahan. Mibati ako sa impluwensya sa Espiritu sa akong kinabuhi, apan wala ako makadawat og usa ka saksi sa kamatuoran sa Pag-ula hangtud sa usa ka Pasko sa Pagkabanhaw sa akong mga tuig sa pagkabatan-on.

Usa ka grupo sa pipila ka gatusan nga mga estudyante sa seminary nagpundok alang sa usa ka miting sa pagpamatuod sa dili pa mosidlak ang adlaw. Kinahanglan akong mopakigbahin sa akong pagpamatuod nianang buntaga, apan dili ako sigurado. Ang akong nahibaloan mao ni nga sa panahon sa miting samtang ang adlaw nagsidlak sa usa ka bag-o nga Pasko sa Pagkabanhaw, ang Espiritu misulod sa akong kasingkasing ug mipamatuod sa kamatuoran ni Jesukristo, sa Iyang kinabuhi, sa Iyang mga pagtulun-an, sa Iyang Pag-ula, ug sa Iyang Pagkabanhaw. Mibati ako sa kasigurohan niana nga pagpamatuod makadaghang panahon sa sobra sa 30 ka tuig nga ako mipamatuod ni Jesukristo isip usa ka misyonaryo, amahan, higala, ug lider sa Simbahan. Apan ang naglig-on kanako mao gayud ang saksi nga akong nadawat gikan sa Espiritu nianang buntag sa Pasko sa Pagkabanhaw.