Ui ʻa Palesiteni Monisoni ke ʻi ai ha Kau Faifekau, Fanongonongo ha Ngaahi Temipale Foʻou ʻe Nima

Ne fakaava ʻe Palesiteni Tōmasi S. Monisoni ʻa e Konifelenisi Lahi Fakavaeuataʻu Hono 180 ʻa e Siasí, ne fakahoko ʻi he ʻaho Tokonaki mo e Sāpate, 2 mo e 3 ʻo ʻOkatopa 2010, ʻaki haʻane kole ki he kāingalotú ke toe tokolahi ange e kāingalotu ʻoku ngāue fakafaifekaú pea mo hono fanongonongo ʻo ha ngaahi temipale foʻou ʻe nima.

Ne toe fakaongo atu ʻe Palesiteni Monisoni ʻa e ui ki he “ke teuteu e talavou moʻui taau kotoa ʻe malavá” ke ngāue fakafaifekau; talitali lelei mo e kau finemui ʻoku nau fie ngāué pea fakahaaʻi ʻa e fie maʻu ko ia ʻe he Siasí ke ʻi ai “ha ngaahi hoa mali lahi ange” ke ngāue.

Naʻá ne pehē, “Ko e ngāue fakafaifekaú ko ha fatongia ʻo e lakanga fakataulaʻeikí, ko ha fatongia ʻoku ʻamanaki mai ki ai e ʻEikí meiate kitautolu kuó Ne foaki lahi ki aí.”

Ne fanongonongo ʻe Palesiteni Monisoni ʻoku ʻi ai e palani ke langa ha ngaahi temipale ʻe nima ʻi Haatifooti, Konetikati, ʻAmelika; ʻInitiapolisi, ʻInitiana, ʻAmelika; Lisiponi, Potukali; Tiuana, Mekisikou; pea mo Uataneta, Filipaini.

ʻOku aʻu hake leva ʻa e ngaahi temipale foʻou kuo fanongonongo pe lolotonga langá ki he 23. ʻI heʻenau kakató, ʻe ʻohake ʻe he ngaahi temipale ko ʻeni ʻe 23 ʻa e fakakātoa fakaemāmani lahí ki he 157.

Naʻe pehē ʻe Palesiteni Monisoni, “ʻOku hoko atu ʻetau langa temipalé, … Fakatauange ke tau ō maʻu pē ki he temipalé, ʻa ia kuo langa ke toe ofi ange ki hotau kāingalotú” (“ʻI Heʻetau Toe Fakataha Maí,” Liahona mo e Ensign, Nōvema 2010, 4).

Ko e ngaahi temipale foʻoú ni ko e temipale ia ke fuofua langa ʻe he Siasí ʻi Potukali, ʻInitiana pea mo Konetikati. Ko e Temipale Uatanetá ʻe hoko ia ko e temipale hono tolu ʻa e Siasí ʻi Filipainí pea ko e Temipale Tiuaná ʻe hoko ia ko e temipale hono hongofulu mā tolu ʻi Mekisikoú.

ʻI he vahaʻataimi ko ia ʻo e māhina ʻe ono ʻo e ongo konifelenisi lahi ʻo ʻEpeleli mo ʻOkatopá, ne fakatapui ai ʻe he Siasí ha temipale foʻou ʻe fā : Ko e Temipale Teleʻa Hila ʻAlesoná, Venikuva Pilītisi Kolomupiá, Sepū Siti Filipainí mo e Temipale Kievi ʻIukuleiní. ʻOku palani ke toe fakatapui e Temipale Laʻie Hauaiʻí ʻi he ʻaho 21 ʻo Nōvema, 2010 hili ia hano fakaleleiʻi lahi.