Pukōt Em̧m̧an eo

Ilo tōreo rej pukōt juōn em̧ kāāl, ruo ripālele rej Armej ro Rekwojarjar ilo Raan Kein Āliktata kar kōnono n̄an ro riturier kōn pelakin jukjuk in pād eo im jikuuļ ko ilo eriā eo.

Juōn kōrā rekar kōnono n̄an eaar ba kōn jikuuļ eo ajri ro nejin rej pād ie: “Ijin ej jikin eo em̧m̧antata! Būrinjepōl eo ej juōn em̧m̧aan ejouj im em̧m̧an; rūkaki ro relukkuun kapeel, jouj im jemjerā. Ilukkuun m̧ōņōņō bwe ajri ro nejim remaron̄ pād ilo jikuuļ in em̧m̧an. Kwonaaj iakwe ijin!”

Bar juon Kōrā eaar ba kōn jikuuļ eo an ajri ro nejin: “Ej juōn jikin enana. Būrinjepōl eo eļōmņak kōn e make; rūkaki ro rejekapeel, renana, im rejjab jemjerā. Eļan̄n̄e imaron̄ emmakūt jān eriā in, Imaron̄ kōm̧m̧ane ilo jidik wōt iien!”

Men eo ekam̧ōņōņō ej bwe kōrā ro jim̧or rej kōnnaan kōn ejja būrinjepōl eo wōt, ejja rūkaki ro wōt, im ejja jikuuļ eo wōt.

Kwoj kile ke bwe armej remaron̄ lo jabdewōt men rej kappukōte? Lukkkuun pukōte, im komaron̄ loe jim̧or em̧m̧an im nana ilo enan̄in aolep im men otemjej. Armej rekar kōm̧m̧ane ejja men in wōt n̄an Kabun̄ eo an Jisōs Kraist im Armej Ro Rekwojarjar ilo Raan Kein Āliktata jān jinoin. Ro rej kappukōt em̧m̧an renaaj lo juōn armej ejouj im tiriam̧o—juōn armej eo ej iakwe Irooj im kōņaan jerbal n̄an E im kōjeram̧m̧an mour ko an ro m̧ōttaer. Ak ebarāinwōt m̧ool n̄e ro rej kappukōt nana naaj ilo m̧ool lo men ko rejjab lukkuun weppān.

Jerata, ilo iien ko men kein rewaļok men̄e ilo Kabun̄in. Ro rej pukōt wun ko n̄an ņotaik kwaļo̧k eļap ekkōn, ļōmņak im pukōt ankilaer. Rejjab maron̄ kōtļo̧k men eo rej dāpiji. Rej kōnono riap im lo bōd ippān ro jet. Rekar bōk en̄jake enana ium̧in eļōn̄ iiō, bōk aolep iien ko rem̧m̧an n̄an kadikļok kautiej ro jet. Menin ejjab kam̧ōņōņōik Irooj, “bwe ijo ebanban im akwāāl rej pād ie, pok im jerbal otemjej renana rej pād ie” (Jemes 3:16).

Būreejtōn George Q. Cannon (1827–1901) jeļā kajjen Būreejtōn Brigham Young (1801–77) jerbal im epaake eļōn̄ iiō ko, jim̧or āinwōt juōn membōr an Doulul an Jon̄oulruo Rijilōk im āinwōt an rikakpilōklōk ilo Būreejtōnji eo Kein Kajuōn. Ālkin mej eo an Būreejtōn Young, Būreejtōn Cannon jeik ilo rekoot eo an make: “Ijjan̄in ņotaik ak lo bōd ilo tōl an [Brigham Young], ilo an kōkapilōklōk ak katakin ko an jabdewōt iien ilo buruō, edikļok ilo naan im m̧akūtkūt ko aō. Menin ej juōn kam̧ōņōnō n̄an eō kiiō. Lōmņak eo kar ippā ekar: N̄e ij ņotaik ak lo bōd ippān, ak ekajete Būratōr Brigham, ewi jon̄an ettoļo̧k in Aō etaļ; n̄e Ij jinoe, ia Inaaj bōjrak ie? Ij jab leke eō make ilo kain kooj jabin. Ijeļā bwe bun̄jan tōmak emmakijkij an waļo̧k jen m̧ōņōņō eo an jetōbin ņotaik im lo bōd. Ro jet, kōn eļapļok kajoor, mālōtlōt, im iminene jān n̄a, remaron̄ kōm̧m̧an eļōn̄ļo̧k men ko im ellā jān uwaak ko renana me Ijjab maron̄ kōm̧m̧ani.”¹

Kajoor in kapilōk an Būreejtōn Cannon ej juōn me eo kōj membōr ro an Kabun̄in aikujin kejokļo̧kjeņ kake kōn eļap kea. Naan an Anij kakkōl rikaloor an Kraist n̄an “erreo, … aenōm̧m̧an, jouj, im pidodo n̄an em̧m̧anļo̧k, obrak kōn tiriamo im leen ko rem̧man, ilo ejjeļo̧k bōd in ekajet, im ejjeļo̧k etao.” N̄an ro rej kōm̧m̧an aineōm̧man, “leen wānōk em̧ōj kallib ilo aenōm̧m̧an” (Jemes 3:17, 18).

Ewōr ad kālōt. Jemaron̄ pukōt nana ippān ro jet. Ak jemaron̄ kōm̧m̧an aenōm̧m̧an im jerbal n̄an kōlapļo̧k n̄an ro jet meļeļe, jim̧we, jeorļo̧k bōd jelukkuun ikrelel kōņaan n̄an kōjmake. Ej ad kālōt, n̄an jabdewōt jej pukōte, me jenaaj ilo m̧ool loe.