Bahin sa Usa ka Butang nga Talagsaon
Sa ulahing bahin sa tingpamulak niadtong 1967, ang among ward gihangyo sa pagpili og 16 ka mga batan-on sa pagsayaw sa Festival sa Sayaw sa Tanang Simbahan. Para sa among gamay nga lungsod sa umahan sa Idaho, kini usa ka pangahas [adventure]. Ang festival pagahimoon sa dako kaayo nga stadium sa Unibersidad sa Utah nga may liboan ka mga mananambong. Dili ako usa ka mananayaw ug nagduha-duha sa among unang mga praktis, apan sa wala madugay nalingaw ko nga makauban ang buotan nga batan-ong mga lalaki ug mga babaye nga nag-andam alang sa festival sa sayaw. Ang panghunahuna nga moadto sa usa ka lapad nga siyudad sa Salt Lake ug mopuyo sa usa ka hotel nga adunay swimming pool nakadasig kanamo.
Kami miabut sa Siyudad sa Salt Lake sa gitakda nga adlaw ug misugod sa pagsul-ob sa among sinina alang sa among pasundayag. Diha-diha dayon ako nakaamgo nga wala nako madala ang itom nga karsones nga akong sul-ubon alang sa among sayaw sa ballroom. Nabilin kini nako sa balay. Kami wala gani maghunahuna sa pag-adto sa tindahan aron sa pagpalit og usa ka paris sa karsones, tungod kay kini mahal gyud kaayo. Wala ako masayud unsa ang akong buhaton.
Ang solusyon miabut sa dihang ang akong lider sa Young Men, si Brother Lowe, mitanyag kanako sa pagsul-ob sa iyang itom nga karsones. Sa dihang gisul-ob nako ang karsones, nalipay ako nga kini sakto ra gayud ang gitas-on. Hinoon, diha-diha dayon ako nakaamgo nga ako adunay problema: ang karsones dako kaayo og hawakan. “Unsa man ang akong buhaton?” Naghunahuna ko. Mapasalamaton ko sa pagkamabination ni Brother Lowe apan mibati nga maulaw pag-ayo sa pagsul-ob sa dakong karsones. Si Brother Lowe ug ang akong mga higala misiguro kanako nga walay makahibalo tungod kay ang karsones matabunan sa akong suit coat ug ako makagamit og bakos sa paghugot niini.
Nakahinumdom gihapon ko sa pagbati sa pag-abut sa stadium ug nakakita og gatusan ka batan-ong mga lalaki ug batan-ong mga babaye gikan sa tibuok nasud kinsa nagpakigbahin sa akong mga pagtuo ug konbiksyon. Kadto usa ka talagsaon nga higayon alang kanako sa pagkaamgo unsa kaimportante ang Simbahan ngadto sa kadaghanan.
Sa dihang amo nang turno, kami nangadto sa hawanan. Sa dihang nagsugod na ang sayaw, nahadlok ako pag-ayo, akong mabantayan nga ang dako kaayong karsones nagkahuslo. Wala nay panahon sa pag-ayo niini; ang musika nagsugod na. Ang mao nga problema midugang sa bag-o nakong kasinatian sa ballroom. Dili lamang kinahanglan nga hinumduman ang tanan nga gitudlo kanamo, apan ako kinahanglan usab nga maghimo og pipila ka bag-ong mga lihok sa pagsigurado og pahimutang sa akong karsones. Usahay kining mga lakang nakadismaya sa akong hanas nga partner, apan kini nagluwas kanako gikan sa mas problemadong panapos.
Wala gayud ako makalimot sa akong mubo nga kuyaw nga higayon sa pagsayaw og ballroom. Mas importante, wala gayud ako makalimot sa pagbati nga kitang tanan bahin sa usa ka butang nga talagsaon—dili lamang yano nga piyesta sa sayaw—apan sa gipahiuli nga Simbahan ug sa ebanghelyo ni Jesukristo.