“Bwaai aikai a bane ni Kakabwaiaai”

Ngkana te Kaonobong, ko na kunea Elvira Guagliarello tabetabe ni mwakuri n ana umwa ni kuuka ni mweengana i Puerto Madryn, e tei i mataniwiin te aba ae Argentina’s Nuevo Gulf n ana burowiinti Chubut maiaki.

E katinea ara buraoa ao te ran ao ea manga anai rengarenga ake tabeua. E taetae teutana ngke e mwakuri, e takarua ni katea kain ana taetae ni ikawai imwiina ana taeka. Kabaneana raoi, e mwakuri ibukin te Uea.

“I namakina te kukurei ibukina bwa I ataia bwa ikaraoa te bwai ae tamaroa,” e taku te Aine ae Guagliarello ngke tabe n rengan ana rengarenga. E iangoa te Tia Kamaiu ngke tabe ni karaoa ana mwakuri, e kukurei n te iango are imwiin ana mwakuri ni ibuobuoki e buokiia tabeman membwa n te Ekaretia n Ururinga.

Te aine ae Guagliarello, 82 ana ririki, e kukurei ni beku bwa te tia reirei ibukin te mwamwanga, e ibuobuoki naba ni kairan te anene n ana uoote, ao e kakaraoa te kariki ibukin karaoan ana otenanti te toa—te wewete are e a tia ni karikirakea inanon te maan ae kaniia te 10 te ririki. E katauraoa te mwakoro ni kariki ibukina ni moan te wiiki, ao n te kaonobong e bairea ana tai ni karaoa te kariki “ti ibukin te Taromauri,” e taku. “I taetae nakoiu, ‘I riai ni karaoa te kariki ao I riai n nako n taromauri.’ I aki tangiria ni bwaka.”

E anganai marurungiu te kona, n nako naba nakon te tembora—ni karaoa 20-te aoa te mwananga n te bus i meang nakon te Tembora i Buenos Aires Argentina i nanon teuana te ririki.

“E rang ni kukurei n taainako te ʻaine ae Guagliarello ni beku n aanga nako are konaa,” e taku ana bitiobi, Jesús Santos Gumiel. “Membwa n te uoote ataia ae kona ni warekia naba. Ni kaineti ma ana ririki, e bon kakaonimaki ni kakatauraoa te kariki ni katoa Kaonobong ao n roroko nakon te taromauri ni katoa Tabati. Bon te banna ni katoto ae tamaroa.”

E kaitibo ma mitinare aika bwanin aia tai te aine ae Guagliarello n te 1962 i Mar del Plata, Buenos Aires, maiaki ngke mwakuri n auti aika kaboaki n te tabo are maeka iai. E kinaia ngke a kakarebwerebwe n taia ni mataroa 15 te ririki imwiina, e a tia ni mwaing imwiina nako Buerto Madryn, e butimwaea te reirei, ao e babetitoaki, ao e moana maiuna ni beku ibukin te Ekaretia.

N taai aikai ao e maeka n ti ngaia, ma e aki namakina te maroaa. Bwa iai ana boki aika tabu ao ana utu n te uoote, ao e aki toki n rereitaki ma Tamana are IKarawa n te tataro. Irarikina, e rang ni kukurei n ana iraorao te Tamnei, are e atia te Uea ni berita nakoia naake a beku ibukina ibukiia tabemwaang.¹

“Bwaai aikai a bane ni kakabwaiaai,” E taetae te aine ae Guagliarello ma te moangare. “E kamwakuriira te Ekaretia, ao bon anne ae karekea te kukurei nakoiu. I a tia n aki toki n karekea te kukurei n au tai ni beku ibukin Tamara are i Karawa.”