Pwaisikellahng Mour en Ehu Rahn

Tohto mwahnakapw akan kin kaunop pali en mwohni pwehn papah nan misin. Nan Africa kisehn kaunop wet iei koadoahkehda uwen mwohni me itar ong pwainda passport. Sedrick Tshiambine koadoahkehda me e anahne ni wiepen pesnes ehu: sang ni netiki uht sang mwurin pwaisikel pwoat.

Sedrick kin kousoan nan Luputa, Democratic Republic of Congo. Ih emen en mwahnakapw 45 nan district en Luputa me wie doadoahk pwehn nekidala mwohni ong passport pwehn kohla misin. Nan DR Congo pweinen passport ehu iei tala $250, me iei reikis siluh en peinen kawada ihmw.

Ahpw Sedrick sohte pweiek. E wiahda nah mwohni ong misin sang ni pwaisikel kilomehder 15–30 (9–19 mwail) sang Luputa kohlahng kisin kousapw kan, wasa me e kin pwainda uht kan, ih eri kin pwaisikel pwur kotehla mohs karakar akan en Africa, were pwaisikelo toutouki uht kan me e pahn netikihla nan kahnihmwo. Nan ehuehu wihk e kin seiloangkihla kilomehder 180 (mwail 112) pohn ahl pihk kan, oh pak ehute me ah wisiko sapahrekla kahrehieng pwaisikelo eh sepehlda.

Sang ni eh nannanti kan Sedrick koledi ele $1.25 nan ehu wihk, de $65.00 nan ehu pahr. E koadoahkehkda pweinen nah passporto erein sounpar pahieu , ahpw met e ese me ah mour ehu rahn pahn iangahki misin en kalohk rahn koaros pwehki e kaunopadahr mwohni pwehn sapengala malipilip en papah.