Ko Hono Tokoniʻi ʻo e Fānaú ke Fakaʻaongaʻi ʻEnauTauʻatāina ke Filí

Naʻe taʻehalaia ʻa ʻĀtama mo ʻIvi ʻi he taimi naʻe fakatupu ai kinaua ʻe he Tamai Hēvaní. Naʻe ʻikai ke lahi ʻena ʻilo ki he moʻuí mo hono ngaahi nunuʻá. Ka naʻe ʻaʻeva ʻa e Tamai Hēvaní mo kinaua mo akonekina kinaua, pea naʻá Ne faʻa kātaki ʻi he taimi naʻá na ako ai ʻo fekauʻaki mo ʻena moʻui ʻi māmaní.

ʻI heʻetau hoko ko e mātuʻá, ʻoku tau maʻu foki ʻa e faingamālie ke nofo fakataha mo ʻetau fānaú mo akonakiʻi kinautolu. Neongo ia, ʻoku ou pehē ʻoku ʻi ai e taimi ʻe niʻihi ʻoku ngalo ʻiate kitautolu ko ʻetau fānaú ko e fānau fakalaumālie foki kinautolu ʻa ʻetau Tamai Hēvaní. ʻOku ʻi ai hotau fatongia ke tokoniʻi kinautolu ke nau ako ʻenau ʻuluaki lēsoní, pea ko hotau misioná ia ke tataki kinautolu ki he Fakamoʻuí, ko Sīsū Kalaisi.

Kapau te tau muimui ʻi he sīpinga ʻa e Tamai Hēvaní ʻi he Ngoue ko ʻĪtení, te tau ʻai kiate kitautolu ʻa e fatongia ko hono lehilehiʻi ʻetau fānaú mo akoʻi kiate kinautolu ʻa e ongoongolelei ʻo Sīsū Kalaisí. ʻI heʻetau fai iá, ʻe fie maʻu ke tau akoʻi kiate kinautolu ʻa e ngaahi nunuʻa ʻo e ngaahi meʻa ʻoku nau faí. ʻOku ʻikai ko ha ngāue faingofua ʻeni, he ʻoku tau kei ako pē foki mo kitautolu, pea ʻi ai mo e taimi ʻoku ʻikai ke tau fai ai ki he finangalo ʻo ʻetau Tamai Hēvaní. Pea taimi ʻe niʻihi ʻoku tau fie ala atu ʻo fakahaofi ʻetau fānaú neongo ʻe lelei kiate kinautolu haʻanau ako mei heʻenau ngaahi fehālaakí.

Talu pē mei he kamataʻangá mo e faʻa kātaki ʻa e Tamai Hēvaní ʻi Heʻene akoʻi ʻa ʻĀtama mo ʻIvi kau ki he tauʻatāina ke filí. Naʻá ne ʻoange kiate kinaua ha ngaahi fekau, ngaahi nunuʻa, pea mo e mālohi ke fakaʻaongaʻi ʻena tauʻatāina ke filí, ʻo Ne folofola, “ʻE ngofua ʻa hoʻo kai faʻiteliha mei he ʻakau kotoa pē ʻo e ngoué, ka ko e ʻakau ʻo e ʻilo ʻo e leleí mo e koví, ʻe ʻikai te ke kai mei ai, ka neongo iá, ʻoku ngofua ke ke fili maʻau, he ʻoku foaki ia kiate koe; kae manatu ʻoku ou fakatapui ia, he ko e ʻaho te ke kai aí ko e moʻoni te ke mate” (Mōsese 3:16–17; ko e toki tānaki atu ʻa e fakamamafá).

