Mandir Ke Aashirvaad

Main sochta hoon duniya mein aur koi aesi jagah nahin jahan main Prabhu ke itne kareeb mehsoos karta hoon jitna Unke kisi ek pavitra mandiron mein. Ek kavita apne shabdon mein dohraata hoon:

Prabhu ne kaha:

“Apne liye prithvi par dhan ikattha na karo, jahan kida aur kaai bigaadte hain, aur jahan chor sendh lagaate aur churaate hain:

“Parantu apne liye swarg mein dhan ikattha karo, jahan na to kida aur na kaai bigaadte hain, aur jahan chor na sendh lagaate aur na churaate hain:

“Kyunki jahan tera dhan hai, wahan tera mann bhi laga rahega.”¹

Ishu Masih ka Girjaghar Antim-dinon ke Santon ke sadasyon ke liye, mandir dharti par sabse pavitra sthaan hai. Woh Prabhu ka ghar hai, aur jaise mandir ke baahar ka lekh batlaata hai, mandir “Prabhu ke prati pavitrata” hai.

Mandir mein, Parmeshwar ka bahumulye yojna sikhlaaya jaata hai. Woh mandir ke andar hi anant vaade kiye jaate hai. Mandir hamein ubhaarta, unnat karta, sab ke liye ek prerna hai, aur hamein swargiye mahima ke or nirdesh karta hai. Woh nishchay hi Parmeshwar ka ghar hai. Jo kuch mandir ke deewaaron ke andar hota hai ubhaarta aur prerit karta hai.

Mandir parivaaron ke liye hai, maranshilta mein hamara sabse bada khazaana. Prabhu hum pitaaon se baatein karte samay bahut spasht raha hai, yeh batlaate hue ki hamari zimmedaari hai apne pure hriday se apne patniyon se prem karna aur unke aur hamare bachchon ka khayaal rakhna. Usne batlaaya ki sabse mahaan kaarye jo hum kar sakte hai woh hamare gharon mein hai, aur hamare ghar swarg ban sakte hai, khaas jab hamari shaadiyaan Parmeshwar ke gharon mein seal hui hai.

Swargiye Elder Matthew Cowley, jo Barah Devduton ke Parishad ke sadasye the, ne ek baar ek aja ke anubhav ko batlaaya jab ek Shaniwaar ke shaam ko woh apne poti ka haath thaame ek janam din bhent par gaya—na ki chidiya ghar ya pikchar magar mandir ke aangan mein. Aangan ke rakshak ki ijaazat se, donon mandir ke bhaari darwaaze tak gaye. Usne kaha ki woh pehle apna haath mazboot deewaar par rakhe aur phir us bhaari darwaaze par. Komalta se usne phir usse kaha, “Yaad rakhna ki is din tumne mandir ko chua tha. Ek din tum andar jaaogi.” Us choti bachchi ke liye unka uphaar laali ya ice cream nahin tha magar ek anubhav jo aur bhi mahatvapurn aur anant hai—Prabhu ke ghar ki ek prashansa. Usne mandir ko chua tha, aur mandir ne usko chua.

Jab hum mandir ko chute hai aur mandir se prem karte hai, hamara jiwan hamara vishwaas pradarshit karenge. Jab hum pavitra ghar ko jaaenge, jab hum un vaadon ko yaad karenge jo hum wahan banate hai, hum har pariksha ko jhel sakenge aur har behkaawe ka saamna kar sakenge. Mandir hamare jiwanon ke liye lakshye pradaan karta hai. Woh hamare aatma mein shaanti laata hai—manushye dwara di gai shaanti nahin magar woh shaanti jo Parmeshwar ke Putra dwara vaada kiya gaya jab Usne kaha, “Main tumhein shaanti diye jaata hoon, apni shaanti tumhein deta hoon: jaise sansaar deta hai main tumhe nahin deta. Tumhara mann vyakul na ho aur na dare.”²

