E Rawa Beka Meda Raica na Karisito?

Ena dua na bogi a wilika tiko e dua na tukanigone e dua na italanoa vua e dua na makubuna yalewa yabaki va ena gauna a rai cake kina ka kaya “Tukaqu, raica na kalokalo!” Ena mata dredredre a kaya na kena turaga, “E daru tiko oqo e vale, noqu lewa. E sega eke na kalokalo.” Ia a cikevaka ga na gone, “E tu na kalokalo ena nomu rumu! Raica!”

A rai cake na tukanigone, ka kidroataka, ena nona raica ni sa tayana tu ena siligi na metali cacalivaliva. E vakavuqa na kena sega ni laurai, ia ena gauna e yaco kina me cilava donu na rarama, e sa vaka dina sara ga na irairai ni dua na lomanibai ni kalokalo. E taura na mata ni dua na gone me raici ira, ia era a tu dina e kea. Mai na gauna o ya ka lako yani, ni dau curu ki na loma ni rumu oqo na tukanigone ka rai cake, sa rawa me raica na veika a sega ni a dau raica rawa e liu.

Eda sa yacova e dua tale na gauna totoka ni Siganisucu ka sinai tu ena ivakatagi kei na cina, soqo ni marau kei na ka ni loloma. Ia, kina veimata tamata kece, o keda na lewenilotu ka vakayacani vua na iVakabula sa gadrevi vei keda meda rai baleta yani na kena dau vakalasui na dina ni ibalebale ni gauna talei oqo ena loma ni yabaki.

Au vakataroga e lomaqu se lewe vica sara mada e Peceliema era kila ni a sucu na iVakabula ena vanua sara ga o ya, ka voleka sara vei ira? Na Luve ni Kalou, na Mesaia a waraki ka yalataki tu mai vakadede—sa tu maliwai ira!

O nanuma tiko na ka a kaya na agilosi vei ira na ivakatawa ni sipi? “Ni sa sucu vei kemudou ena siga oqo, ena koro i Tevita, na iVakabula, ko koya na Karisito na Turaga.” Era sa kaya vakai ira, “Me datou mai lako ki Peceliema, me raica na ka oqo sa qai yaco, o koya sa vakatakila mai vei kedatou na Turaga” (Luke 2:11, 15).

Me vakataki ira na ivakatawa ni sipi ena gauna makawa, e gadrevi meda kaya e lomada, “Meda raica na ka oqo sa qai yaco.” E gadrevi meda vakatulewa e lomada. Meda raica na Yalosavasava ni Isireli ena vale ni manumanu, ena valetabu, ena ulunivanua, ka vakakina ena kauveilatai. Me vakataki ira na ivakatawa ni sipi, meda vakalagilagia ka vakacaucautaka na Kalou ena itukutuku ni reki uasivi oqo!

Ena so na gauna na veika dredre duadua meda raica sai ira sara ga ka ra tu e matada ena veigauna. Me vaka ga na tukanigone ka sega ni raica rawa na kalokalo ena siligi, ena so na gauna eda sega mada ga ni raica na veika e rawarawa tu ga me laurai.

O ikeda eda sa rogoca na itukutuku lagilagi ni nona lako mai na Luve ni Kalou, o ikeda eda sa ciqoma na Yacana ka veiyalayalati meda muria na Nona sala me vaka Nona tisaipeli—sa dodonu me da dolava na lomada kei na noda vakasama ka raici Koya vakaidina.

E levu sara na sala ena totoka kina na draki ni Siganisucu. O ya na gauna e dau vakaraitaki kina na veikauwaitaki kei na veilomani ni veitacini. O ya e dua na gauna meda vakananuma vakalevu cake kina na noda dui bula kei na veika me baleta e vuqa na veivakalougatataki eda taukena. Sa ikoya e dua na gauna ni veivosovosoti. Sa ikoya e dua na gauna me marautaki kina na ivakatagi kei na cina, soqo ni marau kei na iloloma. Ia na cacalivaliva ni gauna e sega ni dodonu me vakabuwawataka noda rai ka vakalatilati ena noda raica vakaidina na Tui ni Sautu ena Nona itutu vakaturaga.

Meda cakava taucoko na gauna ni Siganisucu ena yabaki oqo me dua na gauna ni reki ka marau, me gauna ni noda vakaraitaka na veivakurabuitaki ni nona tala mai na noda Kalou Cecere na Luvena E Duabau Ga, o Jisu Karisito, me vueta na vuravura!