Unimwaane L. Tom Perry n aia kooram Abotoro ake Tengaun ma Uoman e roko i Guam n Ritembwa 2010 ni katea te Barrigada Guam Titeiki, te moan titeiki n aban Guam. Ngke e mena ikekei, Unimwaane Perry, are e mwakuri n ibuobuoki n te United States Marine Corps n te aono n te Kauoua ni Buaka n te Aonaaba, e roko naba n te Pacific War Museum ao te aba are e kaan ae Saipan. Iai 1,971 membwa n te Ekaretia ake a maeka i Guam. Te tabo ae Guam bon mwakoron te Asia North Area n te Ekaretia.

Tabeman taokita n te LDS mai Australia a kabanea aia tai ni bwainaorakiia ake a rotaki ni butin te korera ni kaawa ake a tionako i meangmaeaon Papua New Guinea n ra tokin 2010.

Taokita a mwakuri ma aoraki aika bubua, ni kamaiua temanna te mwaane ae e a bon kaan matena ngke e roko n te onaoraki ao tabeman ake a na mate ngkana a aki bwainaorakiaki.

Aomata a ibetuutu nakoia taokita n riaon te aba ao n te waa. David Williams mai Brisbane ao Anthony Mahler mai Cairns a taekinna bwa inanon teuana te bong ni kawarakin te kaawa ae Sogere, a bwainaorakia ae e raka iaon 200 keiti ake a korera. N tarakin te bwai ae a rinanona aio, e taku Dr. Mahler, “[Bon] te kabanea ni kakukurei ni mwakuri are I a tia rinanona ni maiu,” n aki tabe ma kangangan ao kakuan te mwakuri.

Irarikin kanakoakiia taokita, te Ekaretia e a tia n anga bwai ni buoka, n ikotaki ma buoka ni bwainaonaoraki ao bwain kaitiakan te ran. Kanakoakin amwarake ao toobu a bon kanakoaki naba nakon aono ake a rootaki man te Ekaretia i Port Moresby, ao kanakoakin bwai n ibuobuoki ibukin tararuan te itiaki mai Port Moresby ao Brisbane. Te taanga ni mitinare ae iai rabakauia ni bwainaorakian te ran a nako Papua New Guinea ni buoka karaoan te mwakuri n ibuobuoki.

N Tianiware, te Ekaretia e moana tibwatibwakin te DVD ni Kakorakorakia te Roronrikirake 2011, We Believe, nakon ana iunite te Ekaretia ni katobibia te aonnaba bwa e na kamanenaki ni boutoka te Botoniango n Reitaki 2011.

Te DVD e onrake n tamnei ao rongorongo ake a karaoaki ni buokakin te roronrikirake ni karaoa te boto n iango, Taekan te Onimaki 1:13, oin mwakoron maiua. Mwakorona tabeua a kaota Beretitenti Thomas S. Monson, beretitenti ni kabuta irouia Kairake ni Mwaane ao Kairake n Ataeinnaine, te anene, aia kakoaua roronrikirake, ao a bati riki.

Angin kanoana bon aia kakoaua roronrikirake ao aia taneiai ni kaunganano.

Te anene, rongorongo ao kakoaua a kona ni kamanenaki ni karikirakei aia kiraati roronrikirake, bowii, ao waaki ni kakukurei inanon te ririki.

Ni kabane te bwai n reirei a tauraoi n te aon raain n te youth.lds.org.

Te DVD a bon mena naba inanona taetae ake a tia n rairaki aika imwiina: Chinese, English, French, German, Italian, Japanese, Korean, Portuguese, Russian, and Spanish.