Ang Pagporma og mga Misyonaryo sa Umaabut

Isip usa ka miyembro sa Milwaukee Wisconsin Ward, gigiyahan ako sa mahalaron nga mga lider. Ang among mga kalihokan usa ka talagsaon kaayo nga kapanguhaan sa pagpalambo sa mga kahanas sa sosyal nga pagpakig-istorya. Gani, usa ka kasinatian sa Mutual nga espesyal nga miporma sa dagan sa akong pagkabatan-on. Kini nahitabo niadtong 1956, 54 ka tuig ang milabay! Apan bisan karon klaro kini nakong nahinumduman.

Kaming batan-on nga mga lalaki dungang nagtrabaho panahon sa Mutual kada Miyerkules sa pagtukod og usa detalyado, upat ka pye nga gitas-on (1.2-m) nga replica sa nindot nga Templo sa Salt Lake. Kami usab naghimo og dako nga poster nga nagdetalye sa katuyoan ug istorya sa Basahon ni Mormon.

Ang among grupo sa Boy Scout sa ward nakaangkon og tataw nga booth alang sa tinuig nga display sa mga kahanas sa Scouting sa among siyudad. Gatusan ka mga bisita ang mihapit sa among booth ug mitan-aw sa among display. Daghan ang mihunong. Sila nangutana sa batan-ong mga lalaki sa Aaronic Priesthood nga nakauniporme sa Scout sa katuyoan sa display sa templo. Dayon daghan ang nangutana kabahin sa Basahon ni Mormon. Kaming batan-on nga mga tighupot sa Aaronic Priesthood mipasabut kutob sa among mahimo ug dayon mihatag kanila og dili mahal nga kopya [paperback] sa Basahon ni Mormon.

Usa ka suod nga kauban sa Scout ug ako (kami anaa sa samang korum sa teacher) mibati nga ingon og 20 anyos nga mga misyonaryo! Kaming duha hilom nga mipasalig nga mahimong takus ug moalagad isip full-time nga mga misyonaryo. Sa katapusan, kaming duha nakahimo gayud niana—salamat, og bahin, sa Mutual ug sa mahalaron nga mga lider sa mga batan-on.