Kauno Ketin Anahne Misineri

Nan Oaktope ahpwete keimwsekla nan tiepene lap I pakairki anahnepen misineri. Mwahnakapw pwulopwul, koahiek, warohng koaros konehng papah nan misin. Soangen papah wet iei doadoahk en priesthood—pwukoa ehu me Kauno ketin kasik sang kitail me soahng tohto kohiengehr. Mwahnakapw akan, I poahngokih kumwail en kaunop kumwail ong papah ni duwen misineri. Kolokol pein kumwail en mwakelekel oh unsek oh warohng en wia wiliepen Kauno. Kolokol amwail roson mwahu oh kehlail. Onopiki pwuhk sarawi kan. Wasa me e mie, towehda seminary oh institute. Kapehsehki pein kumwail pwuken misineri de handbook Preach My Gospel.

Peinakapw akan, kumwail sohte iang ahniki pwukoa en priesthood duwehte mwahnakapw akan ong papah ni duwen misineri kan me kin kalohk rahn koaros, ahpw kumwail pil kin kihda sawas laud ni duwen misineri, oh se kasamwoh amwail papah.

Ong ohl oh lih mah kan en Mwomwohdiso, I katamanohng kumwail me Kauno ketin anahne ahpwete tohtohlahn kumwail en papah ni duwen misineri kan me kin kalohk rahn koaros. Ma kumwail saikinte lel ansou nan amwail mour en papah nan misin en pwopwoud kan, I kangoangeikumwail en kaunop met ong rahno me, ni duwen me irair me kumwail mih loale pahn mweidada, kowe oh ahmw pwoud pahn kak en wia met. Mie ansou malaulau nan amwail mour en pwopwoud me kumwail pahn paieki ngehn kaselel oh nsenamwahu me kin kohdo sang ni papahpene nan doadoahk en Mwohnsapwo.

Eri, ekei kumwail mwein kin namenek de medewe me pein kumwail souitar en alehda malipilip en papah. Tamataman me met iei sapwellimen Kauno doadoahk, oh ni ansou me kitail kapwkapwaiada poahngok en Kauno, kitail ahniki pwung en alehdi sapwellimen Kauno sawas. Kauno pahn kakehlailihda oh apwalihala tihnsau me toutou kin kohdieng powe.

Mehteikan, mendahte ahr warohng papah, kakete kehn me tohto arail pwukoa me kesempwalsang. Mwahu mehlel ei tamataman inou en Kauno: “I pahn kin wauneki irail akan me kin waunekin ie.” (1 Samuel 2:30). Sohte nanpwungatail me pahn wauniki Samatail Nanleng oh atail Sounkomouro mwahusang atail pahn papah ni duwen misineri loaloapwoat oh limpoak.

Karasaras en soangen papah wet iei irair en misineri en Juliusz oh Dorothy Fussek, me malipilip en kapwaiada misin ehu nan Poland. Brother Fussek ipwidi nan Poland. E ese lokaiahn sahpwo. E poakohng aramas akan. Sister Fusssek ipwidi nan England oh sohte nohn ese duwen Poland oh sohte douluhl me e ese duwen aramas akan. Ni ara likih Kauno, ira doula nan ara pwukoahu. Doadoahko kaloaloid, ara pwukoahu laud mehlel. Ni ansouo misin saikinte kokouda nan Poland. Pwukoa me kohieng pwopwoudo iei en kaunopada ahlo pwe misin ehu en kokouda.

Elder oh Sister Fussek mwoarosala pwehki uwen laud en ara pwukoahu? Sohte pak ehu. Ira ese me ara malipilipo sang Koht. Ira kapakapiki Sapwellime sawas, oh ira nantihieng ara doadoahko ni unsek oh loaloapwoat.

Mwurin ansou ieu Elder Russell M. Nelson en Pwihn en Wahnpoaron Ehk-riemeno; Elder Hans B. Ringger, me ansouo wia kisehn Pwihn en Isiakan; oh ngehi, iangahki Elder Fussek, tuhweng kaun en pali me pid lamalam kan, Adam Wopatka, en kopworment en Poland. Se rong eh nda, “Se kasamwoh amwail mwomwohdisohn wasaht. Kumwail kak kawada imwamwail kan; kumwail kak kadarodo noumwail misineri kan. Ohl menet,” idilahng Juliusz Fussek, “papah mwahu amwail mwomwohdiso. Kumwa kak kalahnganiki ah karasaras oh ah doadoahk.”

Duwehte Fussek kan, kitail en wia dahme kitail konehng wia nan doadoahk en Kauno. Kitail eri pahn kak, iang Juliusz oh Dorothy Fussek, kapwaiada Melkahkao:

“Sawasepei pahn pwarodo sang rehn Kauno.

“… Silepomw sohte kin ketin seimwokla.

“Silepen Israel sohte kin ketin lisoi de seimwok” (Melkahka Kan 121:2–4).