Endurreisn allra hluta

Spámaðurinn Joseph Smith skipulagði Líknarfélagið sem nauðsynlegan hluta kirkjunnar. Við vonumst til þess að geta sem forsætisráð hjálpað ykkur að skilja hvers vegna Líknarfélagið er mikilvægt í lífi ykkar.

Við vitum að konur í Nýja testamentinu sýndu trú á Jesú Krist og létu til sín taka í verki hans. Í Lúkas 10:39 er greint frá Maríu, sem „settist … við fætur Drottins og hlýddi á orð hans.“ Í Jóhannes 11:27 ber Marta vitni um Krist: „Hún [sagði] við hann: Já, herra. Ég trúi, að þú sért Kristur, Guðs sonur, sem koma skal í heiminn.“ Í Postulasögunni 9:36, 39 er greint frá „[lærisvein, konu] að nafni Tabíþa, … [sem] var mjög góðgerðasöm. … Og allar ekkjurnar komu … sýndu … kyrtla og yfirhafnir, sem [hún] hafði gjört.“ Í Rómverjabréfinu 16:1–2 er greint frá Föbe, sem var „þjónn safnaðarins“ og „bjargvættur margra.“

Þessi fyrirmynd trúar, vitnisburðar og þjónustu varðveitist í kirkju síðari daga og var formlega staðfest með skipulagi Líknarfélagsins. Julie B. Beck, aðalforseti Líknarfélagsins, kenndi: „Líkt og frelsarinn bauð Mörtu og Maríu í Nýja testamentinu að taka þátt í verki hans, þá er konum þessarar ráðstöfunar boðið að taka þátt í verki Drottins. … Stofnun Líknarfélagsins árið 1842 varð til að virkja sameiginlega krafta kvenna í þeim sérstöku verkefnum að byggja upp ríki Drottins.“¹

Við komum verkinu til leiðar með því að beina kröftum okkar að tilgangi Líknarfélagsins: Auka trú og persónulegt réttlæti, styrkja fjölskyldur og heimili og finna og aðstoða nauðstadda.

Ég ber vitni um að Líknarfélagið var skipulagt að guðlegum hætti til að aðstoða við verk sáluhjálpar. Sérhver Líknarfélagssystir gegnir mikilvægu hlutverki í að koma þessu helga verki til leiðar.

Silvia H. Allred, fyrsti ráðgjafi í aðalforsætisráði Líknarfélagsins.