Antim-din Santon ke beech bahut vishwaas hai. Prabhu hamein mauke deta hai dekhne ke liye ki kya hum Unke aadeshon par chalte hai, kya hum us maarg ko apnaaenge jo Nazareth ke Ishu ne apnaaya tha, agar hum Prabhu se apne pure hriday, praan, mann, aur buddhi se prem karenge aur apne padosiyon se apne jaisa prem rakhenge.³

Main us muhaaore mein vishwaas karta hoon “Prabhu par apne sampurn mann se bharosa kar; aur tu apni samajh ka sahaara na lena.”⁴

Aysa hamesha raha hai; aysa hamesha rahega. Agar hum apna kaam karenge aur Prabhu par sampurn bharosa rakhenge, hum Unke mandiron ko bhar denge, sirf apne hi dharam vidhi ko nahin karte hue, magar auron ke liye kaarye karne ka saobhaagye bhi paaenge. Hum pavitra vediyon par ghutne tekenge un sealings mein pratinidhi banne ka jismein pati aur patniyaan ek dusre se bandhte hai bachchon ke saath hamesha ke liye. Yogye jawaan purush aur jawaan mahilaaen 12 varsh ki umra se pratinidhi ban sakte hai un mare huwon ke liye jinko baptisma ka ashirvaad nahin mila tha. Yeh hai hamare Swargiye Pita ki ichcha tumhare aur mere liye.

Kai varsh pehle, ek vinamra aur vishwaasi kulpati, Bhaai Percy K. Fetzer, ko niyukt kiya gaya tha un Girjaghar sadasyon ko kulpati ashirvaad dene ka jo saamyavaad(communist) desh ke seemaao mein rehte the.

Bhaai Fetzer Poland ke bhumi par gaye un kathin dinon mein. Seemaaen band thi, aur kisi bhi naagrik ko kahin jaane ka ijaazat nahin tha. Bhaai Fetzer Germany ke Santon se mile jo wahan fass gaye the jab seemaaon ko badla gaya tha Vishwa Yudh II ke baad aur woh bhumi jahan woh rehte the Poland ka bhaag ban gaya.

Hamara neta un German Santon mein se tha Bhaai Eric P. Konietz, jo wahan apni patni aur bachchon ke saath rehta tha. Bhaai Fetzer ne Bhaai aur Bahan Konietz aur unke bade bachchon ko kulpati ashirvaad diye.

Jab Bhaai Fetzer United States laute, usne mujhe phon kiya aur pucha ki kya woh mere saath bhent kar sakta hai. Mere daftar mein baethte hi, woh rone lage. Usne kaha, “Bhaai Monson, jab mainne Konietz parivaar ke sadasyon ke siron par haath rakha, mainne aise vaade kiye jo pure nahin ho sakte. Mainne Bhaai aur Bahan Konietz se vaada kiya ki woh apne mulniwaas sthaan Germany laut sakenge, ki unhe kabza karne waale deshon ke hukum chalane waale nirnayon se roka nahin jaaega aur woh ek parivaar ki tarah bandh sakenge Prabhu ke ghar mein. Mainne unke bete se vaada kiya ki woh prachaar kaarye par jaaega, aur mainne unke beti se vaada kiya ki woh Parmeshwar ke pavitra mandir mein vivaah karegi. Tum aur main jaante hai ki band seemaaon ke kaaran, unhein un aashirvaadon ki purti nahin praapt hogi. Mainne kya kar daala?”

Mainne kaha, “Bhaai Fetzer, Main aapko itni achchi tarah jaanta hoon yeh jaanne ke liye ki tumne wahi kaha jo hamare Swargiye Pita ne chaha ki tum kaho.” Hum donon mere mez ke bagal mein ghutnon par hue aur prarthna kiya hamare Swargiye Pita se, yeh batlaate hue ki ek sewanisht parivaar ko Parmeshwar ke mandir ke baare mein vaade aur anye aashirvaad diye gaye hai jo unhe abhi nahin mil rahe hai. Sirf Woh hi yeh chamatkaar kar sakte the jiski hamein zaroorat thi.

