Talagsaong mga Kinabuhi Pagahinumduman
Presidente Marion G. Romney (1897–1988)
Si Marion G. Romney natawo sa komunidad sa Santos sa Ulahing mga Adlaw sa Colonia Juárez sa Mexico ug nagpuyo didto hangtud siya mga 15 anyos. Usa ka rebolusyon sa politika nga misugod niadtong 1910 mipugos sa mga Romney ug sa uban sa pagbiya sa tanang butang ug milalin ngadto sa Estados Unidos. “Kami naglisud sa pagpanginabuhi,” nahinumdom si Presidente Romney. “Kinahanglan kaming mokahig o mamatay.”1 (“Mokahig o mamatay” usa ka panultihon sa taga-Amerika nga nagpasabut nga ang usa ka tawo kinahanglang maningkamot pag-ayo.)
Panahon sa lisud nga mga tuig, samtang nagpuyo sa Oakley, Idaho, ang papa ni Marion ug ang iyang tiyo mihiusa sa ilang mga kapanguhaan sa pamilya. Sa usa ka bulan sila adunay 80 dolyares lamang sa pagpaigo sa mga kinahanglanon sa 17 ka tawo sa duha ka pamilya. Ang Ginoo ba mosabut kon sila dili mobayad og ikapulo karon? Sila mitubag sa pangutana pinaagi sa pagsugo sa batan-ong Marion sa usa ka bugnaw nga adlaw sa tingtugnaw sa paghatud sa ikapulo ngadto sa bishop. Human niadto, siya miingon, dili na gayud ingon ana kalisud sa pagbayad og ikapulo pag-usab.
Si Marion G. Romney nasayud sa kakabus ug kakugi. Siya migradwar sa high school niadtong 1918, mieskwela sa Ricks College sulod sa duha ka tuig, ug dayon mialagad og misyon sa Australia. Human sa iyang misyon iyang giminyoan si Ida Jensen sa Templo sa Salt Lake niadtong 1924. Samtang nagtrabaho, siya nag-eskwela sa Brigham Young University ug sa wala madugay nakapasar sa bar exam niadtong 1929 aron sa pagpraktis sa balaod.
Isip usa ka bishop sa Siyudad sa Salt Lake panahon sa ka grabe sa Dakong Depresyon, siya naapil gayud sa pagmugna sa kalamboan sa sistema sa welfare sa Simbahan. Sa wala madugay, isip usa ka Assistant sa Korum sa Napulog Duha ka mga Apostoles ug dayon isip usa ka Apostol, siya mipadayon sa pagtabang sa pagpanindot ug pagdumala niana nga programa.
Gikan sa 1972 hangtud 1985 siya mialagad sa Unang Kapangulohan isip usa ka magtatambag ngadto ni Presidente Harold B. Lee ug dayon ngadto ni Presidente Spencer W. Kimball. Si Presidente Romney mao ang Presidente sa Korum sa Napulog Duha ka mga Apostoles sa dihang siya namatay sa edad nga 90.