Hem I No Stap long Ples Ya, Hem I Laef Bakegen

Tedei ol hafhaf samting nomo we i stap blong Kapaneam, taon ia we i stap long saed blong wota, hat blong ministri blong Sevya long Galili. Long ples ia, Hem i bin prij long haos blong prea, i bin tij long saed blong solwota, mo i bin hilim ol man insaed long ol hom.

Long stat blong ministri blong Hem, Jisas i bin ridim wan skripja long Aesea: “Hae God we i Masta blong yumi, hem i jusumaot mi, mo paoa blong Spirit blong hem i kam fulap long mi, blong mi kam talemaot gud nius long ol puaman. Hem i sanem mi, blong mi kam mekem ol man we tingting blong olgeta i foldaon olgeta, oli harem gud bakegen, mo blong mi talemaot long olgeta we oli stap wok slef long narafala kantri, se oli save gohom, mo blong mi tekemaot olgeta we oli stap long kalabus blong oli save gofri.” (Aesea 61:1; luk tu long Luk 4:18)—wan klia toktok blong wan tabu plan blong sevem ol boe mo gel blong God.

Be prijing blong Jisas long Galili hem i wan fas toktok nomo. Pikinini blong Man i gat oltaem wan nogud fraet long wanem bae Hem i mitim long wan hil we oli singaotem Golgota.

Oli bin arestem Hem long Garen blong Getsemane afta long Las Sapa, ol disaepol blong Hem oli bin lego Hem, oli bin spet long Hem, oli putum Hem long kot, mo oli tritim nogud Hem. Jisas i karem hevi kros blong Hem wetem las paoa we Hem i gat i go long Kalvari. Hem i stat long viktri i go long fasin we oli salem Hem long ol rabis man, oli kilim hem, oli mekem hem i harem nogud, mo i ded long kros.

Long ol toktok blong singsing ia “Tabu Taon”:

Papa blong yumi long Heven i bin givim Pikinini blong Hem from yumi. Bigfala Brata blong yumi i bin givim laef blong Hem from yumi.

Stret long las minit, Masta i bin save tanemraon mo gobak. Be Hem i no bin mekem. Hem i go andanit long evri samting blong Hem i save sevem evri samting: man, wol, mo evri kaen laef we i bin laef long wol ia.

I no gat ol toktok long Kristianiti we i minim moa long ol toktok blong enjel we i bin talem long Meri Magdala we i bin stap krae mo nara Meri taem tufala i bin kam kolosap long tumb blong tekem kea long bodi blong Masta blong tufala: “From wanem yufala i stap lukaot man we i laef long ples blong ol dedman? Hem i no stap long ples ya, Hem i laef bakegen” (Luk 24:2–6).

Wetem toktok ia, olgeta we oli bin laef mo ded, olgeta we oli laef naoia mo wan dei bae oli ded, mo olgeta we bae oli bon yet mo bae oli ded yet, Jisas i jes sevem olgeta nomo.

From se Kraes i bin gat viktri ova long grev, yumi evriwan bae i laef bakegen long ded. Hemia i fasin blong pemaot sol blong man. Pol i bin raetem:

“Mo i gat ol samting ya we oli stap long skae, mo ol samting ya we oli stap long wol. Be flas blong ol samting ya long skae, mo flas blong ol samting ya long wol i naranarafala.

“Flas blong san i narafala, mo flas blong mun i narafala, mo flas blong ol sta i narafala. Mo bakegen, flas blong wan sta i narafala long flas blong narafala sta.

“Nao taem ol dedman oli laef bakegen, fasin blong samting ya bambae i olsem ol toktok ya” (Fas Korin 15:40–42).

Hem i selestial glori nao we yumi stap lukaotem. Hem i long ples blong God nao we yumi wantem blong stap. Hem i long wan famle we i no save finis we yumi wantem gat membasip long hem.

Abaot Hem we i bin sevem wanwan long yumi long ded we i no gat en, mi testifae se Hem i wan tija blong trutok—be Hem i moa long wan tija. Hem i wan man blong eksampol blong laef we i stret evriwan—be Hem i moa long man blong givim eksampol. Hem i wan bigfala dokta—be Hem i moa long wan dokta. Hem i stret Sevya blong wol, Pikinini blong God, Prins blong Pis, Tabuwan blong Isrel, mo tu, Hem i Lod we i laef bakegen long ded, we i bin talem se Hem i faswan mo laswan; se Hem i laef, mo oli bin kilim ded Hem, mo Hem i loya blong yumi long fes blong Papa (luk long D&C 110:4).

“Mi glad, mi glad blong talemaot: ‘Mi save ridima hem i laef!’”²

Mi testifae long hemia.