Ko e Mālohi ʻo e Efiafi Fakafāmili ʻi ʻApí

ʻOkú ma maʻu mo hoku husepāniti ko Lui ʻAnitōnió ha fakamoʻoni maʻongoʻonga ki he mālohi ʻo e efiafi fakafāmili ʻi ʻapí mo ʻene lava ke ngaohi hotau ngaahi fāmilí ke mālohi ange ʻi he ongoongoleleí. Naʻe ʻikai faingofua maʻu pē ʻema feingá, ka ʻi he ʻosi atu ʻa e ngaahi taʻú kuó ne fakahoko ha faikehekehe lahi maʻamaua mo ʻema fānau ʻe toko faá.

Ko e taha ʻo e ngaahi momeniti makehe ʻi heʻemau efiafi fakafāmili ʻi ʻapí ko e taimi ko ia naʻe teuteu ai homa foha ko Leinaní ke papitaisó. Naʻe loto ʻema ongo tamaiki fefine lalahí, ʻa Sinitia mo Liliani, ke na fai e ngaahi lēsoni ki he māhina ki muʻa ʻi hono taʻu valú. Naʻá ku fiefia mo hoku husepānití he sio ki heʻena akoʻi ʻa e taumuʻa mo e ʻuhinga ʻo e papitaisó--ʻa e lēsoni tatau pē ko ia ne ma akoʻi kiate kinaua ʻi he teuteu ke na papitaisó. Hili mei ai ha taʻu ʻe fā, ne muimui ʻa Leinani ʻi he sīpinga ne tā ʻe hono ongo tuofāfiné ʻo ne akoʻi e lēsoni fekauʻaki mo e papitaisó ki hono kiʻi tuofefine ko ʻĒlení.

Ne hokohoko atu hono faitāpuekina kimaua mo ʻema fānaú ʻe he efiafi fakafāmili ʻi ʻapí lolotonga e ngaahi faingataʻa ʻi honau ngaahi taʻu hongofulu tupú. Ne tokoni ʻeni kiate kinautolu ke nau kei tauhi maʻu ʻenau ngaahi fakamoʻoní pea hokohoko atu ʻa e faivelenga ʻi he ongoongoleleí. Ko e ʻahó ni kuo foki mai homa fohá mei he ngāue fakafaifekaú, pea kuo mali temipale ʻema ongo tamaiki fefiné pea ʻi ai mo ʻena fānau.

ʻOku mau fakamoʻoni ko e taha ʻo e ngaahi polokalama lelei taha ʻo e Siasí ʻa e efiafi fakafāmili ʻi ʻapí. ʻOkú ma ʻilo kuo hanga ʻe heʻema muimui ki he fakahinohino ʻa e palōfitá ke fakahoko maʻu pē ʻa e efiafi fakafāmili ʻi ʻapí ʻo ʻomai ha ngaahi tāpuaki maʻongoʻonga ki heʻemau moʻuí, pea ʻokú ma ʻilo ʻe maʻu ʻa e ngaahi tapuaki ko iá ʻe ha faʻahinga taha pē ʻoku vilitaki ke muimui ʻi he fakahinohino ko iá. ʻOkú ma fakamoʻoni ki he lahi ʻo e ngāue mo e palani ʻoku fie maʻu ki aí, ka kiate kimaua, ʻoku mahulu ange ʻa e ngaahi tapuaki ʻo ʻītaniti ʻokú ma maʻú ʻi he miniti kotoa pē ʻo ʻema feingá.