Fakaʻaongaʻi ʻe he Kāingalotú e Konifelenisí ʻi he Moʻui Fakaʻahó
Kuo mou fanongo ki he ngaahi pōpoakí; kuo mou ongoʻi e Laumālié; kuo mou tukupā ke muimui ki he faleʻí. Ka kuo ʻosi ʻeni ʻa e konifelenisi lahí, ʻe fēfē nai haʻo ʻai ke hoko ia ko e konga hoʻo moʻuí ʻi he māhina ʻe ono ka hokó?
Ne vahevahe ʻe ha kāingalotu he funga māmaní ʻa e ngaahi meʻa ʻokú ne tokoniʻi kinautolu ke nau manatuʻi pea fakahoko e ngaahi pōpoaki ʻo e konifelenisi lahí.
Fakakau Atu ʻa e Konifelenisi Lahí ʻi Hoʻo Moʻui Fakaʻahó
Fakafanongo ki he ngaahi leá lolotonga ko ia hoʻo fakamālohisinó, fakaʻulí, fai e ngaahi ngāue fakaʻapí, pe teuteu ki he ʻahó.
—Sēmisi, ʻOniteliō, Kānata
ʻAi ke fetongitongi e kau mēmipa ʻo e fāmilí ʻi hono fili ha lea ke mou fanongo ki ai lolotonga e maʻumeʻatokoni pongipongí.
—ʻEsilī, Uasingatoni, ʻAmelika
Mamata ʻi ha ngaahi konga ʻo e konifelenisi lahí mo e fāmilí he Sāpaté.
—Kalānite, Kalefōnia, ʻAmelika
ʻAi ke Hoko e ngaahi Leá ko ha Konga ʻo e ʻEfiafi Fakafāmili ʻi ʻApí
Fili ha ngaahi pōpoaki ʻokú ke toe fie fakamanatu mo e fāmilí pea vahe kinautolu ki he mēmipa ʻo e fāmilí ke nau akoʻi ia ʻi he ngaahi efiafi fakafāmili ka hokó.
—Veni mo Senifā, ʻIutā, ʻAmelika
Lau pe mamata ʻi ha lea pea fekumi ki ha ngaahi taumuʻa ʻe lava ke mou ngāue ki ai ko ha fāmili.
—Toni, ʻAlesona, ʻAmelika
Fakaʻaongaʻi e Ngaahi Leá Ki hono Ako e Folofolá
Fetongitongi ʻi hono lau e ngaahi folofolá ʻi he pongipongí pea lau ha lea mei he konifelenisi lahí ʻi he efiafí.
—Taiana, Uasingatoni, ʻAmelika
Lau ha lea ki hoʻo fānaú he pō kotoa ko ha talanoa fakamohemohe.
—Heta, ʻIutā, ʻAmelika
Kumi ʻa e ngaahi potufolofola ne fakaʻaongaʻi ʻi he lea takitaha hili hoʻo lau e leá.
—Peki, ʻIutā, ʻAmelika
Fakaʻilongaʻi ʻa e meʻa kotoa ne kole mai ʻe he kau leá ke tau faí pea tukutaha e tokangá ki he muimui ki heʻenau ngaahi faleʻí.
—Hēleni, ʻAositelēlia
Ako Taha Taha e Tefitó
Hiki ha lisi ʻo e ngaahi tefito ne fai ki ai e lea he konifelenisi lahí ʻa ia ʻoku faitatau mo e ngaahi meʻa ʻokú ke fie fakaleleiʻi ʻi hoʻo moʻuí. Ako taha taha e ngaahi tefito ko iá ʻi hoʻo feinga ke ke toe lelei ange kimuʻa he konifelenisi lahi hono hokó.
—Lepeka, Tekisisi, ʻAmelika
Fakatefito hoʻo tokangá ʻi ha tefito lolotonga hoʻo ako folofola ʻi ha ngaahi ʻaho siʻi, pe ʻi he efiafi fakafāmili ʻi ʻapí ʻi ha ngaahi uike siʻi.
—Falanisisi, Naisīlia
Vahevahe ʻa e Ngaahi Pōpoakí mo ha Niʻihi Kehe
Fakakau ha ngaahi kupuʻi lea mei he konifelenisi lahí ʻi he ngaahi papa fanongonongó pe laʻipepa tufá.
—Toti, Uesi Vesinia. ʻAmelika
Fakahoko pe kau atu ki ha kautaha lautohi (book club) ʻo e konifelenisi lahí, ʻi he ʻInitanetí pe ko haʻo ʻi ai tonu. Ako he uike taki taha ha lea pea haʻu ki he kautaha lautohí kuó ke mateuteu ke vahevahe atu hoʻo ngaahi fakakaukaú.
—Sitefinī, ʻIutā, ʻAmelika