Ikel Meklou a Belkul Tekoi

Tiang a beot eng di ng klou a ultutelel suobel el desubii. Meng locha kora bleketakl sel domes er ngii ra rua kerrekar ma ses el eolt, eng di ng kmal beot a lak domtab er ngii e doltirakl ra osisiu el suobel ra klengar kid ra bekel sils. Se bol meringel a uldesued, sel ledubech a mengesang er kid, sel ledubech a kodall, e kede blechoel di ngarsel osisiu el rreted malechub e kede telkib el mo bekerurt, el omdasou el kmo a bo demereched, e ngungil.

A tara teletael ra klengar a uaia le kired el loltirakl er tial di merael mo chachisois a rretel klengar el diak el iior ra ses el eolt malechub a ringel el duubech.

Di bo debleketakl; ng bai beot a demechesang. Kid el rokui el sebeched el mdasou a ureor el osengkid ma temed. A rebebil omdasou el kmo a teletelel a klechad er tir a ultuil ra iildisel aikel kirir el meruul. Me te mekeek a mededaes el temir ra rua miting ma mekekerei el tekoi—luldimukl er ngii aikel taem el lengara ringel ra uldasou malechub ete mesaul. Meng di tir el oiseksekdii a klengar tir ra diak a kmal belkul, ete blechoel bechecherd a rengrir, diak a deoureng lolchesuar, e diak a kmal klou el belkul a klengar tir.

Meng tekoi el kmo a ngii dil ungil blekeradel alsekum eke nguu el morbab er sel telkelel eng mo diak a belkul. Sel sal kmal mo betok a ngerang el dorrul a otutii tiaikid el tekoi. Ngarngii a taem ea ikel kmal ungil a sebechel mo berraod el moktek, el omekberraod e omeksaul er kid.

A mellomes a rengul a medengelii e oltirakl ra suobel ra kerrekar ma ses el eolt. Te melasm el mengeroid er tir ra ongetikaik er tial merchereched el klengar ra bekel sils. Te oltirakl er sel tekoi el kmo “Ngarngii a lmuut el bebil ra klungiolel a klengar ra bai dongisois ra rreted.”¹ A dongedeb er ngii, ea moktek er tir a ngara ikel meklou a belkul tekoi.

A Elder Dallin H. Oaks, er tial dirk mlo merek el klou el ongdibel, a ulisechakl el kmo, “Ng kired el chemoit a bebil ra ungil tekoi meng mo sebeched el melilt ra rebebil el tir a ungil malechub ete kmal ungil ele tir el ngarngii a klaumerang er tir ra Rubak el Jesus Kristo e melisiich a telungalk.”²

Sel dosiik aikel kmal ungil tekoi eng mekrolid el mora uchelel osisechakl ra ebangkelio ra Jesus Kristo—el beot e klebokel el klemerang el mla mocholt el mei er kid lokiu a bekokeuii, diak a ulebengelel, e medengei a rokui el Chedam ra Babeluades. Aikang a osisechakl ma suobel, el beot el sebechel a ngalek el mo medengei, a meskid a nger ra ikel chaititeuokel el ker el kirel a klengar.

Ngarngii a klebekelel ma betengel el bebil ra taem eng diak domtab le kid el meringel losiik a chaititeuokel el nger.

El uaia, ng dimlak el meketeket ruriul ra reastronauts ma recosmonauts ra lliueklii a beluulechad e bocha lodengei el kmo a ballpoint pen a diak loureor ra melidiul. Ma rebebil ra kmal mellomes a rengrir el chad a mocha omuchel loureor kirel tial mondai. Ng millechoit a telael sikang ma betok el udoud, ea mlo ulebongel, ete rirellii a pen el sebechel oureor ra ngii dil ker, ra ngii dil teletael ra kleald ma kelekolt, ma bebul a ngii dil ngerang. Eng di te milkerang a reastronauts ma recosmonauts e keluches ruchei ra lbetik ra nger? Te di ulusbech oluches.