Mahalo te tau fifili ki ha founga ke poupouʻi ʻaki ʻetau fānaú ke nau muimui ʻi he ngaahi fekaú ʻo ʻikai ke tau fakamālohiʻi kinautolu ke fai ia. ʻOku lahi e meʻa ʻe lava ke tau fai ʻa ia ʻe lava ke tokoní. Te tau lava ʻo akoʻi ʻa e ongoongoleleí ki heʻetau fānaú, kae tautautefito mei he folofolá, pea tau moʻui leva ʻo fakatatau ki he ngaahi tefitoʻi moʻoni ko iá. ʻE lava ke tau akoʻi kinautolu ʻi he lea mo e faʻifaʻitakiʻanga ke nau fakafalala ki heʻetau Tamai Hēvaní pea vahevahe mo kinautolu ʻa e ngaahi tāpuaki ʻoku maʻu ʻi hono moʻui ʻaki ʻo e ongoongoleleí. ʻE lava ke tau akoʻi kiate kinautolu koeʻuhí ko hotau ngaahi vaivaí ʻoku tau fie maʻu ʻe kitautolu mātuʻá ʻa ʻEne ʻofá, ʻaloʻofá, mo e faʻa kātakí ʻo hangē pē ko e fie maʻu ia ʻe heʻetau fānaú.

ʻI he taimi ʻe niʻihi ʻoku anga-kovi ai ʻetau fānaú pea kamata ke mole ʻetau ʻamanakí, ka he ʻikai ʻaupito mole meiate kitautolu ʻa e ʻamanaki mai ʻa ʻetau Tamai Hēvaní. Kuo pau ke tau ako ke tau sio ki heʻetau fānaú ʻo hangē ko e ʻafio mai ʻa ʻetau Tamai Hēvaní kiate kitautolú; ko Hono ngaahi foha mo e ngaahi ʻofefine ʻoku malava ke nau hoko ʻo tatau mo Ia ʻi he mālohi mo e ʻaloʻofa ʻa Hono ʻAló. ʻOku ʻikai ke tau maʻu e mālohi ke fakahaofi ʻetau fānaú, ka ʻe lava ke tau hoko ko e kau faʻifaʻitakiʻanga lelei pea ngāueʻi ʻetau tuí ke ʻaonga kiate kinautolu.

ʻOku ʻikai ke tau ʻi hení ke fakamālohiʻi ha taha ke ne fai e finangalo ʻo e Tamai Hēvaní. Ko e moʻoni, ʻe fakafalala pē ʻa e lahi ʻo e tauʻatāina mo e fatongia ʻoku tau ʻoange ki heʻetau fānaú ʻi honau taʻu motuʻá mo e ngaahi meʻa ʻoku nau lavá. ʻI heʻetau tokoniʻi ʻetau fānaú ke fakaʻaongaʻi totonu ʻenau tauʻatāina ke filí, ʻe toe faingofua ange ke akonakiʻi mo ʻofaʻi kinautolu, neongo pe ko e hā e meʻa ʻoku nau faí.

Naʻe ʻafioʻi ʻe heʻetau Tamai Hēvaní ʻe fakataueleʻi ʻa ʻĀtama mo ʻIvi peá na kai mei he ʻakau ʻo e ʻilo ʻo e leleí mo e koví. Naʻá Ne ʻosi teuteuʻi ʻa e hala ke na foki aí ʻo fakafou ʻi Hono ʻAló. Naʻá Ne fekauʻi mai ha ʻāngelo ke akoʻi kinaua fekauʻaki mo e feilaulau fakalelei ʻa hotau Fakamoʻuí, ʻa e ngaahi tefitoʻi moʻoni ʻo e fakatomalá, mo e founga ʻe lava ke na ui ai ki he ʻOtuá ʻi he huafa ʻo e ʻAló pea maʻu ha fakamolemole ʻo ʻena ngaahi angahalá ʻi he ʻaloʻofa mo e ʻofa ʻa e Tamai Hēvaní (vakai, Mōsese 5).

ʻI heʻetau fakahā ʻetau ʻofa ki heʻetau fānaú pea akoʻi kiate kinautolu neongo kapau te nau hē mei he halá, te tau kei tuʻu maʻu pē, ʻo ʻamanaki mo lotua kinautolu ke nau maʻu ʻa e fiefiá ʻi he tui kia Sīsū Kalaisí mo e fakatomala moʻoni. ʻI heʻetau manatuʻi e ngaahi tefitoʻi moʻoni ko ʻení, ʻe tāpuakiʻi kitautolu ke toe lahi ange hono fakafonu ʻaki kitautolu ʻa e ʻofa haohaoa ʻa Kalaisí pea tau toe lavameʻa ange ʻi heʻetau hoko ko e ngaahi mātuʻá (vakai, T&F 121:41–46).