Mi No Gat Intres long Jos

Mi no bin wantem blong gat eni samting wetem Jos taem waef blong mi i bin askem sapos ol misinari oli save tijim ol boe blong mitufala. Be mi no bin talem no, from se hem i wan memba blong Jos finis.

Taem ol misinari oli stat blong kam long haos blong mifala tu (2) taem long wan wik, bae mi go long haos blong fren blong mi long nekis yad. Fren blong mi i wan strong memba blong wan narafala Kristin jos. Evri taem mi visitim hem, hem i wantem blong tokbaot Baebol. Mi talem long hem se mi no wantem blong harem ol kaen samting olsem mo mi no wantem blong stadi long relijin. Be hem i gohed blong traem blong jenisim tingting blong mi, mo mi talem yes. Mekem se, blong longtaem mi bin stadi long Baebol wetem fren blong mi taem ol misinari oli bin stap tijim ol boe blong mi.

Wan dei,hem i taem blong ol misinari blong oli kam long haos blong mifala. Be mi no bin ronwe, mi disaed blong stap long narafala rum long haos. Taem ol misinari oli stat blong tijim ol boe blong mi, mi kam blong wantem blong harem moa. Mi muv i kam kolosap mo moa kolosap long doa blong harem gud ol toktok. Oli bin tijim ol boe blong mi abaot ol aposol mo ol profet.

Afta long hemia, mi luksave se mi wantem blong lanem moa. Mi bin toktok wetem ol misinari mo disaed blong tekem ol lesen blong olgeta—long praevet. Waef blong mi i bin stap oltaem, be i no gat wan nara man bakegen i save long hem.

Taem ol misinari oli kam blong tijim ol boe blong mi tu (2) taem long wan wik, bae mi mi go long haos blong fren blong mi. Afta, long wan defren dei, bae oli tijim mi.

Wan dei taem fren blong mi i bin talem wan samting nogud abaot Jos, mi bin difendem Jos. Olsem plante pipol long Ol Marsol Aelan, hem i no bin save plante samting abaot Jos mo hem i no bin andastanem gud sam long ol samting we ol Lata Dei Sent oli bilivim. Taem hem i talem sam moa samting we i agensem Jos, bakegen mi bin difendem Jos.

Mo i bin go olsem ia nao blong seven manis. Afta, wan dei, mi luksave se Tabu Spirit i bin konfemem long mi se evrisamting we ol misinari oli bin tijim mi long hem oli bin tru. Mi bin luksave se mi nid blong kasem baptaes, nomata mi save smol nomo abaot gospel.

Afta long baptaes blong mi long yia 2007, mi bin hapi tumas. Mifala i stat blong sevem mane blong go long tempol long Hawae, ples we waef blong mi, ol trifala pikinini blong mitufala, mo mi, mifala i bin sil long Disemba 2008.

Blong stap olsem wan memba blong Jos i mekem wan bigfala jenis long laef blong mi. Mi bin disaed blong mi lego nambatu wok blong mi blong stap mekem enteteinmen long restoron from se bae mi kam let long hom long naet mo ol klos blong mi bae oli wetwet wetem smok blong tabak. Nomata we mifala i lusum sam moa mane, Lod i bin lukaot gud long mifala.

Mi save Jos hem i tru mo we Josef Smit i wan profet blong God from Spirit we mi bin filim mo ol blesing we mi bin kasem.