A Leonardo da Vinci a dilul kmo ‘sel betengel seikid a ngaruchei el llomes.”³ Sel domes aikel dodai ra osischakl ra chelsel sel uldasou el kirel a deoureng, uldasou ra diak a ulebengelel klengar, eng sebeched el metik e mo oureng a saul el kirel a betengel ma llemesel a Demad ra Babeluades. E sel, dobult el mo oltirakl er Ngii e nguchelel a llemesed.

A cheldecheduch a melekoi el kmo a oungerachel ra klekool ra football a ngarngii a luruul er ngii el teletael er sel kot el sils ra klekool. Ngorkedii a ptuu ra football el mor bab, e olecholt er ngii er tikal meketeketang el rak el ousekool chad, e kmo, “Rebuik, … tiang a ptuu ra football!” Ngii a mesaod ra klungel, teletelel, mekerang a losebek er ngii, lobang, malechub e lomidokl er ngii. Ngiliteterir tirkal chad el ousekool el mora kurand e kmo, “Tiakid a kurand.” Ngulbeteterir el lomais, el mesaod ra klungel, teletelel, llechul, e mekerang a lousekool a klekool er ngii.⁴

Ngikal oungerachel a mle medengei el kmo tirkal kmal meduch el ousekool chad me tial chimol tim, a sebecherir el mo mesisiich alsekum ete mo medengei aikel betengel osisechakl. Ng sebecherir el chemoit a temir el mesuub a bekel bedengel a teletael sel lousekool, eng di alsekum eng diak bol meduch ra ikel betengel, eng diak el sebecherir el mo mesisiich ra klekool.

A kumdasou e ngoumesingd er kid a di medengei el kmo ng meklou a ultutelel aikel betengel. Eng di a lebebil ra taem e kede touchakl ra betok el tekoi el ngii a mengesuseu er kid.

A llechukl el tekoi, ma bekel bedengel a osongel el klalou, ma klekedall el oderngesall—a rokui el ngosukid alsekum e kede ngara ungil usbechellel—a sebechel tomellid ra kakerous el teleael.

Eng di chelsel a betok el bedengel a ngor ma omelilt, ea ngariou a rengul Chad ra Galilee a dechor el oldars a chimal, e mengiil. A Tekingel a beot el klumech: “Mei, e moltirakl er ngak.”⁵ E Ngii a diak longedecheduch lobang a mesisiich el klalou ng bai chelellakl, el kekerei el ngor.⁶ Ng beot el remiid aikel betengel osisechakl ra ebangkelio lokiu a omaoch el tekoi el meir kid ra ngii dil ker.

A chedaol llechukl ma tekingir a rengar el profet a meskid a klou el ultutelel aikel beot el suobel ma osisechakl ra ebangkelio. A uchul e kede lmuut el mora ikal ngii a dodai ra osisechakl, el klikiid el osisechakl, ele ikaikid a rael el mora dmolech el moktek ra klemerang. Aikaikid a chesimer el mora ikel meklou a belkul el ngii a locha mo meringel er kid el mo medengei a belkul. Aikal beot, el betengel osisechakl a kiis el kirel a mo kiei el ngara ungil deleuil lobengkel a Dios ma chad. Aikaikid a kiis el mok a mado ra babeluades. Aikang a mekrolid el mora budech, deoureng, ma klaodengei el Chedam ra Babeluades a mla yaksok el mora Rengelekel el tir orrenges e olngesenges er Ngii.

