Parau Poro‘i na te mau Tuahine Hahaere, Atete 2010
Faarahi i te faaroo e te parau-ti‘a o te taata iho
A tuatapaa i teie haapiiraa, e ia tano maitai, a aparau i te reira e te mau tuahine o ta outou e hahaere. A faaohipa i te mau uiraa no te tauturu ia outou ia haapuai i ta outou mau tuahine e no te faariro i te Sotaiete Tauturu ei tuhaa itoito no to outou iho oraraa.
Faaroo • Utuafare • Taviniraa
No roto mai i te mau papa‘iraa mo‘a
Ta tatou hopoi‘a ia vai ti‘amâ noa no te haamoriraa hiero
« Te mau fafauraa o ta tatou e rave e te mau oro‘a e fariihia e tatou i roto i te hiero, e riro te reira ei parau mana e fariihia ai tatou i mua i te aro o te Atua. Na teie mau fafauraa e faateitei ia tatou i ô atu i te mau oti‘a o to tatou iho puai e te hi‘oraa. E rave tatou i te mau fafauraa no te faaite i to tatou itoito i te paturaa i te basileia. E riro tatou ei mau taata no te fafauraa ia tuu-ana‘e-hia tatou i raro a‘e i te fafauraa a te Atua. Te mau haamaitairaa atoa i fafauhia e riro ïa no tatou na roto i to tatou haapa‘o i teie mau fafauraa. …
« Eaha ta te mau vahine o te Ekalesia e rave no te titau i te mau haamaitairaa o te hiero ?
« Na roto i Ta’na mau peropheta, te ani manihini nei te Fatu i te feia o tei ore â i farii i te mau haamaitairaa o te hiero ia imi i te mau rave‘a atoa no te farii i te reira. Te ani manihini nei Oia i te feia o tei farii i teie mau haamaitairaa ia ho‘i pinepine no te popou faahou i te iteraa rau, no te faarahi i to ratou ite e te maramarama no Ta’na faanahoraa mure ore.
« Ia vai ti‘amâ noa tatou no te farii i te parau faati‘a no te hiero. E haere tatou i te hiero no te taati i to tatou mau utuafare no amuri no’atu. E ho‘i pinepine tatou i te hiero ia au i te huru e maraa i to tatou oraraa. E horo‘a tatou i te rave‘a i to tatou mau metua tei pohe ia farii i te mau oro‘a no te faateiteiraa. E mata na tatou i te farii ma te oaoa i te puai varua e i te heheuraa e roaa ia tatou na roto i to tatou haere-tamau-raa i te hiero. Ia vai faaroo noa tatou e ia rave e ia haapa‘o i te mau fafauraa o te hiero no te farii i te îraa o te mau haamaitairaa no te Taraehara ».1
Silvia H. Allred, tauturu matamua i roto i te peresideniraa rahi o te Sotaiete Tauturu.
No roto mai i to tatou Aamu
Ua haapii mai te Peresideni Gordon B. Hinckley (1910–2008) e, ua tupu te Sotaiete Tauturu i te rahi na roto i te hinaaro o te mau tuahine ia haamori i roto i te mau hiero:
« I te patu-raa-hia te hiero no Kirtland ua piihia te mau vahine ia faahu‘ahu‘a i ta ratou mau mereti no te faarapu e te pu‘a papaa e faaohipahia i ni‘a i te mau papa‘i o te hiero, o te haru mai i te maramarama o te mahana e o te ava‘e e ia faaanaana i te reira maramarama no te faanehenehe i te rapae o te fare.
« I taua mau taime ra, e mea iti roa te moni area râ, e mea rahi te faaroo, ua horo‘a te mau rave ohipa i to ratou puai e te mau rave‘a no te paturaa i te fare o te Fatu. Na te mau vahine e hamani i te maa na te mau tane, ia au i te maitai roa e ti‘a ia ratou ia faaineine. Ua faaite Edward W. Tullidge e, a nira ai te mau vahine i te mau paruru o te hiero, a hi‘o noa ai Iosepha Semita ia ratou, ua parau a‘e ra oia e, ‘e te mau tuahine, ua ineine ihoa outou. Tei te matamua noa te mau tuahine i te mau taime atoa i roto i te mau ohipa maitai. O Maria te matamehai i te ti‘a-faahou-raa ; e i teie nei, te mau tuahine te matamua no te rave i te ohipa i roto i te hiero.’ …
« I Nauvoo atoa, a patuhia ai te hiero, ua putuputu te tahi mau tuahine rii no te hamani i te ahu no te mau taata rave ohipa. E mea na roto mai i te reira mau huru i putuputu ai e piti ahuru o ratou i te mahana maha 17 no mati 1842, i roto i te piha teitei o te fare toa a te peropheta ».2 E mea na reira i haamata ai te Sotaiete Tauturu.
Eaha ta‘u e nehenehe e rave ?
-
Eaha te patururaa o ta‘u e nehenehe e pûpû no te tauturu i to‘u mau tuahine ia faaineine e ia haere i te hiero ?
-
Nahea vau ia faaite i te hoho‘a o te faufaa ai‘a a te mau tuahine i te matamua o tei faatusia ia ratou no te farii i te mau haamaitairaa o te hiero ?
-
Nahea vau ia titau i te mau haamaitairaa o te hiero ?
© 2010 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/09. Parau faati‘a no te iritiraa : 6/09. Iritiraa no Visiting Teaching Message, August 2010. Tahitian. 09361 895