ʻEletā Carl B. Cook

ʻI he teuteu ʻa e talavou faifekau ko Kā Peeti Kukí ke ʻalu ʻo ngāue ʻi Hamipeeki ʻi Siamané, naʻá ne fāinga ʻi he Misiona Ako ki he Ngaahi Leá (ʻa ia ʻoku ʻiloa he taimí ni ko e Senitā Akoʻanga Fakafaifekaú), ke ako e lea faka-Siamané. Lolotonga ʻene feinga ke ʻilo e ngaahi foʻi lea tefitó, kuo hoko atu ʻa kinautolu ʻi hono vahé ki ha ngaahi fakakaukau naʻe faingataʻa ange.

Naʻe ʻikai ke fiemālie ʻa ʻEletā Kuki ʻi he tuai ʻene fakalakalaká, ko ia naʻá ne fekumi ai ki ha tokoni fakalangi ʻo fakafou ʻi ha tāpuaki ʻo e lakanga fakataulaʻeikí pea mo e lotú. ʻI he ʻosi ange ha lotu loto fakamātoato ʻa ʻEletā Kuki, ʻokú ne manatuʻi pē ʻene maʻu ha tali pau ki aí: naʻe ʻikai uiuiʻi ia ʻe he ʻEikí ke poto ʻaupito ʻi he lea faka-Siamané ka ke ne ngāue ʻaki ʻa hono lotó, ʻatamaí, mo e iví kotoa.

ʻOku pehē ʻe ʻEletā Kuki, ʻa ia ne toki uiuiʻí ni pē ko e mēmipa ʻo e Kōlomu ʻUluaki ʻo e Kau Fitungofulú, “Ne u fakakaukau hake he taimi pē ko iá, ‘Te u lava ʻo fai ia. Te u lava ʻo ngāue ʻaki hoku lotó, ʻatamaí, mo e iví kotoa.’ Ne u tuʻu hake kuó u ongoʻi fiemālie. Naʻe liliu fakafokifā pē ʻeku fakafuofuaʻi ʻaki ʻeku fakalakalaká ʻa e tuʻunga naʻe ʻi ai ʻa kinautolu ʻi homau vahé ki heʻeku fakafuofuaʻi ʻaki e ongo naʻe maʻu ʻe he ʻEikí ki he meʻa naʻá ku faí.”

Neongo ʻoku pehē ʻe ʻEletā Kuki naʻe ʻikai toe vave ange ʻene ako e leá hili e meʻa ko ʻeni naʻe hokó, ka naʻe ʻikai ke ne kei ongoʻi e ngaahi meʻa naʻá ne hohaʻa ki ai ʻi muʻá he naʻá ne ʻiloʻi naʻá ne fai e meʻa naʻe finangalo e ʻEikí ke ne faí. ʻOkú ne pehē naʻe mahuʻinga e lēsoni ko iá ʻi he ngaahi uiuiʻi kotoa pē naʻá ne maʻu talu mei ai, kau ai ʻene hoko ko ha pīsope, tokoni ʻi he kau palesitenisī fakasiteikí, palesiteni fakasiteiki, palesiteniʻo e Misiona ʻAokalani Nuʻu Silá, Fitungofulu Fakaʻēlia, pea mo hono fatongia lolotongá.

Naʻe maʻu ʻe ʻEletā Kuki hono BA ʻi he fakamāketi fakapisinisí mei he Kolisi Uepa Siteití pea mo ha MA ʻi hono puleʻi ha pisinisi mei he ʻUnivēsiti ʻo e Siteiti ʻIutaá. Ko ʻene ngāue maʻuʻanga moʻuí ʻa e fakalakalaka ʻi he kumi kelekelé.

Naʻe fāʻeleʻi ʻa ʻEletā Kuki ʻi ʻOkiteni, ʻIutā, ʻi he USA, ʻi ʻOkatopa 1957, kia Lamona Kuki Paaka mo Peeti E. Kuki kuo pekiá. Naʻá ne mali mo Līneti Haniseni ʻi he ʻaho 14 ʻo Tīsema 1979, ʻi he Temipale ʻOkiteni ʻIutaá. ʻOku ʻi ai ʻena fānau ʻe toko nima.