Rodam ma rodos, ng bai ungil a detelkib el mo soro, e dorael er sel ungil rreted el ultuil ra teletael el dengara chelsel, el moktek er kid a ngara ikel meklou a ultutelel, ma osenged el bedul bab, me bo dungil mes aikel tekoi el meklou a belkul. Mei a bo domtab aikel dodai ra osisechakl el Demad ra Babeluades a mla mesterir a Rengelekel el ngii a mo kudmeklii a ungil dodai e bekerredechel e merau el klengar er tial beluulechad lobengkel a yaksok ra diak a ulebengelel klengar. Aikang osischeklid el mo remuul a “rokui el tekoi … el ngara llomes ma chelderoder el teletelel; eleng diak el [kired] el remurt el chengelakl er sel rreted ma klisiched. [Eng di] ng [kired] el mo blak a rengud, [meng] mo sebeched el … nguu a ngkeded.”⁷

Rodam ma rodos, a blak el reng el meruul aikel ngii a meklou a belkul tekoi a mekrolid el mora Osobelel a beluulechad. Tiaikid a uchu e “kede mengedecheduch ra Kristo, ngara deoureng ra Kristo, olisechakl el kirel a Kristo, omlaoch el kirel a Kirsto,… me [bo] dodengei el kmo [kid] ng techang ngkel domes er ngii el kirel a ngbetel a [kngtid].”⁸ Ma chelsel tial chaititeuokel, rrau a rengud er ngii, e merchereched el klengar er chelechang, e tiaikid a “kmal ungil el rael bo dobang.”⁹

Me sel dobult el mora Demad ra Babeluades e dosiik ra Llemesel el kirel aikel tekoi el ngii a meklou a belkul, e kede lmuut el suuebii a klou el belkul aikal euang el deleuill: obengkel a Dios, obengkel a telungalk er kid, obengterir a rebebil ra rechad, me kid. Me sel dorritel a klengar kid loba blak el reng ra uldasou, e kede mo mesang el kmo ngker ra chelsel tial ungil rael a bla bo decheroid er ngii. A osenged obok e kid a mo ungil medengelii, el kmo ngerang a kired el meruul meng mo sebeched el kmikiid a rengud e lmuut el sumechokl a moktek er kid.

A kot, sel delongeled kid ma Dios a kmal chedaol e klou a belkul. Kid a Ngelekel ra reng. Ngii a Demad. Ngii a di soal a deoureng el mei er kid. Me sel dosiik er Ngii, e dosuub el kirel a Ngelekel, Jesus Kristo, e de bok a rengud el kirel odbechel Chedaol Reng, ea klengar kid a mo chelellakl e ngara selbechakl el teletael. Kede mo melchesuar a klou el budech, deoureng, klungiolel a klengar sel dolasm el oltirakl ra diak a ulebengelel moktek ra Dios e doltirakl a Llechul.

Kede smisichii a delongeled kid ma Demad ra Babeluades sel dosuub el Kirel, dongedecheduch er Ngii, ouuchel a rengud ra kngtid, e blechoel oltirakl ra Jesus Kristo, ele “ng diak a chad el mei ra Chedam, a lak lokiu a [Kristo].”¹⁰ Me sel dolisiich ra delongeled kid ma Dios, eng kirel ngarngii a iileakel el temed Lobengkel. Ma bekel sils el dengara chelellakl el nglunguuch e dosuub chedaol llechukl, e dolasm el mo klikiid el kirel a babier ra mora templo—ea ikaikid a olchotel a kmo kede melasm el mo kmeed ra Demad ra Babeluades. Mei e doltirakl er sel ongit el ngara Psalms” “Bom chelellalk, e modengei el kmo ngak a Dios.”¹¹

Sel ongerung el deleuil a obengkel a telungalk er kid. Malsekum “eng diak a klungiaol el mtechir a telmellel a telungalk”¹² e tiraikid, eng kirel a telungalk er kid el mo kot el klou a ultutelel. Kede smisichii a deleongel ra telungalk sel dedak el meruul a beot el omeruul, el uaia belsoil ra telungalk ma ongdibel ra telungalk ma kuk di dmak el ngara omilil. Chelsel a deleuil ra telungalk ea beltik el reng a doluches er ngii eng t-i-m-e, taem. Sel bor ngii a temed lobengkel a tang ma tang a uchul a ungil deleuil ra blai. Kede mengedecheduch lobengkel, a tang ma tang, ng diak dosaod er ngii. Kede kasusuub, e oureng a saul el kirel a klekakerous er kid ma dirrek el ikel dosisiu er ngii. Kede kudmeklii a chedaol deleuil ra delongeled sel dedak el mora Dios lokiu a nglunguuch ra telungalk, omesubel ebangkelio, ma omengull ra Sandei.