Woh chamatkaar hua. Ek vachan patra par dastakhat(sign) kiye gaye Poland desh ke netaaon aur Federal Republic of Germany ke nataaon ke beech, un German naagrikon ko Pashchim Germany jaane ka mauka diya jaaye jo us jagah par fase the. Bhaai aur Bahan Konietz aur unke bachchein Pashchim Germany chale gaye, aur Bhaai Konietz us ward ke bishop ban gaye jahan woh rehte the.

Pura Konietz parivaar Switzerland ke pavitra mandir mein gaye. Aur kaun tha woh mandir pradhaan jinhonne unhein safed suit pehne khule baahon se swaagat kiya? Koi aur nahin par Percy Fetzer—woh kulpita jisne unhe woh vaada diya tha. Ab, apni pradhaan ki niyukti mein Bern Switzerland Mandir ke pradhaan ke rup mein, unhonne unhe Prabhu ke ghar mein swaagat kiya, us vaade ki purti ke liye, aur pati patni ko ek saath baandha aur bachchon ko maata-pita se.

Us jawaan beti ne kuch samay baad vivaah kiya Prabhu ke ghar mein. Us jawaan bete ne call praapt kiya aur ek pure-samay ka mission samaapt kiya.

Hum mein se kuch ke liye, hamara mandir tak ka safar thodi dur ka hai. Auron ke liye, samudra paar karna aur meelo jaana hota hai Parmeshwar ke mandir mein daakhil hone se pehle.

Kuch varsh pehle, Dakshin Africa mandir ka nirmaan samaapt hone se pehle, ek jila sammelan mein bhaag lete samay jo Salisbury, Rhodesia mein tha, main wahan ke jila pradhaan, Reginald J. Nield, se mila. Woh aur uski patni aur sundar betiyaan mujhse mili jaise main chapel mein daakhil hua. Unhonne mujhe bataya ki woh dhan ikattha kar rahein hai aur tayyaari kar rahein hai us din ki jab woh Prabhu ke mandir tak ka safar tay karenge. Magar, o, mandir to kitna dur tha.

Bhent ki samaapti par, chaaro sundar betiyon ne mujhse mandir ke baare mein sawaal puche: “Mandir kaisa hai? Humne to sirf tasveer dekhi hai.” “Hum kaisa mehsoos karenge jab hum mandir mein prawesh karenge?” “Hum kya achchi tarah yaad rakhenge?” Lagbhag ek ghante tak mainne un chaar ladkiyon se Prabhu ke ghar ke vishay mein baatein ki. Jab main hawaaiadda ja raha tha, unhonne haath hilaaya, aur sabse choti beti ne kaha, “Hum tum se mandir mein milenge!”

Ek varsh baad mujhe mauka mila Nield parivaar ka swaagat karne ka Salt Lake Mandir mein. Ek shaant baandhne waale kamre mein mera yeh saobhaagya tha anantta, aur samay ke liye bhi, Bhaai aur Bahan Nield ko baandhne ka. Phir darwaaze khule, aur woh sundar betiyaan, safed kapdon mein, us kamre mein aayi. Woh pehle maata se, phir pita se gale mili. Unke aankhon mein aansu the, aur unke hriday mein kritigyata. Hum swarg ke paas hi the. Ab har ek keh sakta, “Ab hum anantta tak ka ek parivaar hai.”

Yeh hai woh behtarin aashirvaad jo unke liye hai jo mandir aate hai. Hum sab yogye jiwan jiye, saaf haathon aur pavitra hridayon ke saath, taaki mandir hamare jiwan ko chu sakein aur hamare parivaaron ko bhi.

Swarg kitni dur hai? Main gawahi deta hoon ki pavitra mandiron mein woh kuch bhi dur nahin—kyunki inhi pavitra sthaanon par swarg aur dharti milte hai aur hamare Swargiye Pita Apne bachchon ko Apna sabse shaandaar aashirvaad dete hai.