Te Itoito i te Faarururaa i te Vero

I te piti o te pô no te puhaparaa a te Feia Apî Tamahine no ta‘u tĭtĭ, ua faaruru matou i te ua rahi e te mata‘i puai. E 24 tamahine apî e e piti na tuahine faatere no ta‘u paroita tei haere mai i te puhaparaa, e ua ti‘a roa ia faaô atu matou paatoa i roto i te hoê o na fare na‘ina‘i e piti no te paruru ia matou. Ua topa puai te ua e te puai noa’tu â te mata‘i. Ua haamana‘o tamau noa vau i te pure ta to matou peresideni tĭtĭ i pûpû na mua’tu no te paruru ia matou. Ua pure atoa te pŭpŭ o ta matou iho paroita i roto i to matou fare na‘ina‘i e ua pure au i ta‘u iho mau pure.

E rave rahi mau tamahine tei ri‘ari‘a e mea ohie ia ite i te tumu no te reira. E ere to matou fare na‘ina‘i i te mea pautuutu roa, e tei piha‘iho matou i te hoê anavai pape. I roto i te area 20 minuti i muri mai, no te puai ino o te vero ua horo te taatoaraa o te tĭtĭ mai to ratou mau fare no te paroita i roto i te mau fare o te mau tauturu, te vai ra i te vahi teitei a‘e. Ua pure to‘u peresideni tĭtĭ i te tahi â pure, e ua himene matou i te mau himene, te mau himene no te Paraimere, e te mau himene no te puhaparaa no te tamata i te tamahanahana ia matou iho. Oia mau, ua ri‘ari‘a roa matou, ua ite râ matou e e afaro te mau mea atoa. Hoê afa hora i muri iho ua nehenehe ia matou ia ho‘i atu i to matou fare na‘ina‘i no te paroita.

Ua ite matou i muri iho eaha tei tupu i te vero i taua pô ra. Ua vahi te vero na ropu. Ua haere te hoê na piha‘iho ia matou na te pae atau e te tahi na te pae aui. E ere ïa te vero ta matou i faaruru i te mea ino roa‘e !

Ua ite au e ua faaroo te Atua i ta matou mau pure i taua pô ra e ua paruru Oia ia matou i te puairaa o te vero. No teaha te hoê vero i vahi ai maori râ ua hinaaro te Atua ia na reira ? Ua ite au e i roto i te mau vero no te oraraa, e nehenehe ta tatou e pure i te mau taime atoa i te Metua i te Ao ra e e faaroo e e pahono Oia ia tatou, ma te horo‘a mai i te itoito e te paruru e hinaarohia e tatou no te tapae i te vahi papû.