Sel ongedei el deleuil a obengterir a rebebil ra rechad. Tiang a mekedmokl el deleuil sel bor ngii a temed lobengkel a tal chad ra chelsel a tal taem—el mo medengei aikel usbechellir, mesiou er tir, el chemoit a temed ma duch er kid el kirir. Ng mlo mechas a renguk ra tal odos el berraod ra ringel ma cheluodel a uchul eng diak a kmal ngerang el rellii, eng ding mle sebechel orrenges. Ma bekel sandei e ngosiik e omes er tirkel chad el ngara ringel ma sebek reng, e chemoit a temel, orrenges er tir. Ng meral mle klou el klengeltengat el mora klengar ra rebetok el chad.

Sel ongeuang el deleuil a kid. Ng kora ngodech el tekoi sel domes ra deleuil lobengked, eng ding kired. A rebebil ra rechad a diak el sebecherir el di tir lobengterir. Te di mesaod a mekngit ma telitur tir el tal sils el dimerekmo dil tir el mo ouketui tir. Msall e kdung er kemiu el kmo bo molngeasek ra kmal rereuchel e mtelkib el chemoit a temem el di kau el mo medengelkau. Mororael el omseues, momes ra ngesechel a sils, mngara deoureng ra blebelel a Dios, molbedebek aikel klemerang ra mla moluut el ebangkelio, e mosiik el kmo ngera belkul el mei er kau. Mosuub el mesekau el uaia sel osengel a Chedam ra Babeluades el kirem—el mekreos ra Rengul ngelekel redil malechub eke ngelekel sechal el chedaol a blebelem.

Rodam ma rodos, mei e bol mellomes a rengud. Mei e dobult el mora klikiid el ralm ra osisechakl ra mla moluut el ebangkelio ra Jesus Kristo. Mei el deu a rengud el ngmai el ngara sel betengel e bleketakl. A babeluades a mla lmuut el obok. A ebangkelio ra Jesus Kristo a mla lmuut el mei ra beluulechad, lobengkel a beot el klemerang ra chelsel a klou el moktek ra deoureng!

Rodam ma rodos, meng klemerang el kired el mo ngara deoureng. Malsekum e tial merchereched ma betok el ringel ra klengar a uchul eng meringel er kau el mo ngara deoureng, eng locha ungil taem er chelechang el mluut el sumechokl a moktek er kau el kirel aikel tekoi el ngii a meklou a belkul.

A klisiich a diak lemei lokiu aikel sebek reng lomeruul ng bai mei lokiu a mesisiich el dodai ra klemerang ma llomes. Ng mei sel dengai a uldesued ma rengud el lochang ra ikel beot el osisechakl ra mla moluut el ebangkelio ra Jesus Kristo. Ng mei sel dengai a uldesued ma rengud el locha ra ikel chedaol tekoi el ngii a meklou a belkul.

Mei e deruul a klengar kid el telkib el mo beot. Mei e dengodech aikel ngii a kirel mengodech ma moktek ra klengar kid bol moterekokl el ngara ikel klebokel e beot, ngara rael ra Klekeristiano—el ngii a rael el mekrolid el bedul a ngarngii a belkul klengar, deoureng, ma budech. Meng nglunguchek, eak meskemiu a klengeltengat er ngak, el ngara chedaol ngklel a Jesus Kristo, amen.