Kaniwanga ibukin Manga Kateana

Ibukina ngkai I maeka i Shanghai, Tiaina, e reke au tai ma te kurubu man te reirei n nako Sichuan Province i maiakimaeaon Tiaiana ni buoka katean auti ibukiia naake a rootaki n te mwaeiei are e a karika te urubwai n te aono tabeua te ririki n nako. Ti mwakuri korakora ni kawenean buriki, tiabora ni karikan timanti, kokakin wibwara aika a onrake n taian buriki, ao ni karuoakin buriki nako naano “rain ni ikotaki” ibukiia aomata. N te kauoua ni bong e maraki nuukau, ao a bwangabwanga au nangoa ni bai. E ngae n anne, te mwangana bon te bwai are I rinanona are I aki kona ni mwaninga taekana ao e kakorakora oin au koaua ao kakawakin temanna i bon irouna, teuana mai ibuakon aia botoniango Kairaki n Ataeinaine.

Ngkai I mwakuri korakora ni katoa bong, I nooria bwa au kakoaua e tabe n rikirake. I namakina ae tamaroa ibukiu ibukina ngkai I karaoi bwaai aika a na karikirakei maiuakinan aanga ibukiia naake a karako kakabwaiakia n ai arou.

E reke naba ara tai ni kawara te reirei n te aono. Ngke ti a roko, a rangi ni mwaiti ataei aika kakateke aika a biribiri bwa ana kawarira. Ngke I nooria ataei aika uarereke aika kamimii aikai, I noori naba kakawakiia. Bon ataei aika a rangin tamaroa iroun te Atua, ao I namakina te korakora bwa E tangiriia ao e kinaiia n tatabemaniia nako.

Ni kaanian tokin kawaiu e reke ara tai n nakon te tabo, are ti nang kana iai ara katawanou. Ngke ti roko ikekei, e ngae n anne, ti kunea bwa e korakora te uruaki imwiin te mwaeiei. Bon te kabanea ni buakaka n urubwai are I a tibwa nooria. E karika tangiu. Tenaan tiiriing ao oon te kateitei a bwaka, aroka aika uakaan a bwaka, ao a uamaee atibun buriki n taabo nako. Te atibu ae bubura e tiroro rikaaki man te maunga ao ni kauntaba ma rarikin teuana te kateitei, ni karika te tiiriing ao te oo ni bwaka. Iai teuana toan te kau ae e wene imatan teuana te mataroa.

Ngkai I iangoa aei ao koauana ngkai aomata a mate n te kanganga aei, I korakai ni kan ataia e kanga Tamara are i Karawa ni karika aei. E aki tangiriia? Ngkanne I a iangoa rikaaki are tia tia ni maroroakinna n aia kiraati Kairake n Ataeinaine ao n ataia bwa eeng, E bon tangiriia. E kinaiia ao n tangiriia n tatabemaniia nako. Naake a mate n te bong arei bon natin ni kabane te Atua, e kananokawakai riki iangoan te aekakin bwai arei. Ma ngkanne I nooria bwa aomata aikai a mena n te aonaaba n tamnei ao a kona ni manga oki riki nakon Tamara are i Karawa. Te iango aei e karaua nanou ao e anganai te namakin ae rau.

I ataia bwa Ngai natin te Atua, ma kakawakiu ae korakora. Ngaira ni kabane natin Tamara are i Karawa, are e kinaira n ti ngaira n onoti. E tangiriia ma te tangira are nano ao e korakora nakon are ti kona ni iangoia. Te atatai aei e bon unikaki rikaaki nako nanou ngkai I mwakuri ao ni beku ibuakoia aomata are a korakora rootakiia n te mwaeiei i Sichuan.